މި ސީޒަނުގައި ކުލަބު ވެލެންސިއާގެ އަމާޒަކީ މުބާރާތަކުން ތައްޓެއް ހޯދުން ކަމަށް އެ ޓީމުގެ އިތުބާރު ފޯވާޑް އަލީ ފާސިރު (ސެންޓޭ) ބުނެފިއެވެ.
މިދިޔަ ސީޒަނުގެ ދެވަނަ ޑިވިޝަނުގެ ޗެމްޕިއަންކަން ހޯދައި، ފުރަތަމަ ޑިވިޝަނުން އަލުން ޖާގަ ހޯދި ވެލެންސިއާއިން ޕްރީ-ސީޒަން ފެށީ އާދައިގެ ސްކޮޑަކާއެކުގައެވެ. ސީޒަނަށް ތައްޔާރުވުމަށް ފަރިތަކުރުންތައް ފަށަމުން އެ ޓީމުގެ ކޯޗު މުޙައްމަދު އާތިފް (އާތި) ބުނީ ޓީމުގެ އަމާޒަކީ ފުރަތަމަ ޑިވިޝަނުގައި އޮވެ ރަނގަޅު ޓީމެއް ބިނާކުރުން ކަމަށެވެ.
އެކަމަކު ޕްރީ-ސީޒަން ނިމުމާ ގާތްވެފައި ވަނިކޮށް ވެލެންސިއާއިން ވަނީ މަޝްހޫރު ގިނަ ކުޅުންތެރިންތަކެއްގެ ސޮއި ހޯދައިފައެވެ. އޭގެ ތެރޭގައި އިތުބާރު ފޯވާޑް އަލީ އަޝްފާގު (ދަގަނޑޭ) އާއި، ގައުމީ ފުޓްބޯޅަ ޓީމުގެ ކެޕްޓަން އަކްރަމް އަބްދުލް ޣަނީ (އަކޫ) އާއި ގައުމީ ޓީމުގެ ގޯލްކީޕަރު މުޙައްމަދު ފައިސަލުގެ އިތުރުން ސެންޓޭގެ ސޮއިވެސް ވެލެންސިއާއިން ވަނީ ހޯދާފައެވެ.
ދިރާގު ދިވެހި ޕްރިމިއާ ލީގުގައި އަންގާރަ ދުވަހު ހަވީރު ޓީސީ ސްޕޯޓްސް ކުލަބު އަތުން 2-0 ގެ ނަތީޖާއަކުން މޮޅުވި މެޗަށްފަހު އޮތް ނޫސްވެރިންގެ ބައްދަލުވުމުގައި ވާހަކަދައްކަމުން ސެންޓޭ ބުނީ ކުރިއަށް ހުރި މެޗުތަކުން ރަނގަޅު ކުޅުމެއް ދައްކައި، ވެލެންސިއާގެ އަމާޒަކީ ތައްޓަކާއެކު ސީޒަން ނިންމާލުން ކަމަށެވެ. އަދި މަޝްހޫރު ގިނަ ކުޅުންތެރިން ވެލެންސިއާގައި ތިބުމަކީ ތަށި ހޯދުމަށް އޮތް ޕްރެޝަރެއް ނޫން ކަމަށާއި، ވެލެންސިއާގައި ތިބި ތަޖުރިބާކާރު ކުޅުންތެރިންނަކީ ކުރިންވެސް މި ތަޖުރިބާ ކޮށްފައި ތިބި ކުޅުންތެރިން ކަމަށްވެސް ސެންޓޭ ވަނީ ބުނެފައެވެ.
ސެންޓޭ މިހެން ބުނި ނަމަވެސް، މީގެ ކުރިން އެ ޓީމުގެ ކޯޗު އާތީ ބުނެފައިވަނީ ފަހުން އެ ޓީމާ ގުޅުނު ކުޅުންތެރިންނާއެކު ރަނގަޅު ޕްރީ-ސީޒަނެއް ފުރިހަަމަނުކުރެވުމަކީ ދިމާވާ ގޮންޖެހުމެއް ކަމަށެވެ. އަދި ލީގު ކާމިޔާބުކުރުމަކީ ވެލެންސިއާގެ އަމާޒެއް ނޫން ކަމަށްވެސް އާތީ މީގެ ކުރިން ވަނީ ބުނެފައެވެ.
ލީގުގައި އަންގާރަ ދުވަހުގެ ހަވީރު ޓީސީ އަތުން ހޯދި މޮޅާއެކު ވެލެންސިއާ ވަނީ ލީގު ތާވަލުގެ ދެވަނައަށް ކުރިއަށް ޖެހިލާފައެވެ. އެގޮތުން ވެލެންސިއާއަށް ކުޅުނު ނުވަ މެޗުން 15 ޕޮއިންޓް ލިބިފައިވާއިރު، އެއްވަނައިގައި އޮތް އެންމެ ފަހުގެ ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަނަށް ނުވަ މެޗުން ވަނީ 21 ޕޮއިންޓް ލިބިފައެވެ.
