ޕެލަސް އަތުން ޔުނައިޓެޑަށް ޕޮއިންޓެއް

އިނގިރޭސި ޕްރިމިއާ ލީގުގައި ބުދަ ދުވަހުގެރޭ ކްރިސްޓަލް ޕެލަސް އާއި މެންޗެސްޓާ ޔުނައިޓެޑް ބައްދަލުކުރި މެޗު އެއްވަރުވެއްޖެއެވެ.

ޕެލަސްގެ ދަނޑުގައި ކުޅުނު މި މެޗު ނިމުނީ ދެ ޓީމުން ކުރެ ޓީމަކަށް ލަނޑެއް ނުޖެހިއެވެ. މި މެޗު ލަނޑެއް ނުޖެހި އެއްވަރުވިއިރު، ޔުނައިޓެޑުން އެންމެ ފަހުން ކުޅުނު ތިން މެޗުވެސް ނިމިފައިވަނީ ލަނޑެއް ނުޖެހި އެއްވަރުވެގެންނެވެ.

ބުދަ ދުވަހުގެރޭ ކުޅުނު މެޗުގައި ދެ ޓީމުގެ ފަރާތުންވެސް ހަމަހަމަ ކުޅުމެއް ފެނިގެންދިޔައިރު، މި މެޗުގައި ގޯލާ އަމާޒުކޮށް ޔުނައިޓެޑަށް ފޮނުވާލެވިފައިވަނީ އެންމެ ހަމަލާއެކެވެ. އެގޮތުން ފުރަތަމަ ހާފުގައި އޭރިއާ ބޭރުން ޔުނައިޓެޑުގެ ނެމަންޔާ މަޓިޗް ބާރު ހަމަލާއެއް ފޮނުވާލިއިރު، އެ ހަމަލާ ޕެލަސްގެ ގޯލްކީޕަރު ވިސެންޓޭ ގުއައިޓާ ވަނީ ހުށިޔާރުކަމާއެކު ދިފާއުކޮށްފައެވެ.

މި މެޗުގެ ފުރަތަމަ ހާފުގައި ޕެލަސްއިން ގޯލާ އަމާޒުކޮށް ހަމަލާއެއް އުފައްދާފައި ނުވި ނަމަވެސް، ދެވަނަ ހާފުގެ ކުރީކޮޅު އެ ޓީމުގެ ޖޯޑަން އަޔޫ ފޮނުވާލި ހަމަލާއެއް ޔުނައިޓެޑުގެ ގޯލްކީޕަރު ޑީން ހެންޑަސަން ވަނީ މަތަކޮށްފައެވެ. އޭގެ ފަހުން މި މެޗުގައި ލީޑު ނަގަން އެންމެ ހުސް ފުރުސަތެއް ލިބިގެންދިޔައީ ޕެލަސްގެ ޕެޓްރިކް ވޭން އާންހޯލްޓަށެވެ. އެކަމަކު ހުހަށްހުރެ އޭނާ ފޮނުވާލި ބޯޅަ ޑީން ހެންޑަސަން ވަނީ ދިފާއުކޮށްފައެވެ.

މި މެޗުން ޔުނައިޓެޑް އެއްވަރުވުމާއެކު، ތާވަލުގެ އެއްވަނައިގައި އޮތް މެންޗެސްޓާ ސިޓީއަށް ވަނީ 14 ޕޮއިންޓުގެ ލީޑެއް ލިބިފައެވެ. އެގޮތުން ކުޅުނު 27 މެޗުން ލިބުނު 65 ޕޮއިންޓާއެކު ސިޓީ އެއްވަނައިގައި އޮތްއިރު، ދެވަނައިގައި އޮތް ޔުނައިޓެޑަށް 27 މެޗުން ލިބިފައިވަނީ 51 ޕޮއިންޓެވެ. އަދި ޔުނައިޓެޑާ އެއްވަރުކުރި ޕެލަސް އޮތީ ތާވަލުގެ 13 ވަނައިގައި 27 މެޗުން 34 ޕޮއިންޓާއެކުއެވެ.