ތާރީޚަކުން ފައިދާއެއް ނެތް، ނުކުންނާނީ އާ ސްޓައިލެއްގައި: ޒިދާން

ޗެމްޕިއަންސް ލީގުގެ ސެމީ ފައިނަލާއި ހަމައަށް އަޔަސް މީގެ ކުރިން ކުޅުނު މެޗުގެތަކުން ލިބޭނެ ފައިދާއެއް ނެތް ކަމަށާއި އަންގާރަ ދުވަހުގެ ރޭ އެތުލެޓިކޯ މެޑްރިޑާ ދެކޮޅަށް ކުޅޭ މެޗަށް ނުކުންނާނީ އާ ސްޓައިލަކާއެކު ކަމަށް ރެއާލް މެޑްރިޑްގެ ކޯޗު ޒައިނުއްދީން ޒިދާން ބުނެފި އެވެ.

ޔޫއެފްއާ ޗެމްޕިއަންސް ލީގްގެ ސެމީ ފައިނަލުގައި އަންގާރަ ދުވަހުގެ ރޭ (މިރޭ) އެތުލެޓިކޯއާ ދެކޮޅަށް ނުކުތުމުގެ ކުރިން ނޫސްވެރިންނާއި ވާހަކަ ދައްކަމުން ޒިދާން ބުނީ ރެއާލް އިން މަސައްކަތް ކުރާނީ އާ ކަމެއް ކުރަން ކަމަށާއި އެކަމުގެ ސަބަބުން އެޓީމަށް އިތުރު މޯޓިވޭޝަނެއް ލިބޭނެ ކަމަށެވެ.

ޗެމްޕިއަންސް ލީގުގައި ރެއާލް އިން އެތްލެޓިކޯއާ ދެކޮޅަށް ނުކުންނާނީ އަމިއްލަ ދަނޑުގައެވެ. އެކަމުގެ ފައިދާ މެޑްރިޑަށް ކޮށްފާނެ ކަމަށް ބެލެވެއެވެ.

ނޫސްވެރިންނާއި ވާހަކަ ދައްކަމުން ޒިދާން ބުނީ ތާރީހު ރެއާލް މެޑްރިޑް ކޮޅަށް ބުރަވި ނަމަވެސް އޭގެން ކުރާނެ ފައިދާއެއް ނެތް ކަމަށެވެ.

ޒިދާން ބުނީ ރެއާލް އަކީ އަބަދުވެސް އެންމެ ފަހު ވަގުތު ނަތީޖާ އަނބުރާލާ ޓީމަކަށް ވިޔަސް އެތުލެޓިކޯގެ މެޗުގައި އަންގާރަ ދުވަހުގެ ރޭ ރެއާލްގެ ކުޅުންތެރިން މަސައްކަތް ކުރަން ޖެހޭނީ ދެ ވަނަ ފުރުސަތެއް ނުލިބޭނެ ކަމަށް ބަލައިގެން ކަމަށެވެ.

މީގެ އިތުރުން އެތްލެޓިކޯ މެޑްރިޑާއި ދެކޮޅަށް ކުޅޭ މެޗުގެ، ފޭވަރިޓުންނަކީ ރެއާލް މެޑްރިޑް ނޫންކަމަށް ޒިދާން ބުންޏެވެ.

މި ދެޓީމުގެ ކުރިމަތިލުން ތަކަށް ބަލާއިރު މިދިޔަ ސީޒަނުގައި ރެއާލް އިން ޗެމްޕިއަންސް ލީގުގެ ޗެމްޕިއަންކަން ހޯދީ އެތުލެޓިކޯއާ ބަލިކޮށްގެންނެވެ.

ރެއާލްގެ ކޯޗުކަމާ ޒިދާން ހަވާލުވި ފަހުން ރެއާލް ދަނޑުގައި އެތުލެޓިކޯ އަށް ހޯދިފައިވަނީ އެންމެ މޮޅެކެވެ. ނަމަވެސް އަބަދުވެސް އެތްލެޓިކޯއާ ދެކޮޅަށް ކުޅެން އުދަނގޫ ކަމަށް ޒިދާންވަނީ ބުނެފައެވެ.

"ރެއާލް އަކީ މެޗުގެ ފޭވަރިޓެއް ނޫން، ދެ ޓީމަށްވެސް އޮތީ 50 - 50 ގެ ފުރުސަތެއް، މެޗުގައި ވާނެ ގޮތަކާ މެދު އޭގެ ކުރިން ކަމެއް ކުރާކަށް ނޭންގޭނެ، ޒިދާން ބުންޏެވެ.

މީގެ އިތުރުން ޒިދާން ބުނީ ފާއިތުވި ހަތަރު ފަސްވަރަކަށް އަހަރުތެރޭ، އެތްލެޓިކޯއިން ވަރަށް ބޮޑު ކުރިއެރުމެއް ހޯދާފައިވާ ކަމަށެވެ.

މިރޭގެ މެޗަށް ރެއާލުން ނުކުންނާނީ އަނިޔާގެ ސަބަބުން ގަރެތު ބޭލް ނުލަ އެވެ. އެތްލެޓިކޯ އާއި ރެއާލް ބައްދަލުކުރާ، މި މެޗު ފަށާނީ މިރޭ ރާއްޖެގަޑިން 23:45 ގައެވެ.