އޭއެފްސީ ކަޕްގައި ބަންގްލަދޭޝްގެ ލީގު ޗެމްޕިއަން ޑާކާ އަބާނީއާ ދެކޮޅަށް ކުޅުމަށް ދިވެހި ލީގުގެ ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަން އެގައުމަށް ފުރައިފި އެވެ.

ހޮނިހިރު ދުވަހު ހަވީރު މާޒިޔާ ޓީމު ބަންގްލަދޭޝްއަށް ފުރާފައިވާއިރު، އަބާނީއާ ދެކޮޅަށް އެޓީމު މެޗު ކުޅުމަށް ހަމަޖެހިފައިވަނީ އަންނަ އަންގާރަ ދުވަހު އެވެ. އެގޮތުން މެޗަށް ތައްޔާރުވާން އެޓީމަށް ދެ ދުވަހެއްވަރު ލިބޭނެއެވެ.

މާޒިޔާ ވަނީ އޭއެފްސީ ކަޕަށް ފުރުމުގެ ކުރިން މާލޭ ލީގުގައި ދެ މެޗު ކުޅެފައެވެ. އެގޮތުން އެޓީމު ވަނީ ކުޅުނު ދެ މެޗުވެސް ކާމިޔާބުކޮށްފައެވެ. ފުރަތަމަ މެޗުން އީގަލްސް އަތުން 0-1 ގެ ނަތީޖާއިން މޮޅުވިއިރު، ދެވަނަ މެޗުގައި ކްލަބް ގްރީން ސްޓްރީޓާ ވާދަކޮށް 0-3 ގެ ތަފާތުބޮޑު ނަތީޖާއަކުން ވަނީ މޮޅުވެފައެވެ.

މާޒިޔާއާ ދެކޮޅަށް ކުޅޭ އަބާނީ ޓީމުން ވަނީ ޝައިހް ކަމާލް އިންޓަނޭޝަނަލް ކްލަބް ކަޕްގައި ޓީސީއާ ދެކޮޅަށް ކުޅެފައެވެ. އެ މެޗުން އަބާނީ ބަލިވީ 0-1 ގެ ނަތީޖާއަކުންނެވެ.

މާޒިޔާ އަކީ މި ސީޒަނަށް ދުރާލާ އާ ކޯޗަކާއެކު ބިދޭސީ ކުޅުންތެރިންތަކެއް ގެނެސް ސީޒަނަށް ތައްޔާރުވާން ފެށި ޓީމެކެވެ. އެގޮތުން އެޓީމުން ވަނީ ޕްރީ ސީޒަންގައި ރަހްމަތްތެރިކަމުގެ މެޗުތަކެއް ފުރަތަމަ ޑިވިޝަންގެ ގިނަ ކްލަބްތަކާ ދެކޮޅަށް ކުޅެ މޮޅުވެފައެވެ.

މީގެއިތުރުން އެޓީމުން ވަނީ ސީޒަން ހުޅުވި ޗެރިޓީ މެޗުގައި އެފްއޭކަޕް ޗެމްޕިއަން ކްލަބް ވެލެންސިއާއާ ދެކޮޅަށް ކުޅެ މޮޅުވެފައެވެ.