ދ. ހުޅުދެލީ ސްކޫލްގެ ހިދުމަތުގެ ފެންވަރު 15 ދުވަސްތެރޭގައި އެޑިއުކޭޝަން މިނިސްޓްރީން ރަގަނޅު ނުކޮށްފި ނަމަ އަނެއްކާވެސް އިހުތިޖާޖު ކުރާނެ ކަމަށް ބެލެނިވެރިން ބުނެފިއެވެ.
ހުޅުދެލީ ސްކޫލްގެ ހިދުމަތާއި މެދު ބެލެނިވެރިން ހިންހަމަނުޖެހުމާއި ގުޅިގެން ބުދަ ދުވަހު ކުރި އިހްތިޖާޖާއި ގުޅޭގޮތުން އެރަށު ބެލެނިވެރިއަކު ބުނީ މުޒާހަރާ ކުރުން ހުއްޓާލީ ކަމާބެހޭ ފަރާތްތަކަށް އެކަންކަން ރަނގަޅު ކުރުމަށް ފުރުސަތު ދިނުމުގެ ގޮތުން ކަމަށެވެ.
އޭނާ ބުނީ މުޒާހަރާ ކުރަމުންދަނިކޮށް ދ. ކުޑަހުވަދޫ ސްކޫލްގެ ހެޑްމާސްޓަރު ހުޅުދެއްޔަށް ވަޑައިގެން މުޒާހަރާ ކުރި ރައްޔިތުންނާ ބައްދަލު ކުރެއްވި ކަމަށެވެ. އަދި ބެލެނެވެރިންގެ ކަންބޮޑުވުންތައް ކަމާބެހޭ ފަރާތްތަކަށް ގެންގޮސް އެކަންކަން ރަނގަޅު ކުރުމަށް މަސައްކަތް ކުރައްވާނެ ކަމަށްވެސް ވިދާލުވެފައިވާ ކަމަށެވެ.
ހުޅުދެލި ސްކޫލު ބެލެނިވެރިން އިހްތިޖާޖު ކުރަނީ ސްކޫލުގައި ކުދިންނަށް ކިޔެވޭނެ ރަގަޅު މާހައުލެއްގެ ގާއިމް ކުރެވިފައި ނެތުމުން ކަމަށެވެ. އެގޮތުން ސްކޫލުތައް ހުޅުވުނުތާ އެތަށް ދުވެހެއް ވެފައިވާ އިރު އަދިވެސް ސްކޫލު ކުދިންގެ ޓެކްސްޓް ފޮތް ހަމަނުވާ ކަމަށް އެފަރާތުން ބުނެ އެވެ. އަދި ސްކޫލުގައި ޓީޗަރުން ހަމަނުވާ ކަމަށާއި ފާހަނާތައް ހަލާކު ވެފައިވާ ކަމަށާއި ސްކޫލުގައި ރަގަޅު ޕްރިންސިޕަލެއް ނެތް ކަންވެސް ބެލެނިވެރިޔާ ވަނީ ފާހަގަކޮށްފަ އެވެ.
ބުދަ ދުވަހުގެ ދުވަހުގެ ހެނދުނު ކުރި އިހްތިޖާޖު ހުއްޓާލާނީ މިކަންކަމަށް ހައްލެއް ހޯދާދޭނެ ކަމުގެ ޔަގީންކަން ދިނުމުން ކަމަށް ބެލެނެވެރިން ދިޔައީ ބުނަމުންނެވެ. ބުދަ ދުވަހު އެ ސްކޫލަށް އެއްވެސް ކުއްޖަކު ކިޔަވަން ފޮނުވާފައިވާ ނުވާ ކަމަށް ވެސް މައުލޫމާތު ވަނީ ލިބިފަ އެވެ.
މިކަމާ ގުޅޭ ގޮތުން މައުލޫމާތު ދެއްވަމުން އެރަށު ސްކޫލުގެ ޓީޗަރަކު ވިދާޅުވެފައި ވަނީ ބުދަ ދުވަހުގެ ހެނދުނު ބެލެނިވެރިން އިހްތިޖާޖު ކުރަމުންދިއަ އިރު ސްކޫލުގެ ގޭޓް ހުޅުވީވެސް އެއަތޮޅު ކުޑަހުވަދޫ ފުލުހުން އައިސް ކަމަށެވެ. މިކަމާ ގުޅޭ ގޮތުން އެޑިއުކޭޝަން މިނިސްޓްރީގެ ބަހެއް ވަނީ ލިބޭ ގޮތް ނުވެފަ އެވެ.
ދ.ހުޅުދެލިއަކީ ގާތްގަނޑަކަށް 900 މީހުންގެ އާބާދީއެއް އޮންނަ ރަށެކެވެ.
