ސަރުކާރުން އެކި ފަރާތްތަކަށާއި، އެކި ކުންފުނިތަކަށްދޭ ލޯން ގެރެންޓީއަކީ ރޭވިގެން ހިންގާ ބޮޑު ޖަރީމާއެއް ކަމަށް ކުރީގެ ނައިބް ރައީސް ޑރ. މުހައްމަދު ޖަމީލް އަހުމަދު ވިދާޅުވެއްޖެ އެވެ.
ރައީސް އަބްދުﷲ ޔާމީންގެ ފުރަތަމަ ނައިބް ރައީސްގެ ގޮތުގައި ހުންނެވި ޑރ. މުހައްމަދު ޖަމީލް އަހުމަދު ކުރައްވާފައިވާ ޓުވީޓެއްގައި ވިދާޅުވެފައިވަނީ، ގޮތް ނޭނގޭ ގޮތަށް ވަކި ބަޔަކަށް ސަރުކާރުން ދޭ ލޯން ގެރެންޓީއަކީ ރޭވިގެންކުރާ ބޮޑު ޖަރިމާއެއް ކަމަށެވެ. އަދި އެއީ ރައްޔިތުން ބަނޑަށްޖައްސަންކުރާ ކަމެއް ކަމަށް އޭނާ ވިދާޅުވި އެވެ.
ސަރުކާރުން އަންނަނީ އެކިއެކި ޕްރޮޖެކްޓްތައް ހިންގުމަށް އެކިއެކި ފަރާތްތަކަށް ބޮޑެތި އަދަދުތަކުން ގެރެންޓީދެމުންނެވެ. އެގޮތުން ރައީސް އަބްދުﷲ ޔާމީންގެ އަރިސް، މަޝްހޫރި ވިޔަފާރިވެރިޔާ އަހުމަދު ސިޔާމް (ސަން ސިޔާމް) ނަންގަވާ 200 މިލިއަން ޑޮލަރު (ތިން ބިލިއަން ރުފިޔާ)ގެ ލޯނަކަށް ދިވެހި ސަރުކާރުން ގެރެންޓީ ދިނުމަށް ހުރިހާ އިންތިޒާމްތަކެއް ހަމަޖައްސާފައިވާކަން ރާއްޖެއެމްވީ އަށް ވަނީ ކަށަވަރުވެފަ އެވެ.
މީގެކުރިން ސަރުކާރުން ވަނީ ތުރުކީގެ ކުންފުންޏަކަށްވެސް ބޮޑު އަދަދުން ލޯނު ގެރެންޓީއެއް ދީފަ އެވެ. އޭގެއިތުރުން 200 މިލިއަން ޑޮލަރުގެ ސޮވެރިންގ ބޮންޑު ވިއްކުމަށް ސަރުކާރުން ވަނީ ނިންމާފަ އެވެ.
