އިސްތިއުފާއެއް ނުދޭނަން، ކުުލަބުން ބޭނުންނަމަ ޖެހޭނީ ވަކިކުރަން: ނާދު

މި ސީޒަނުގެ ފުރަތަމަ ޑިވިޝަނުގައި މުޅިން އަލަށް ވާދަކުރަމުން އަންނަ ސުޕަ ޔުނައިޓެޑް ސްޕޯޓްސް (ސަސް) ގެ ކޯޗުގެ މަގާމުން އިސްތިއުފާ ނުދޭނެ ކަމަށާއި، ކުލަބުން އޭނާ ބޭނުން ނުވާނަމަ ޖެހޭނީ ވަކިކުރަން ކަމަށް އެ ޓީމުގެ ކޯޗު އަޙްމަދު ނާޝިދު (ނާދު) ބުނެފިއެވެ.

ގަދަ ހައެއްގައި ނިންމާލަން އަމާޒުހިފި ސަސްއިން މިހާތަނަށް މި ސީޒަނުގައި ވަނީ ނާދުގެ އިރުޝާދުގެ ދަށުން މޮޅު ކުޅުމެއް ދައްކާފައެވެ. އެގޮތުން ލީގުގައި މިހާތަނަށް ސަސްއިން ހަ މެޗު ކުޅެފައިވާއިރު، އެ ޓީމު ބަލިވެފައިވަނީ އެންމެ މެޗަކުންނެވެ. އެއީ އެންމެ ފަހުގެ ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަން އަތުންނެވެ.

ދިރާގު ދިވެހި ޕްރިމިއާ ލީގުގައި ޔުނައިޓެޑް ވިކްޓަރީ (ޔޫވީ) އަތުން އެއްވަރުވި މެޗަށްފަހު ވާހަކަ ދައްކަމުން ނާދު ބުނީ ސަސްގެ ކޯޗުގެ މަގާމާ އޭނާ ހަވާލުވިއިރު ކުލަބުން ދިން ޓާގެޓަކީ ގަދަ ހައެއް ކަމަށާއި، އެ ޓާގެޓަށް ވާސިލްވެވޭނެކަމުގެ ފުރިހަމަ ޔަގީންކަން އޮތް ކަމަށެވެ. އަދި މި ހިސާބުން ކޯޗު ވަކިކުރަން ތަންކޮޅެއް އަވަސް ކަމަށާއި، ކޯޗެއްގެ ހައިސިއްޔަތުން އިސްތިއުފާ ނުދޭނެ ކަމަށްވެސް ވަނީ ބުނެފައެވެ. އެހެންކަމުން ކުލަބުން އޭނާ ކޯޗަކަށް ބަހައްޓަން ބޭނުންނުވާނަމަ ޖެހޭނީ ވަކިކުރަން ކަމަށްވެސް ނާދު ވަނީ ބުނެފައެބެ.

ނާދު އިތުރަށް ބުނީ ސަސްގެ ކޯޗުގެ މަގާމުން އޭނާ ވަކިކުރާއިރު، ކުލަބުން ދިން ޓާގެޓް ހާސިލުނުވެގެން ވަކިކުރަނީއޭ ބުނެފިނަމަ އެއީ ގޯހެއް ކަމަށާއި، އެކަމަކު ސަސްގެ އަމާޒަކީ ލީގު ހޯދުން ކަމަށްވާނަމަ، ކޯޗުގެ މަގާމުން އޭނާ ވަކިކުރިއަސް މައްސަލައެއް ނެތް ކަމަށެވެ.

ނާދު ބުނީ ސަސްގެ ކޯޗުގެ މަގާމުން އޭނާ ވަކިކުރަން އުޅޭ ވާހަކަތައް ދަނޑު ބޭރުން ދައްކާ އަޑުއިވޭ ކަމަށާއި، އެކަމަކު ފުޓްބޯޅައިން އޭނާ ދުރު ނުކުރެވޭނެ ކަމަށެވެ. އަދި ސަސްއިން އޭނާ ވަކިކުރި ނަމަވެސް އެއްވެސް ހަސަދަވެރިކަމެއްވެސް ނޯންނާނެ ކަމަށްވެސް ވަނީ ބުނެފައެވެ. އަދި ސަސްއާއެކު ކުރެވުނު މަސައްކަތާ މެދު ވަރަށް ބޮޑަށް ހިތްހަމަޖެހޭ ކަމަށާއި، ސަސްގެ ކޯޗުގެ މަގާމުން އޭނާ ވަކިކޮށްފިނަމަ، ސަސްގެ މޭނެޖުމަންޓުގެ ފުޓްބޯޅައިގެ ފެންވަރު ރީތިކޮށް ފެންނަން އޮންނާނެ ކަމަށްވެސް ނާދު ބުންޏެވެ.

މައުލޫމާތު ލިބޭ ގޮތުގައި ނާދު ވަކިކޮށް ސަސްއިން އަންނަނީ އެ ޓީމުގެ ކޯޗަކަށް ކުލަބު އީގަލްސްގެ ކޯޗުގެ މަގާމުން ދާދި ފަހުން ވަކިވި މުޙައްމަދު ޝިޔާޒް (މޯހަން) ގެނައުމަށް މަސައްކަތް ކުރަމުންނެވެ.

މި ސީޒަނުގައި މުޅިން އަލަށް ދިވެހި ޕްރިމިއާ ލީގު ކުޅެމުން އަންނަ ސަސް އޮތީ ތާވަލުގެ ފަސްވަނައިގައި ކުޅުނު ހަ މެޗުން ލިބުނު ހަތް ޕޮއިންޓާއެކުގައެވެ.