ރާއްޖެއިން ޓްރެވަލް ތުރުކީ އިޒްމީރް ޑިޖިޓަލް ފެއާގައި ބައިވެރިވެއްޖެ

ތުރުކީގައި ބާއްވާ އެންމެ ފުރަތަމަ ވަރޗުއަލް ފެއަރ، ޓްރެވަލް ޓަރކީ އިޒްމީރް ޑިޖިޓަލް ފެއަރ (ޓީޓީއައި) ގައި ރާއްޖެއިން ބައިވެރިވެއްޖެއެވެ.

ފެބްރުއަރީ މަހުގެ 25ން 27ށް ކުރިއަށް ގެންދާ މި ފެއަރ އަކީ 14 ވަނަ ޓީޓީއައި ފެއަރއެވެ. މި ފެއަރގައި ދުނިޔޭގެ އެކި ކަންކޮޅުތަކުގައި ފަތުރުވެރިކަމުގެ ސިނާއަތުގައި ހަރަކާތްތެރިވާ ފަރާތްތަކުން ބައިވެރިވާއިރު، ރާއްޖެ އިޝްތިހާރު ކުރުމަށް ވިޒިޓް މޯލްޑިވްސްގެ ހާއްސަ ސްޓޭންޑެއް އިންނާނެއެވެ.

Advertisement

މި ސްޓޭންޑް މެދުވެރިކޮށް ރާއްޖޭގެ ފަތުރުވެރިކަމާއި ގުޅޭ އެންމެ ފަހުގެ މައުލޫމާތުތައް ފޯރުކޮށްދެވިގެންދާނެއެވެ. އެގޮތުން ރާއްޖޭގައި ޗުއްޓީހޭދަކޮށްލަން ބޭނުންވާ ފަރާތްތަކަށް ރާއްޖޭގައި ތަޖުރިބާކޮށްލަން ލިބޭނެ ކަންތައްތަކާއި ގުޅޭގޮތުން މައުލޫމާތު ހިއްސާކުރާއިރު، ރާއްޖެއަކީ ރައްކާތެރި މަންޒިލެއްގެ ގޮތުގައި އިޝްތިހާރު ކުރެވިގެންދާނެ ކަމަށް މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް (އެމްއެމްޕީއާރްސީ) އިން މައުލޫމާތުދެއެވެ. އެގޮތުން ރާއްޖެއަކީ ކުދި ކުދި ރަށްތަކެއްގެ މައްޗަށް ބިނާވެގެންވާ ގައުމަކަށް ވުމުން އެކަހެރިކޮށް ރައްކާތެރިކަމާއިއެކު ރާއްޖޭގައި ޗުއްޓީ ހޭދަކޮށްލުމުގެ ފުރުސަތު ލިބިގެންދާނެ ކަން ފެއަރގެ ބައިވެރިންނާ ހިއްސާކުރެވިގެންދާނެއެވެ.

މީގެ އިތުރުން ރާއްޖެއަކީ ރައްކާތެރި މަންޒިލެއްގެ ގޮތުގައި އިޝްތިހާރުކުރުމަށް ކުރެވިގެންދާ މަަސައްކަތުގެ ތެރެއިން ރާއްޖޭގެ ފަތުރުވެރިކަން ދައްކައިދޭ ހާއްސަ ވީޑިއޯއެއް ފެއަރގައި ދައްކާލެވޭނެއެވެ. އަދި މިފެއަރގެ ވެބިނަރގައި އެމްއެމްޕީއާރްސީގެ މެނޭޖިން ޑިރެކްޓަރ ތޮއްޔިބު މުހައްމަދު ވާހަކަދައްކަވަން ހަމަޖެހިފައިވާއިރު، ކޮވިޑް-19 ގެ ސަބަބުން ރާއްޖޭގެ ފަތުރުވެރިކަމަށް ކުރިމަތިވެފައިވަ ގޮންޖެހުންތަކަށް އަލިއަޅުވާލައްވާނެއެވެ. އަދި ރާއްޖެއަކީ ރައްކާތެރި މަންޒިލަކަށް ހެދުމަށް ކުރެވޭ މަސައްކަތްތަކަށް ތޮއްޔިބުގެ ވާހަކައިގައި އަލިއަޅުވާލައްވާނެއެވެ.

މިފެއާގައި ބައިވެރިވާ ފަރާތްތަކާއެކު ވިޔަފާރި ގުޅުން ގާއިމްކުރުމުގެ ފުރުސަތު ރާއްޖެއަށް ލިބިގެންދާނެއެވެ. އެގޮތުން ފެއަރ އަށް ޒިޔާރަތްކުރާ އަދި ބައިވެރިވާ އެކި ފަރާތްތަކާ ބައްދަލުކޮށް އެޕޮއިންޓްމަންޓް ހެދުމުގެ ފުރުސަތު ލިބިގެންދާނެއެވެ. މިޑިޖިޓަލް ފެއަރގެ ސަބަބުން ދުނިޔޭގެ އެކި ކަންކޮޅުތަކަށް ރާއްޖޭގެ ފަތުރުވެރިކަން އިޝްތިހާރުވެގެންދާނެއެވެ. ތުރުކީއާއި ރާއްޖެއާ ދެމެދު ޑައިރެކްޓު ފްލައިޓްތައް އޮޕަރޭޓްކުރަމުންދާއިރު، ޓީޓީއައިގެ ސަބަބުން ރާއްޖޭގެ ފަތުރުވެރިކަން ތުރުކީގައި އިތުރަށް އިޝްތިހާރުވެގެންދާނެއެވެ.

ކޮވިޑް-19 ގެ ސަބަބުން ރާއްޖޭގެ ފަތުރުވެރިކަމަށް ގިނަ ގޮންޖެހުންތަކަކާއި ކުރިމަތިލާން ޖެހުނު ނަމަވެސް 2020 ވަނަ އަހަރުވެގެން ގޮސްފައި ވަނީ ރާއްޖޭގެ ފަތުރުވެރިކަމަށް ގިނަ ކާމިޔާބީތަކެއް ލިބުނު އަހަރަކަށެވެ. ވޯލްޑް ޓްރެވަލް އެވޯޑްސްގެ ވޯލްޑްސް ލީޑިން ޑެސްޓިނޭޝަން ރާއްޖެއަށް ލިބިފައިވާއިރު، ރާއްޖޭގެ ފަތުރުވެރިކަމަށް ގިނަ މާކެޓްތަކެއް ވަނީ ތައާރަފްވެފައެވެ. ފާއިތުވި އަހަރު ނިމުނު އިރު 555,494 ފަތުރުވެރިން ރާއްޖެއަށް ޒިޔާރަތްކޮށްފައިވާ އިރު، މިއަހަރުގެ މިހާތަނަށް 180,000ށް ވުރެ ގިނަ ފަތުރުވެރިން ވަނީ ރާއްޖެ އައިސްފައެވެ. ރާއްޖެއަށް ދުވާލެއްގެ މައްޗަށް އެވްރެޖްކޮށް 3,166 ފަތުރުވެރިން އަންނަމުން ދާއިރު، ރާއްޖޭގައި ފަތުރުވެރިން ހޭދަކުރަމުންދަނީ އެވްރެޖްކޮށް 9 ދުވަހެވެ.

ރާއްޖޭގެ ފަތުރުވެރިކަން އިޝްތިހާރުކޮށް ފަތުރުވެރިންގެ މެދުގައި ރާއްޖޭގެ މަގްބޫލުކަން ދެމެހެއްޓުމަށް ގިނަ މަސައްކަތްތަކެއް ކުރެވެމުންދާއިރު، ވިޒިޓް މޯލްޑިވްސް އިން ވަނީ ދާދިފަހުން ޓްރެވަލް މީޓް އޭޝިއާގެ ސައުތު-އީސްޓް އޭޝިއާ ރޯޑްޝޯގައި ބައިވެރިވެފައެވެ. މިއީ އައިޓީބީ އޭޝިއާއިން ކުރިއަށް ގެންދާ ވަރޗުއަލް ޓްރެވަލް ރޯޑްޝޯގެ ތެރޭގައި ހިމެނޭ ކަމެކެވެ.