ހައިޑްރޯގްރެފިކް ސަރވޭ ދަތުރެއްގައި އިންޑިއަން ނޭވީ ޝިޕް "ދަރްޝަކް" ރާއްޖެ އަތުވެއްޖެއެވެ.

އެމް.އެން.ޑީ.އެފް. އާއި އިންޑިއާގެ ނޭޝަނަލް ހައިޑްރޯގްރެފިކް އޮފީހާ ގުޅިގެން ފެށުމަށް ރޭވިފައިވާ، ރާއްޖޭގެ ނެވިގޭޝަން ޗާޓު އަޕްގްރޭޑްކުރުމުގެ މަސައްކަތްކުރުމަށް އިންޑިއަން ނޭވީ ޝިޕް "ދަރްޝަކް"، ރާއްޖެ އައިސްފައިވަނީ އާދިއްތަ ދުވަހުއެވެ.

އިންޑިއަން ނޭވީ ޝިޕް "ދަރްޝަކް" ރާއްޖެއަށް ކުރަމުންދާ ސަރވޭ ދަތުރުގައި، 31 ޖެނުއަރީ އިން ފެށިގެން އަންނަ މާރިޗް 15 ވަނަ ދުވަހުގެ ނިޔަލަށް ރާއްޖޭގައި ހަރަކާތްތެރިވާނެއެވެ. ދިވެހިރާއްޖޭގެ ދަތުރުވެރިންގެ ސަލާމަތާއި ރައްކާތެރިކަން ކަށަވަރުކޮށްދިނުމަށް ޓަކައި ކުރަން ރާވާފައިވާ މި މަސައްކަތަކީ، ކަމާ ގުޅުންހުރި ރާއްޖޭގެ އިދާރާތަކުގެ ފުރިހަމަ ބައިވެރިވުމާ އެކު މި މުއްދަތުގައި ކުރިއަށް ގެންދިޔުމަށް ހަމަޖެހިފައިވާ ސަރވޭއެއް ކަމަށް އެމް.އެން.ޑީ.އެފް.އިން ބުންޏެވެ.

މި ސަރވޭއާ ގުޅޭގޮތުން މަޢުލޫމާތު ދިނުމަށް ބޭއްވި ނޫސްވެރިންގެ ބައްދަލުވުމުގައި އެމް.އެން.ޑީ.އެފް.ގެ ކޯސްޓްގާޑުގެ ކޮމާންޑަރ ކާނަލް މުހައްމަދު ސަލީމް ވިދާޅުވީ މި ސަރވޭގައި މިލިޓަރީ އެހެން އޮޕަރޭޝަންސްތަކަށް ބޭނުންވާ މަޢުލޫމާތު ނުހިމެނޭނެ ކަމަށެވެ. އަދި އިންޓަރނޭޝަން ހައިޑްރޯގްރެފިކް އޮފީހުން މި ރީޖަންގެ ކޯޑިނޭޓަރެއްގެ ގޮތުގައި ކަނޑައަޅާފައިވަނީ އިންޑިއާ ކަމަށާ، މިފަދަ ސަރވޭތައް ދުނިޔޭގައި ކުރަނީ ވެސް އެ ރީޖަނެއްގައި އެންމެ ކުރިއަރާފައިވާ ޤައުމުތައް މެދުވެރިކޮށް ކަމަށް މުހައްމަދު ސަލީމް ވިދާޅުވިއެވެ.

މި ސަރވޭގެ ސަބަބުން ރާއްޖޭގެ ސަލާމަތާއި ރައްކާތެރިކަމަށް އެއްވެސް ކަހަލަ ނުރައްކަލެއް ކުރިމަތިވެދާނެތޯ ނޫސްވެރިއަކު ސުވާލު ކުރެއްވުމުން އެމްއެންޑީއެފްގެ ކޯސްޓްގާޑް ޑިރެކްޓަރ ލެފްޓިނެންޓް ކާނަލް އަހުމަދު ފާތިހު ވިދާޅުވީ މި ސަރވޭ ކުރިއަށްދާނީ ރާއްޖޭގެ ސަލާމަތާއި ރައްކާތެރިކަމުގެ އެއްވެސް މަޢުލޫމާތެއް ލިބޭ ގޮތަކަށް ނޫން ކަމަށެވެ.

2007 ވަނަ އަހަރުން ފެށިގެން އިންޑިއާގެ ނޭޝަނަލް ހައިޑްރޯގްރެފިކް އޮފީހާ ގުޅިގެން ރާއްޖޭގައި ކުރަމުންދާ ހައިޑްރޮގްރެފިކް ސަރވޭއަކީ ދިވެހިރާއްޖޭގައި ނިޔަމިކަމަށް ބޭނުން ކުރަމުން އަންނަ ކަރުދާސް ޗާޓާއި، ޖީޕީއެސް އަދި އެކްޑިސްގައި ބޭނުންކުރެވޭ އިލެކްޓްރޯނިކް ޗާޓުތައް އަޕްޑޭޓްކުރުމާއި، އެންކަރޭޖް އަދި އެޕްރޯޗް ޗާޓު ހެދުމަށްޓަކައި ކުރެވޭ ސަރވޭއެކެވެ. މިފަދަ ސަރވޭއެއްގެ އަލީގައި، ރާއްޖޭގައި އެންމެ ގިނައިން ހިނގާ ކަނޑުމަތީގެ ހާދިސާކަމުގައިވާ ފަރަށް އެރުންފަދަ ހާދިސާތައް މަދުކުރެވި، ދަތުރުވެރިންގެ ސަލާމަތާއި ރައްކާތެރިކަން އިތުރަށް ކަށަވަރުކުރެވި އޮޑިވެރިންނަށް ލިބޭ ގެއްލުން ކުޑަކުރެވޭނެއެވެ.

އަދި މި މަސައްކަތުގެ ސަބަބުން އިންޝުއަރެންސް ކްލެއިމްތައް ލީގަލައިޒްކުރެވުމާއި، އިޤްތިޞާދު ފުޅާކުރުމަށް ބޭނުންވާ މަޢުލޫމާތު ލިބިގެންދާނެއެވެ. މީގެ އިތުރުން، ދިވެހިރާއްޖޭގެ ތިމާވެއްޓަށް ލިބޭ ގެއްލުންތައް ދިރާސާކުރުމަށް ބޭނުންވާނެ މަޢުލޫމާތާއި ކޯސްޓަލް ޒޯން މެނޭޖްމަންޓް ފަދަ މުހިންމު މަސައްކަތްތަކަށް ބޭނުންވާނެ މަޢުލޫމާތު ވެސް ލިބިގެންދާނެއެވެ.

މި ސަރވޭ ކުރުމަށް ހަމަޖެހިފައިވަނީ ފޭސްތަކަކަށް ބަހާލައިގެންނެވެ. މިގޮތުން، މި މުއްދަތުގެ ތެރޭގައި އެންމެ ފުރަތަމަ ކުރިއަށް ގެންދިޔުމަށް ހަމަޖެހިފައިވަނީ ހދ. އަތޮޅުން ފެށިގެން ށ.އަތޮޅާ ހަމައަށެވެ. މި ސަރވޭގައި ހދ. ކުޅުދުއްފުށި އިންޓަރނޭޝަނަލް ސީޕޯޓްގެ ލާޖް ސްކޭލް އެޕްރޯލް ޗާޓު ވެސް ހިމެނިގެންދާނެއެވެ. ރާއްޖޭގެ އިންޓަރނޭޝަނަލް ޕޯޓްތައް ހުރި ސަރަޙައްދުތަކުގެ ތެރޭގައި ލާޖް ސްކޭލް ޗާޓް ޕަބްލިޝްކުރެވިފައިވަނީ މާލޭގެ ސަރަޙައްދުގެ އިތުރުން އައްޑޫ އަތޮޅާއި އިހަވަންދިއްޕޮޅުގައެވެ.