އއ. އުކުޅަހުން އަނެއްކާވެސް ފަތުރުވެރިޔަކު ކޮވިޑަށް ޕޮޒިޓިވްވެއްޖެ
7 ފެބުރުއަރީ 2021 | އާދީއްތަ 07:57ޖަނަވަރީ އެއްވަނަ ދުވަހު ވެސް ވަނީ އުކުޅަހުން ފަތުރުވެރިންތަކެއް ކޮވިޑަށް ޕޮޒިޓިވްވެފައި
އއ އުކުޅަސް
އއ.އުކުޅަހުން އަނެއްކާވެސް ފަތުރުވެރިޔަކު ކޮވިޑަށް ޕޮޒިޓިވްވެއްޖެއެވެ.
އުކުޅަހު ކައުންސިލްގެ ރައީސް ޝައުކަތު އިބްރާހިމް "ރާއްޖެ އެމްވީ" އަށް ވިދާޅުވީ ޕޮޒިޓިވްވީ ރޯމޭނިޔާއަށް ނިސްބަތްވާ އުމުރުން 52 އަހަރުގެ ފަތުރުވެރިއެކެވެ. މި ފަތުރުވެރިއާއަކީ، މީގެ ދެ ހަފުތާއެއްހާ ދުވަސްކުރިން އެ ރަށަށް ދިޔަ މީހެއް ކަމަށް ބެލެވޭކަމަށް ޝައުކަތު ވިދާޅުވި އެވެ. ޝައުކަތު ވިދާޅުވީ ފަތުރުވެރިޔާ ޕޮޒިޓިވްވިކަން އެނގުނީ ޗުއްޓީ ހޭދަކުރުމަށް ފަހު އެނބުރި ގައުމަށްދިއުމުގެ ކުރިން ހެދި ކޮވިޑް-19 ޓެސްޓުން ކަމަށެވެ.
މި ކޭސްއާ ގުޅިގެން ކޮންޓެކްޓް ޓްރޭސިންގެ މަސައްކަތް މިހަރު ދަނީ ކުރަމުންނެވެ. މި ފަތުރުވެރިއާ ރަށު ތެރެއިން މީހަކާ ކޮންޓެކްޓް ވެފައިނުވާކަމަށް ކައުންސިލްގެ ރައީސް ވިދާޅުވިއެވެ.
އއ. އުކުޅަހުން އަނެއްކާވެސް ފަތުރުވެރިޔަކު ކޮވިޑަށް ޕޮޒިޓިވްވެފައިވާއިރު، މީގެ ކުރިން އެކި ފަހަރުމަތިން އެ ރަށުން ފަތުރުވެރިންތަކެއް ވަނީ ކޮވިޑަށް ޕޮޒިޓިވްވެފައެވެ. ފަހުން ޕޮޒިޓިވްވި ފަތުރުވެރިޔާއާއެކު އެރަށުން ބައްޔަށް ޕޮޒިޓިވްވި ފަތުރުވެރިންގެ އަދަދު ވަނީ 8ށް އަރާފައެވެ. އުކުޅަހުން އެންމެފަހުން ބައްޔަށް މީހަކު ޕޮޒިޓިވްވެފައި ވަނީ ޖަނަވަރީމަހުގެ އެއްވަނަ ދުވަހުއެވެ.
އއ. އުކުޅަހަކީ ލޯކަލް ޓުއަރިޒަމް ފުޅާދާއިރާއެއްގައިކޮށް، ގިނަ ގެސްޓް ހައުސްތަކެއް ހިންގަމުންދާ ރަށެެކެވެ. ކޮވިޑް19ގެ ސަބަބުން ރާއްޖޭގެ ބޯޑަރު ބަންދުކޮށްފައި އޮތުމަށްފަހު ފަތުރުވެރިކަން އަލުން ހުޅުވައިލާފައިވަނީ މިދިޔަ އަހަރުގެ ޖުލައި މަހުގެ 15 ވަނަދުވަހުން ފެށިގެންނެވެ. އަދި ގެސްޓްހައުސްތައް ހުޅުވުމުގެ ހުއްދަ ދީފައިވަނީ އޮގަސްޓްމަހުގެ 15 ދުވަހުއެވެ. މި ހުއްދަތައް ދޭން ނިންމާފައިވަނީ ރައްކާތެރިކަމުގެ ގިނަ ފިޔަވަޅުތަކަކާ އެކުގައެވެ. އުސޫލުގައި ބުނެފައިވާގޮތުން ގެސްޓްހައުސްގެ ޚިދުމަތްފެށުމުގެ ހުއްދަ ދެނީ ކައުންސިލްގެ ވެސް ހުއްދައާ އެކުގައެވެ. އަދި މި ޚިދުމަތް ފެށުމަށް ހުއްދަ ދޭނީ، ރަށުގައި ފްލޫ ކުލިނިކާއި، ކަރަންޓީން ފެސިލިޓީ އާއި، އަދި ބައްޔަށް މީހަކު ޕޮސިޓިވް ވެއްޖެނަމަ އައިސޮލޭޓް ކުރެވޭނެ ފެސިލިޓީތައް ޤާއިމުވެފައި ހުންނަ ރަށްތަކުގައި އެކަންޏެވެ.
