އައްޑޫ ސިޓީގައި ކޮވިޑް-19ގެ ކޭސްތައް އިތުރުވެ، އަދަދު 55 ށް އަރައިފިއެވެ.

އައްޑޫގައި ކޮވިޑް-19ގެ ކޭސް ތަކެއް އިތުރުވަމުންދާތީ، އައްޑޫ ސީޓީގެ ހާލަތު އޮޅުންފިލުވުމަށް ރާއްޖެޓީވީން ކޮންމެ ދުވަހަކު ހެނދު ގެނެސްދޭ "ކޮވިޑް-19ގެ ނިއުނޯމަލް" ކަވަރޭޖްގައި އައްޑޫ ސިޓީ މޭޔަރު އަބްދުﷲ ޞާދިގު (ސޯބެ)އަށް ގުޅާލުމުން ވިދާޅުވީ، އައްޑޫ ސިޓީގައި ކޮވިޑް-19އަށް ޕޮޒިޓިވް 55 ކޭސް ފެނިފައިވާކަމަށެވެ. އަދި އެއީ ހުޅުމީދޫގައި އެމްޓީސީސީން ހިންގާ ޕްރޮޖެންޓެއްގައި މަސައްކަތްކުރާ ބިދޭސީންގެ ކްލާސްޓަރއަކާއި އޭވިއޭޝަން ކްލާސްޓާރކަމަށެވެ.

ސޯބެ ވިދާޅުވީ، ކޮވިޑް-19ގެ ކޭސްތަކެއް ފެނުމާއެކު އައްޑޫ ސިޓީގައި ހަރުކަށި ފިޔަވަޅުތަކެއް އަޅާފައިވާ ކަމަށާއި، އެފިޔަވަޅުތަކަށް އައްޑޫ ސިޓީގެ ރައްޔިތުން އިހުތިރާމްކޮށް، ކަމާބެހޭ އިދާރާތަކުން އަންގާ އެންގުންތަކަށް ކިޔަމަންވަމުންދާ ކަމަށެވެ. އަދި އައްޑޫ ސިޓީގެ ރައްޔިތުންނަކީ ބަސްއަހާ ކިޔަމަންތެރި ރައްޔިތެއް ދިރިއުޅޭ ސިޓީއެއްކަމަށާއި އެކަން މިހާލަތުގައި ވެސް ރައްޔިތުން ދައްކަމުންދާ ކަމަށެވެ.

އެކަމަށް ޝުކުރުވެރިވާކަން ހާމަ ކުރައްވަމުން ސޯބެ ވިދާޅުވީ، ކުރިއަށް އޮތީ ބަރަކާތްތެރި ރަމަޟާން މަސް ކަމަށްވުމާއެކު، ޖަމާޢަތުގައި ނަމާދުކުރުމާއި، އިތުރަށް އަޅާފައިވާ ފިޔަވަޅުތަކުން ލުއި ލިބިގެން ދިއުމަކީ ރައްޔިތުން ވަރަށް ބޮޑަށް ކުރަމުންދާ އުއްމީދެއްކަމަށެވެ.

ސޯބެ ވިދާޅުވީ، ބަލި ޖެހުނު މީހުންގެ ތެރެއިން ބިދޭސީއަކު އެޑްމިޓްކޮށް މިހާރު ފަރުވާ ދެމުން އަންނަ އިރު މިހާތަނަށް އައްޑޫ ސިޓީން ސީރިއަސް ކޭސްތަކެއް ފެނިފައެއް ނުވާ ކަމަށެވެ. އަދި ޕޮޒިޓިވް އެންމެން ވެސް ތިބީ އައިސޮލޭޝަންގައެވެ.

އައްޑޫ ސީޓީގައި އަޅާފައިވާ ފިޔަވަޅުތަކުގެ ތެރޭގައި، ރޭގަނޑު 8:00 އިން ފަތިހު 4:00 އަށް ކާފިއު ހިންގުމާއި ޖަމާޢަތުގައި ނަމާދުކުރުން މެދުކަނޑާލުމާއި ތައުލީމީ މުއައްސަސާތައް ބަންދުކުރުމާއި އެއް އަވަށުން އަނެއް އަވަށަށް ދިއުން މަނާކުރުމާއި ކެފޭ/ރެސްޓޯރަންޓްތައް އާންމުކޮށް ހުޅުވައިގެން ޚިދުމަތް ދިނުން ހުއްޓާލުން ފަދަ ފިޔަވަޅުތައް ހިމެނެ އެވެ.

އައްޑޫ ސިޓީގައި ގާއިމުކޮށްފައިވާ އައްޑޫ އިމަޖެންސީ އޮޕަރޭޝަން ސެންޓަރުން މައުލޫމާތުދީފައިވާ ގޮތުގައި، އައްޑޫ ސިޓީގައި މިވަގުތު ކޮވިޑް-19ގެ އެކްޓިވް ކޭސްތަކުގެ އަދަދު 55 އަރާފައިވާއިރު، އޭގެތެރެއިން 28 ކޭސްއަކީ އޭވިއޭޝަން ކްލާސްޓަރއިން ޕޮޒިޓިވްވި ކޭސްތަކެކެވެ. އަދި ކްލާސްޓަރއަކީ ހުޅުމީދޫގައި އެމްޓީސީސީން ހިންގަމުންދިޔަ ޕްރޮޖެކްޓެއްގައި، އުޅުނު ބިދޭސީންގެ ތެރެއިން 26 މީހަކު ޕްޒިޓިވްވެފައިވާ ކްލާސްޓަރއެވެ. ދެން އިތުރަށް އައްޑޫ ސިޓީގައި ޕްޒިޓިވްވެފައިވަނީ ހޯމް ކަރަންޓީނުގައި ހުރި މީހެއްކަމަށް އައްޑޫ އިމަޖެންސީ އޮޕަރެޝަން ސެންޓަރުން މައުލޫމާތުދެއެވެ.

މީގެއިތުރުން އެސެންޓަރުން މައުލޫމާތު ދީފައިވާގޮތުގައި، އޭވިއޭޝަން ކްލާސްޓަރއާ ގުޅުންހުރި، ޑައިރެކްޓް ކޮންޓެކްޓްވި 310 މީހަކު ސާމްޕަލް ނަގާފައިވާ ކަމަށް ވެސް އައްޑޫ އިމަޖެންސީ އޮޕަރޭޝަން ސެންޓަރުން މައުލޫމާތުދެއެވެ. އަދި އައްޑޫގައި މިވަގުތު ހޮސްޕިޓަލުގައި ފަރުވާދެމުންދަނީ ކޮވިޑް-19އަށް ޕޮޒިޓިވްވި އެންމެ މީހެއްކަމަށް ވެސް އެސެންޓަރުން މައުލޫމާތު ދެއެވެ.

ހުޅުމީދޫ ބިދޭސީ ކްލާސްޓަރ ގައި މުޅިންވެސް ޕޮޒިޓިވްވެފައިވަނީ އެ ޕްރޮޖެކްޓްގައި އުޅުނު ބިދޭސީންނެވެ. އަދި އޭވިއޭޝަން ކޮމާންޑް ކްލަސްޓަރ އިން ޕޮޒިޓިވް ވެފައިވަނީ ހުސް ދިވެހިންނެވެ.