ވޭމަންޑޫ އިންޖީނުގޭގައި ހިނގި އަލިފާނުގެ ހާދިސާ ހިނގައިދިޔަ ގޮތް ބަލާނަން: އެމްޑީ ސައީދު

ތ. ވޭމަންޑޫ އިންޖީނުގޭގައި ހިނގި އަލިފާނުގެ ހާދިސާ ހިނގައިދިޔަ ގޮތް ބެލުމަށްޓަކައި ކުރަން ޖެހޭ އެންމެހައި މަސައްކަތްތައް ކުރަމުންދާ ކަމަށް ފެނަކަ ކޯޕްރޭޝަންގެ މެނޭޖިން ޑިރެކްޓަރ އަހުމަދު ސައީދު މުހައްމަދު ވިދާޅުވެއްޖެއެވެ.

އަލިފާނުގެ ހާދިސާއާ ގުޅިގެން އެމްޑީ ސައީދު ވޭމަންޑޫއަށް ވަޑައިގެން ކަރަންޓުގެ ޚިދުމަތް އަލުން ދިނުމަށް ކުރަން ޖެހޭ މަސައްކަތުގައި ދަނީ ހަރަކާތްތެރިވަމުންނެވެ. އެމަސައްކަތުގައި ހުންނަވައި އެމްޑީ ސައީދު ވިދާޅުވީ ބުދަ ދުވަހުގެ މެންދުރުފަހު 2:30 ހާއިރު އިންޖީނުގޭގައި ހިނގާދިޔަ އަލިފާނުގެ ހާދިސާގައި އިންޖީނުގޭގައި ބޭނުން ކުރަމުން އައި ތިން އިންޖީނު ވެސް ބޭނުން ނުކުރެވޭވަރަށް އަނދާފައިވާ ކަމަށެވެ.

މިހާދިސާއާ ގުޅިގެން އެއްވެސް މީހަކަށް އަނިޔާއެއް ނުވާކަން ފާހަގަކުރައްވައި އެމްޑީ ސައީދު ވިދާޅުވީ ރައްޔިތުންގެ ވަރަށް ބޮޑު އެއްބާރުލުމާއެކު އަލިފާން ނިއްވާލެވި ކަރަންޓުގެ ޚިދުމަތްދިނުމަށް ކުރަންޖެހޭ މަސައްކަތްތައް ވަރަށް ބާރަށް ކުރިއަށްދާ ކަމަށެވެ. އަދި ވިދާޅުވީ މިހާދިސާ ހިނގައި ދިޔަ ސަބަބު މިހާތަނަށް ހޯދިފައިނުވާ ކަމަށާއި، އެކަން ހިނގައިދިޔަ ގޮތް ބެލުމަށްޓަކައި ކުރަން ޖެހޭ އެހެންމެހައި މަސައްކަތްތައް ކުރަމުންދާ ކަމަށެވެ.

އެމްޑީ ސައީދު ވިދާޅުވީ މި ދަނޑިވަޅުގައި އާންމުންގެ ފަރާތުން ކެތްތެރިކަމާއި އެއްބާރުލުމަށް އެދޭ ކަމަށެވެ.

ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ދެއްވާ އިރުޝާދާއި ލަފާފުޅުގެ ދަށުން މަސައްކަތްތައް ކުރަމުންދާއިރު، ބުރާސްފަތި ދުވަހުގެ ވަގުތެއްގައި ކަރަންޓުގެ ޚިދުމަތްދޭނެކަމުގެ ޔަގީންކަން އެމްޑީ ސައީދު ދެއްވާފައިވެއެވެ.