ކޮވިޑުގެ ރެކޯޑު އިންޑިޔާއަށް: މުޅި ގައުމު ރޮނީ އޮކްސިޖަން ނުލިބިގެން

އެނދުތައް ފުރި އެއް އެނދުގައި ދެމީހުން ބައިތިއްބަން ޖެހިއްޖެއެވެ. މައިންނާއި ބަފައިން ޕޮޒިޓިވްވެ ކުދިންނަށް އަޅާނުލެވި ދޫކޮށްލާން ޖެހިއްޖެއެވެ.

އޮކްސިޖަން ނުލިބި އެތައް ބައެއްގެ އޮކްސިޖަން މާސްކުތައް ނައްޓާލައިފިއެވެ. އެއަށް އެދިއެދި ތިބި އެތައް ބަޔަކު ދުނިޔެއާ ވަކިވެއްޖެއެވެ. މިއީ މިއަދު އިންޑިޔާގެ ހާލަތެވެ. ބަލީގެ ދެވަނަ ރާޅެއް އައިސް ބިންދާލުމާއެކު މުޅި ގައުމު ކުޑަކަކޫ މައްޗަށް ތިރިކޮށްލައިފިއެވެ.

އިންޑިޔާއިން ފާއިތުވި 24 ގަޑިއިރު ތެރޭގައި 346,786 މީހުން ކޮވިޑަށް ޕޮޒިޓިވް ވެފައިވާ ކަމަށް އެގައުމުގެ ހެލްތް މިނިސްޓްރީން ވަނީ ހާމަކޮށްފައެވެ. މިއާއެކު މުޅި ދުނިޔެއިން ވެސް 24 ގަޑިއިރުތެރޭގައި އެންމެ ގިނަ އަދަދެއްގެ ބަޔަކު ކޮވިޑަށް ޕޮޒިޓިވްވި ގައުމަށް އިންޑިޔާ ވަނީ ވެފައެވެ. ދުނިޔޭގައި މިވަގުތު ކޮވިޑްގެ ހާލަތު އެންމެ ގޯސްވެފައިވާ އަނެއް ދެ ގައުމު ކަމުގައިވާ ބްރެޒިލާއި އެމެރިކާގައި ދުވާލެއްގެ މައްޗަށް ފެންނަ ކޭސްތަކަށްވުރެ އިންޑިޔާގައި ފެންނަ ކޭސްތައް ދެގުނަ އިތުރެވެ.

އިންޑިއާއަށް އައި ކޮވިޑްގެ މި އައު ރާޅާއެކު ހޮސްޕިޓަލްތަކަށް ވަނީ ބާރު ބޮޑުވެފައެވެ. އެނދުގެ ދަތިކަމާއި އޮކްސިޖަނުގެ ދަތިކަމާ ވަނީ ކުރިމަތިލާން ޖެހިފައެވެ. ބައްޔަށް ޕޮޒިޓިވްވާ މީހުންގެ އަދަދު ކޮންޓްރޯލް ނުކުރެވޭނަމަ ބަލީގައި ފަރުވާ ނުލިބި ގިނަ މީހުން މަރުވެދާނެ ކަމުގެ ބިރު ސިއްހީ މާހިރުން އަންނަނީ ފާޅުކުރަމުންނެވެ.

މީގެ އިތުރުން ހޮސްޕިޓަލްތައް ފުރެމުން އަންނާތީ ބައެއް މީހުން ގޭގައި ކަރަންޓީނު ވުމަށް ފޮނުވާލަން ޖެހޭ ކަމަށް ސިއްހަތާއި ބެހޭ ވުޒާރާއިން ބުނެއެވެ. ދިއްލީގެ ގިނަ ހޮސްޕިޓަލުތަކަށް ދަތިތަކާ ކުރިމަތިލާން ޖެހިފައިވާއިރު، އިމަރޖެންސީކޮށް ވަސީލަތްތައް ބޭނުންވާކަން އެތަންތަނުން ވަނީ ހާމަކޮށްފައެވެ. މިކަމަށް އެދި ދިއްލީގެ ޗީފް މިނިސްޓަރ އަރްވިންދް ކެޖްރަވާލް ވަނީ ބޮޑުވަޒީރުގެ އެހީއަށް ވެސް އެދިފައެވެ. އޮކްސިޖަން ސިލިންޑަރު ނުއަގުގައި ވިއްކަމުން ދާއިރު ހޮނިހިރު ދުވަހުވެސް ދިއްލީގެ ފުލުހުން ވަނީ 48 ސިލިންޑަރާއެކު މީހަކު ހައްޔަރުކޮށްފައެވެ. މީގެ ދެ ދުވަހެއް ކުރިން ކާންޕޫރުގެ ފުލުހުންވެސް ވަނީ މިފަދަ އޮޕަރޭޝަނެއްގައި 51 ސިލިންޑަރު އަތުލައިގެންފައެވެ.

ދިއްލީއާއި އުއްތަރުޕްރަދޭޝްގެ އިތުރުން ހަރިޔާނާ ފަދަ ސްޓޭޓުތަކުގައި އޮކްސިޖަން ލިބުމުގެ ދަތިކަން ހުރުމާއެކު އޮކްސިޖަނަށް އޮތް ޑިމާންޑް ވަނީ ބޮޑުތަނުން އިތުރުވެފައެވެ. ބައެއް ހޮސްޕިޓަލުތަކުގައި އޮކްސިޖަން ކެޕޭސިޓީ ނެތުމުގެ ސަބަބުން ކޮވިޑް-19 ގެ ބަލި މީހުން އެޑްމިޓް ކުރުމަށްވެސް ދެކޮޅު ހަަދަމުންދާކަމަށް ރިޕޯޓުތައް ބުނެއެވެ. ދިއްލީގެ ބަޓްރާ ހޮސްޕިޓަލުން ވެސް ހޮނިހިރު ދުވަހު އޮކްސިޖަން ހުސްވެ، 150ށް ވުރެ ގިނަ ބަލި މީހުންގެ އޮކްސިޖަން ވަނީ ކަނޑާލާފައެވެ.

އިންޑިޔާގެ ހާލަތު ކޮންޓްރޯލު ނުކުރެވޭ ވަރަށް ދަށަށް ގޮސްފައިވާއިރު އެގައުމުން ކޮވިޑަށް ޕޮޒިޓިވްވި މީހުންގެ ޖުމްލަ އަދަދު ވަނީ 16.6 މިލިއަނަށް އަރާފައެވެ. ބަލީގައި މަރުވި މީހުންގެ އަދަދު ވަނީ 189,544ށް އަރާފައެވެ. ބަލި ފެތުރެމުން އަންނަ ހަލުވިމިނުގެ ސަބަބުން ގިނަ ބަޔަކު ކަންބޮޑުވުން ފާޅު ކުރަމުންދާއިރު ވައިރަސް ފެތުރުން ކޮންޓްރޯލް ކުރުން އުނދަގޫ ކަމެއްގެ ގޮތުގައި ދުނިޔޭގެ ސިއްހަތު ޖަމިއްޔާގެ އިމަރޖެންސީސް ޑިރެކްޓަރ މައިކް ރާޔަން ވަނީ ސިފަ ކުރައްވާފައެވެ.