"އަޅުގަނޑުވެސް ޖަހައިފިން، އަޅުގަނޑަށް ޔަޤީންކަން ލިބިގެން ވެކްސިން ޖެހީ" މިއީ ކުޅުދުއްފުށި ސިޓީން ވެކްސިން ޖެހި 30 މީހުންގެ ތެރޭގައި ހިމެނޭ އާންމު ބަލިތަކުގެ ޑޮކްޓަރު މުހައްމަދު ފައިސަލްއާ ސުވާލު ކޮށްލުމުން ދެއްވި ޖަވާބެވެ. ޑރ. ފައިސަލް ދެއްވި މި ޖަވާބުގެ ސަބަބުން ކޮންމެވެސް ވަރަކަށް ވެކްސިންގެ ރައްކާތެރިކަމާ ދޭތެރޭގައި ޝައްކު އުފެދިފައިވާ މީހުންގެ ހިތްތަކަށް ހިތްހަމަޖެހުމެއް ލިބިގެން ދިޔަކަމަށް ހީކުރަމެވެ.

އިންޑިއާގެ ސެރަމް އިންސްޓިއުޓުން އުފެއްދި ކޮވިޝީލްޑް ވެކްސިން ޖަހަން ބައެއް މީހުން ފަސް ޖެހެއެވެ. އެއީ ވެކްސިނާއި ގުޅޭގޮތުން އެކި ޕްލެޓްފޯމްތަކުގައި ފަތުރަމުންދާ މައުލޫމާތުތަކުގެ ސަބަބުންނެވެ. މި ވެކްސިނަކީ އިންސާނުންގެ ގަޔަށް ޖެހުމަށް އެންމެ ރައްކާތެރި ވެކްސިން ނޫންކަމަށް އަޑުން އަޑު ނަގާ ބައެއް މީހުން ހަޅޭލަވަމުންދެއެވެ. ސަބަބެއްކަމަށް މި މީހުން ބުނަނީ ވެކްސިނަކީ ދުނިޔޭގެ ސިއްހަތު ޖަމިއްޔާއިން ރަސްމީ ސިފައެއްގެ ހުއްދަ ދީފައިނުވާ ވެކްސިނަކަށް ވުމުންނެވެ. އަދި މި ވެކްސިނަށް ހުއްދަ ނުލިބުނަމަވެސް ދުނިޔޭގެ ސިއްހަތު ޖަމިއްޔާއިން ވަނީ ކޮވިޝީލްޑް ވެކްސިނަކީ ރައްކާތެރި ވެކްސިނެއްކަމަށް ބުނެފައެވެ. ކޮންމެ ޤައުމަކުން ވެކްސިން އުފެއްދި ކަމުގައިވީ ނަމަވެސް އެ ޤައުމުތަކުން އަމަލު ކުރަން ޖެހޭ ވަކި މިންގަނޑުތަކެއް ހުރެއެވެ. ކްލިނިކަލް ޓްރައިލްގެ ތިން މަރުހަލާ ކަނޑައްތު ކުރުމަށްފަހު ނޫނީ ޤައުމުތަކުން އެ ވެކްސިން އިމަރޖެންސީކޮށް ބޭނުންކުރުމުގެ ހުއްދައެއް ނުދެއެވެ. މި ތިން މަރުހަލާތަކުގެ ތެރޭގައި އެންމެ ފުރަތަމަ މަރުހަލާގައި ވެކްސިންގެ ރައްކާތެރިކަން ކަށަވަރު ކުރެވިގެންދެއެވެ. ދެވަނަ މަރުހަލާގައި ވެކްސިންގެ ރައްކާތެރިކަން އިތުރަށް ކަށަވަރު ކުރެވިގެންދެއެވެ. އަދި ތިން ވަނަ މަރުހަލާގައި ވެކްސިންގެ އަސަރު ކުރާ މިންވަރު ބެލިގެންދެއެވެ.

ޑރ. ފައިސަލް ވިދާޅުވީ އިންޑިއާގެ ސެރަމް އިންސްޓިއުޓުން އުފެއްދި ކޮވިޝީލްޑް ވެކްސިނާއިބެހޭ ގޮތުން ސޯޝަލް މީޑިއާގައި ބައެއް ފަރާތްތަކުން ސައްހަ ނޫން މައުލޫމާތުތައް ފަތުރަމުންދާ ކަމަށެވެ. އަދި ޑޮކްޓަރެއްގެ ހަސިއްޔަތުން މި ވެކްސިން ޖަހާފައިވަނީ ރައްކާތެރިކަން ކަށަަވަރުކޮށް ޔަޤީންކަން ލިބުމުން ކަމަށެވެ.

ވެކްސިން ޖެހުމަށްފަހު އޮބްޒަވޭޝަންގައި 15 މިނެޓާއި 20 މިނެޓާއި ދޭތެރޭ މަޑުކުރެއްވިކަން ފާހަގަކުރައްވާ ޑރ. ފައިސަލް ވިދާޅުވީ އެއްވެސް ކަހަަލަ ސައިޑް އިފެކްޓެއް ފެނިފައިނުވާ ކަމަށެވެ. ކުޅުދުއްފުށި ސިޓީން އެންމެ ފުރަތަމަ ވެކްސިން ޖަހާފައިވަނީ ހޮސްޕިޓަލްގެ މެނޭޖަރ އަހްމަދު ދާއޫދެވެ. ދާއޫދު ވިދާޅުވެފައިވަނީ ވެކްސިން ޖެހުމަށްފަހު ވެސް އޭނާގެ ހާލު ރަނގަޅު ކަމަށެވެ. އަދި ވެކްސިން ޖެހި މީހުންގެ ފަރާތުންވެސް ވެކްސިނާއިގުޅޭ ގޮތުން އެއްވެސް ކަހަލަ ނެގެޓިވް ފީޑްބެކެއް ލިބިފައިނުވާ ކަމަށެވެ.

ކުޅުދުއްފުށި ސިޓީގައި ހޯމަ ދުވަހު ވެކްސިން ޖަހާފައިވަނީ ސިއްހީ މަސައްކަތްތެރިންނަށެވެ. އަދި ކުރިއަތް އޮތް ދުވަސްތަކުގައި އާންމުންނަށްވެސް ވެކްސިން ދިނުމުގެ ކަންތައްތައް ފެށިގެންދާނެ ކަމަށާއި އާންމުން ވެކްސިނަށް ހޭލުންތެރި ކުރުވުމަށްޓަކައި ޕްރޮގްރާމްތައް ހިންގުމަށް ހަމަޖެހިފައިވާކަމަށް ދާއޫދު ވިދާޅުވިއެވެ.

ކުޅުދުއްފުށީގައި ސިއްހީ ހުރިހާ މަސައްކަތްތެރިންނަށް ވެކްސިން ޖެހި އެސިސްޓަންޓް ކޮމިއުނިޓީ ހެލްތް އޮފިސަރ ހަދީޖާ ހަސަން ވިދާޅުވީ ޑޮކްޓަރަކާއި ނަރުހެއްގެ އޮބްޒަވޭޝަންގައި ވެކްސިން ޖެހި މީހުން ބޭތިއްބިއިރު އެއްވެސް ކަހަަލަ ސައިޑް އިފެކްޓެއް ފެނިގެން ރިޕޯޓްކޮށްފައިނުވާ ކަމަށެވެ. އަދި ވެކްސިން ދިނުމުގެ ޕްރޮގްރާމް ކާމިޔާބު ކަމާއެކީގައި ނިންމާލެވުނު ކަމަށެވެ.

ވެކްސިން ޖެހި ސިއްހީ މަސައްކަތްތެރިންގެ ތެރޭގައި ދިވެހިންނާއި ބިދޭސީންވެސް ހިމެނެއެވެ. މި އެންމެނާ ވާހަކަ ދައްކާލަން ލިބުނު ފުރުސަތުގައިވެސް ތަކުރާރުކޮށް ފާހަގަކުރައްވާފައިވަނީ އެއް ކަމެކެވެ. އެއީ ވެކްސިން ޖެހުމަށްފަހުވެސް އެއްވެސް ސައިޑް އިފެކްޓެއް އަދި ނުފެންނަ ވާހަކައެވެ. އަދި ވެކްސިން ޖެހިއިރު އެހާ ބޮޑަށް ތަދު އިހުސާސް ނުވާ ކަމަށްވެސް އެބޭފުޅުން ފާހަގަކުރެއްވިއެވެ.

ސިއްހީ މަސައްކަތްތެރިންނަށް ވެކްސިން ޖަހާފައިވާއިރު އެބޭފުޅުންގެ އުންމީދަކީ އާންމު ރައްޔިތުންނަށްވެސް މި ވެކްސިން ދެވި، މި ވަބާއިން ރާއްޖެ އަރައިގަންނަ ދުވަހެއް ފެނިގެން ދިޔުމެވެ.