ސައުތެމްޓަން ބަލިކޮށް ސިޓީއަށް 14 ޕޮއިންޓުގެ ލީޑެއް

އިނގިރޭސި ޕްރިމިއާ ލީގުގައި ބުދަ ދުވަހުގެރޭ ސައުތެމްޓަން އަތުން މޮޅުވެ، ތާވަލުގެ އެއްވަނައިގައި މެންޗެސްޓާ ސިޓީން 14 ޕޮއިންޓުގެ ލީޑެއް ނަގައިފިއެވެ.

އަމިއްލަ ދަނޑުގައި ކުޅުނު މެޗުން ސިޓީ މޮޅުވީ ފަސޭހަކަމާއެކު 5-2 ގެ ނަތީޖާއަކުންނެވެ.

މި މެޗުގެ 15 ވަނަ މިނެޓުގައި ކެވިން ޑި ބްރޭނާގެ ލަނޑުން ސިޓީން ލީޑު ނެގި ނަމަވެސް، އޭގެ 10 މިނެޓު ފަހުން ސައުތެމްޓަނުން ވަނީ ނަތީޖާ އެއްވަރުކޮށްފައެވެ. ލިބުނު ޕެނަލްޓީއަކުން މި ލަނޑު އެ ޓީމަށް ކާމިޔާބުކޮށްދިނީ ޖޭމްސް ވޯޑް-ޕްރައުސެވެ. މިއީ އޭރިއާ ތެރެއިން ސައުތެމްޓަނުގެ ޔެނިކް ވެސްޓެގާޑަށް ސިޓީގެ އައިމެރިކް ލަޕޯޓް ކުރި ފައުލަކަށް ރެފުރީ ދިން ޕެނަލްޓީއެކެވެ.

ސައުތެމްޓަނުން ނަތީޖާ އެއްވަރުކުރި ނަމަވެސް، ފުރަތަމަ ހާފު ނިމުމުގެ ކުރިން ސިޓީން ވަނީ އަލުން ލީޑު ނަގާފައެވެ. އެގޮތުން މެޗުގެ 40 ވަނަ މިނެޓުގައި ސިޓީއަށް ދެވަނަ ފަހަރަށް ލީޑު ނަގައިދިނީ ރިޔާދު މާރޭޒެވެ. އަދި ފުރަތަމަ ހާފުގެ އިތުރު ވަގުތުގައި އިލްކާއި ގުންޑޮގާން ވަނީ ސިޓީއަށް ލީޑު ފުޅާކޮށްދީފައެވެ.

މި މެޗުގެ ދެވަނަ ހާފު ފަށައިގެން 10 ވަނަ މިނެޓުގައި މާރޭޒް ސިޓީގެ ހަތަރު ވަނަ ލަނށޑު ޖަހައިދިން ނަމަވެސް، އޭގެ މިނެޓެއް ފަހުން ޗޭ އެޑަމްސް ވަނީ ސައުތެމްޓަނުގެ ދެވަނަ ލަނޑު ޖަހާފައެވެ. އެކަމަކު މެޗުގެ 59 ވަނަ މިނެޓުގައި ޑި ބްރޭނާ ވަނީ ސިޓީގެ ފަސްވަނަ ލަނޑު ޖަހައި، އެ ޓީމުގެ ލީޑު އަލުން ފުޅާކޮށްފައެވެ.

މި މޮޅާއެކު ތާވަލުގެ އެއްވަނައިގައި ސިޓީ އޮތީ ކުޅުނު 29 މެޗުން ލިބުނު 68 ޕޮއިންޓާއެކުއެވެ. ދެވަނައިގައި އޮތް މެންޗެސްޓާ ޔުނައިޓެޑަށް 28 މެޗުން ލިބިފައިވަނީ 54 ޕޮއިންޓެވެ. އަދި ސިޓީ އަތުން ބަލިވި ސައުތެމްޓަން އޮތީ ތާވަލުގެ 14 ވަނައިގައި 28 މެޗުން 33 ޕޮއިންޓާއެކުއެވެ.