ފްރާންސްގެ ޗެމްޕިއަން ޕީއެސްޖީއާއެކު ހަދާފައި އޮތް އެއްބަސްވުން އާޖެންޓީނާގެ ފޯވާޑް އެންހެލް ޑި މާރިއާ އާކޮށްފިއެވެ.
ހުކުރު ދުވަހު ޕީއެސްޖީން ނެރުނު ބަޔާނެއްގައި ވަނީ އުމުރުން 33 އަހަރުގެ ޑި މާރިއާގެ އެއްބަސްވުން އިތުރު އެއް ސީޒަނަށް އާކުރިކަން ހާމަކޮށްފައެވެ. އެހެންކަމުން އަންނަ އަހަރުގެ ޖޫން މަހުގެ ނިޔަލަށް ޕީއެސްޖީގައި ޑި މާރިއާ މަޑުކުރާނެއެވެ. އަދި އައު އެއްބަސްވުމުގެ ދަށުން އިތުރު އެއް އަހަރަށް ޕީއެސްޖީގައި ޑި މާރިއާ މަޑުކުރުވުމުގެ ފުރުސަތު އެ ކުލަބަށް ވަނީ ލިބިފައެވެ.
އަންނަ އަހަރުގެ ހޫނު މޫސުމުގެ ނިޔަލަށް ޕީއެސްޖީގައި ޑި މާރިއާ މަޑުކުރާއިރު، އޭނާއަކީ އެ ކުލަބުގެ ތާރީޚުގައި ދެވަނައަށް އެންމެ ގިނައިން ލަނޑު ޖަހަން ފުރުސަތު ތަނަވަސްކޮށްދީފައިވާ ކުޅުންތެރިޔާއެވެ. އެގޮތުން ޑި މާރިއާ ވަނީ މިހާތަނަށް 103 ލަނޑު ޖަހަން ފުރުސަތު ތަނަވަސްކޮށްދީފައެވެ. މި ލިސްޓުގެ އެއްވަނައިގައި އޮތީ 1982 ވަނަ އަހަރުން ފެށިގެން 1991 ވަނަ އަހަރުގެ ނިޔަލަށް ޕީއެސްޖީއަށް ކުޅުނު ބޮސްނިއާގެ ކުރީގެ މިޑްފީލްޑަރު ސަފެޓް ސޫސިޗެވެ.
އެއްބަސްވުން އާކުރުމަށްފަހު ޑި މާރިއާ ބުނީ އޭނާގެ އަމާޒަކީ ސޫސިޗުގެ ރިކޯޑު މުގުރާލައި، ޕީއެސްޖީގެ ތާރީޚުން ޖާގަ ހޯދުން ކަމަށެވެ. އަދި ޕީއެސްޖީއާއެކު މި ސީޒަނާއި ކުރިއަށް އޮތް ސީޒަނުގައިވެސް ގިނަ ކާމިޔާބީތަކެއް ހޯދުމަށް ބޭނުންވާ ކަމަށްވެސް ވަނީ ބުނެފައެވެ.
މެންޗެސްޓާ ޔުނައިޓެޑް ދޫކޮށް 2015 ވަނަ އަހަރު ޕީއެސްޖީއާ ގުޅުނު ޑި މާރިއާ އެ ކުލަބުގައި މޮޅު ކުޅުމެއް ދައްކަމުން އަންނައިރު، އޭނާ ވަނީ މިހާތަނަށް ޕީއެސްޖީއަށް ކުޅެދިން 248 މެޗުގައި 86 ލަނޑު ޖަހާފައެވެ. އަދި ވަނީ ޕީއެސްޖީއާއެކު މިހާތަނަށް ފްރެންޗް ލީގު ހަތަރު ފަހަރު ކާމިޔާބުކޮށްފައެވެ.
