ބާސާއާ ދެކޮޅަށް ނޭމާއަށް ނުކުޅެވޭނެ

ބްރެޒިލުގެ ތަރި ނޭމާއަށް ދާދި ފަހުން ލިބުނު އަނިޔާގެ ސަބަބުން ޔުއެފާ ޗެމްޕިއަންސް ލީގުގެ ދެވަނަ ބުރުގައި ބާސެލޯނާއާ ދެކޮޅަށް ކުޅޭ މެޗުގައި އޭނާއަށް ނުކުޅެވޭނެ ކަމަށް ޕީއެސްޖީން ބުނެފިއެވެ.

ޗެމްޕިއަންސް ލީގުގެ ދެވަނަ ބުރުގެ ކުޅުން އަންނަ ހަފުތާގައި ފަށާއިރު، ބާސާގެ ދަނޑުގައި ކުޅޭ ފުރަތަމަ ލެގުގެ މެޗު ކުޅުމަށް ތާވަލުކޮށްފައިވަނީ އަންނަ އަންގާރަ ދުވަހުގެރެއެވެ.

އެ މެޗުގެ ކުރިން ނޭމާއަށް އަނިޔާވީ ބުދަ ދުވަހުގެރޭ ފްރެންޗް ކަޕުގައި ޕީއެސްޖީ ކުޅުނު މެޗުގެ ތެރެއިން ނޭމާއަށް ވަނީ އަނިޔާވެފައެވެ. ރަށުން ބޭރުގައި ކޯން އަތުން 1-0 ގެ ނަތީޖާއަކުން ޕީއެސްޖީ މޮޅުވި މެޗުގެ 60 ވަނަ މިނެޓުގައި ލިބުނު އަނިޔާއަކާ ގުޅިގެން ނޭމާ ވަނީ ބަދަލުކޮށްފައެވެ. އެއަށްފަހު ނޭމާގެ މެޑިކަލް ޓެސްޓުތައް ހެދިއިރު، އެ އަނިޔާއާ ގުޅިގެން ހަތަރު ހަފުތާއަށް އޭނާ ކުޅުމާ ދުރުގައި ހުންނަން ޖެހޭނެ ކަމަށް ޕީއެސްޖީން ވަނީ ބުނެފައެވެ.

އެހެންކަމުން ޗެމްޕިއަންސް ލީގުގެ ދެވަނަ ބުރުގެ ފުރަތަމަ ލެގުގައި ކުރީގެ ކުލަބު ބާސާއާ ދެކޮޅަށް ނޭމާއަށް ނުކުޅެވޭނެއެވެ. އަނިޔާގެ ސަބަބުން ފުރަތަމަ ލެގު ނޭމާއަށް ގެއްލޭއިރު، މި ފަހަރުގެ މެޗުތަކަކީ 2017 ވަނަ އަހަރު ދުނިޔޭގެ ރިކޯޑު އަގެއް ކަމަށްވާ 222 މިލިޔަން ޔޫރޯއަށް ބާސާ ދޫކޮށް ޕީއެސްޖީއަށް ބަދަލުވުމަށްފަހު، ބާސާއާ ދެކޮޅަށް ނޭމާއަށް ކުޅެން ލިބޭ ފުރަތަމަ މެޗުތަކެވެ.

އެކަމަކު ފުރަތަމަ ލެގުގައި ބާސާއާ ދެކޮޅަށް ނޭމާއަށް ނުކުޅެވުނު ނަމަވެސް، ދެވަނަ ލެގުގައި އަންނަ މާޗު މަހުގެ 11 ވަނަ ދުވަހު ޕީއެސްޖީގެ ދަނޑުގައި ކުޅޭ މެޗަށް ނޭމާ ފިޓުވާނެކަމުގެ އުންމީދު އެބައޮތް ކަމަށް އެ ކުލަބުން ވަނީ ބުނެފައެވެ.

ޗެމްޕިއަންސް ލީގުގެ ދެވަނަ ބުރުގައި ޕީއެސްޖީން ބާސާއާ ދެކޮޅަށް ނުކުންނައިރު، މިއީ 2017 ވަނަ އަހަރުގެ މާޗު މަހަށްފަހު މި ދެ ޓީމު ބައްދަލުކުރާނެ ފުރަތަމަ ފަހަރެވެ. އެ ފަހަރުވެސް މި ދެ ޓީމު ބައްދަލުކޮށްފައިވަނީ ޗެމްޕިއަންސް ލީގުގެ ދެވަނަ ބުރުގައެވެ. އެ ފަހަރު ދެވަނަ ބުރުގެ ފުރަތަމަ ލެގުގައި ޕީއެސްޖީ އަތުން 4-0 ން ބަލިވެފައިވަނިކޮށް، ދެވަނަ ލެގުގައި ބާސާ ވަނީ ޕީއެސްޖީ އަތުން 6-1 ން މޮޅުވެ، ކުއާޓާއިން ޖާގާ ހޯދައި، ޗެމްޕިއަންސް ލީގުގެ ތާރީޚުން ޖާގަ ހޯދާފައެވެ. އެއާއެކު ބާސާ ވެފައިވަނީ ފުރަތަމަ ލެގުން 4-0 ން ބަލިވެފައިވަނިކޮށް، ދެވަނަ ލެގުގައި އެ ނަތީޖާ އަނބުރާލި ފުރަތަމަ ޓީމަށެވެ.