މިމަހުގެ 8 އިން ފެށިގެން އޭޓީއެމް މެދުވެރިކޮށް ފައިސާ ނަގާ ކަސްޓަމަރުންނަށް ކަރުދާހަށް ޕްރިންޓް ކުރެވިފައިވާ ރިސިޕްޓް ނުލިބޭނެ
މިމަހުގެ އަށްވަނަ ދުވަހުން ފެށިގެން،ޑިޖިޓަލް ރިސިޕްޓް ލިބޭނެ
މިމަހުގެ އަށްވަނަ ދުވަހުން ފެށިގެން، ބޭންކް އޮފް މޯލްޑިވްސް (ބީއެމްއެލް) ގެ އޭޓީއެމް މެދުވެރިކޮށް ފައިސާ ނަގާ ފަރާތްތަކަށް ޑިޖިޓަލް ރިސިޕްޓް ލިބޭގޮތަށް ހަމަޖައްސަން ނިންމައިފިއެވެ.
ބީއެމްއެލް އިން ބުނި ގޮތުގައ އެތާރީހުގެ ފަހުން އޭޓީއެމް މެދުވެރިކޮށް ފައިސާ ނަގާ ކަސްޓަމަރުންނަށް ކަރުދާހަށް ޕްރިންޓް ކުރެވިފައިވާ ރިސިޕްޓް ނުލިބޭނެއެވެ. ނަމަވެސް އޭޓީއެމް މެދުވެރިކޮށް ޑިޕޮޒިޓް، ޓްރާންސްފާ އަދި ފައިސާ ދެއްކުމުން ޓްރާންސެކްޝަން ފުރިހަމަވީ ކަން ޔަގީން ކުރުމަށް ކަރުދާހަށް ޕްރިންޓް ކުރެވިފައިވާ ރިސިޕްޓް ލިބޭނެއެވެ.
"ޑިޖިޓަލް ރިސިޕްޓް ދޫކުރަން ފެށުމަކީ ތިމާވެށި ރައްކާތެރިކުރުމަށް ބޭންކުން ކުރަމުންދާ މަސައްކަތުގެވެސް އެއްބައި" ބީއެމްއެލް އިން ބުނެއެވެ. ބީއެމްއެލް އިން ބުނި ގޮތުގައި މިހާރުވެސް އެ ބޭންކުގެ ގިނަ ކަސްޓަމަރުން ޓްރާންސެކްޝަންތަކުގެ ތަފްސީލް ބެލުމަށް މޮބައިލް އެޕް ބޭނުންކުރެއެވެ. އަދި ވަރަށް ގިނަ ކަސްޓަމަރުންނަށް މިހާރުވެސް މޮބައިލް ފޯނަށް އެސްއެމްއެސްގެ ޒަރީއާއިން ޑިޖިޓަލް ރިސިޕްޓް، ނުވަތަ ޓްރާންސެކްޝަން އެލާޓް ލިބެމުންދާ ކަމަށް އެ ބޭންކުން ބުނެެއެވެ.
ފައިސާ ނެގުމުން ޓްރާންސެކްޝަން އެލާޓް މޮބައިލް ފޯނަށް ލިބެމުން ނުދާ ކަސްޓަމަރުންނަށް ބީއެމްއެލްގެ ކޮންމެ އޭޓީއެމްއެއް މެދުވެރިކޮށްވެސް ފަސޭހަކަމާއެކު އެ ހިދުމަތަށް އެފަރާތެއްގެ މޮބައިލް ނަންބަރު ރަޖިސްޓްރީ ކުރެވޭނެ ކަމަށް ބީއެމްއެލް އިން ބުނެއެވެ. ބީއެމްއެލް އިން ހާމަކުރާ ގޮތުގައި މިހާރު ކުރެވޭ ކޮންމެ 10 ޓްރާންސެކްޝަންއަކުން ނުވަ ޓްރާންސެކްޝަން ކުރެވެނީ އޮންލައިންކޮށެވެ.
