ނަސްލީ ތަފާތުކުރުމާއި މަނާ ބޭސް ބޭނުންކުރުމުގެ ފުރުސަތު ވާރލްޑް ކަޕުގައި ނުދޭނަން: އިންފަންޓީނޯ

އަންނަ އަހަރު ރަޝިއާގައި ބޭއްވުމަށް ހަމަޖެހިފައިވާ ފީފާ ވާރލްޑް ކަޕުގައި ނަސްލީ ތަފާތުކުރުމާއި މަނާ ބޭސް ބޭނުންކުރުމަށް ފުރުސަތު ނުދޭނެ ކަމަށް ފީފާގެ ރައީސް ޖިއަނީ އިންފަންޓީނޯ ވިދާޅުވެޖެއެވެ.

ވާރލްޑް ކަޕަށް ވަގުތު ކުޑަތަންވަމުން އަންނައިރު ނަސްލީ ތަފާތުކުރުމުގެ އެކި މައްސަލަތައް އަންނަނީ ފެންމަތިވަމުންނެވެ. ނަސްލީ ތަފާތުކުރުމާއި ދެކޮޅަށް އަޑުއުފުލަމުން އަންނަ ކުޅުންތެރިންގެ އަދަދުވެސް އަންނަނީ ދުވަހަކަށްވުރެ ދުވަހެއް އިތުރު ވަމުންނެވެ. އެގޮތުން އައިވަރީ ކޯސްޓުގެ މިޑްފީލްޑަރު ޔާޔާ ޓޫރޭއާއި ބްރެޒިލްގެ ވިންގާ ހަލްކްގެ އިތުރުން އިޓަލީގެ ފޯވާޑް މާރިއޯ ބަލޮޓެލީވެސް ވަނީ ނަސްލީ ތަފާތުކުރުން ފުޓްބޯޅައިގެ ތެރެއިން ނައްތާލުމަށް ގޮވާލާފައެވެ.

ވާރލްޑް ކަޕުގެ ގުރު ނެގުމަށް ހަތަރު ދުވަހަށް ވެފައިވަނިކޮށް ފީފާގެ ޔޫޓިއުބް ޗެނަލްއަށް ދެއްވި އިންޓަވިއުއެއްގައި އިންފަންޓީނޯ ވިދާޅުވެފައިވަނީ ނަސްލީ ތަފާތުކުރުމަކީ ފީފާއިން ވަރަށް ބޮޑު އަހަންމިއްޔަތުކަމެއް ދީގެން ބަލާނެ ކަމެއް ކަމަށާއި އެފަދަ ކަމެއް ހިނގާތޯ ވަރަށް ކައިރިން ބަލަމުންދާނެ ކަމަށެވެ.

ހަމައެހެންމެ އިންފަންޓީނޯ ވިދާޅުވެފައިވަނީ އެފަދަ ކަމެއް ހިނގައިފި ހާލަތެއްގައި އަމަލުކުރާނެ ގޮތެއް ކަނޑައެޅިފައިވާ ކަމަށާއި އަންނަ އަހަރުގެ ވާރލްޑް ކަޕުގައި އެކަމަށް ހަރުކަށި ފިޔަވަޅު އަޅާނެ ކަމަށެވެ. އެގޮތުން ރެފްރީއަށް މެޗު މެދުކަނޑާލުމުގެ އިހްތިޔާރު އޮންނާނެ ކަމަށާއި އަދި މެޗުގެ ކުޅުން އިތުރަށް ކުރިޔަށް ނުގެންގޮސް މެޗު އެއްކޮށް ހުއްޓާލުމުގެ ބާރުވެސް ރެފްރީގެ އަތްމަތީގައި އޮންނާނެ ކަމަށް އިންފަންޓީނޯ ވިދާޅުވެއެވެ.

އަންނަ އަހަރުގެ ވާރލްޑް ކަޕް ބަލާލުމަށް ރަޝިއާއަށް ދާ މީހުންގެ ސަލާމަތީ ކަންކަމާއި ގުޅިގެން އެތަށް ބަޔަކު ކަންބޮޑުވުން ފާޅުކުރަމުން އަންނަ ދަނޑިވަޅެއްގައި އިންފަންޓީނޯ ވަނީ ސަލާމަތީ ކަންކަން ވަރުގަދަ ކުރުމަށް ވަރަށް ގިނަ މަސައްކަތްތަކެއް ކުރަމުންދާކަމަށް ހާމަކުރަށްވާފައެވެ.

އޭނާ ވިދާޅުވީ ރަޝިއާގެ އިދާރާތަކުން ވާރލްޑް ކަޕުގެ ސަލާމަތީ ކަންކަން ބެލެހެއްޓުމަށް ވަރަށް ބޮޑު އަހަންމިއްޔަތު ކަމެއް ދޭނެ ކަމަށާއި ރައްކާތެރި މާހައުލެއް ބިނާކުރުމަށް 200 އިންސައްތަ މަސައްކަތް ކުރަމުންދާ ކަމަށެވެ. މީގެއިތުރުން އިންފަންޓީނޯ ވިދާޅުވީ ވާރލްޑް ކަޕް ނިމޭއިރު ދުނިޔޭގެ އެހެން ގައުމުތަކުން ރަޝިއާ އާއި މެދު ދެކޭގޮތް އެއްކޮށް ބަދަލުވެގެންދާނެ ކަމުގެ ފުރިހަމަ ޔަގީންކަން އެބައޮތް ކަމަށެވެ.

މަނާ ބޭސް ބޭނުންކުރުމާއި ބެހޭގޮތުން ވާހަކަ ދައްކަވަމުން އިންފަންޓީނޯ ވިދާލުވެފައިވަނީ ދަނޑުމަތީގައި ހުރިހާ ކުޅުންތެރިންގެ ފަރާތުންވެސް ފެންނަން ބޭނުމީ ފެއަރ ޕްލޭ ކަމަށާއި މަނާ ބޭސް ބޭނުންކުރުމަކީ އެކަމަށް އެޅޭ ހުރަހެއް ކަމަށެވެ. އެހެންކަމުން މުބާރާތް ކުރިޔަށްދާއިރު ހުރިހާ ޓީމެއްގެ ކުޅުންތެރިންވެސް މަނާ ބޭހަށް ޓެސްޓު ކުރެވޭނެ ކަމަށާއި އެކަން ވާދަކުރާ ހުރިހާ ގައުމެއްގެ ފުޓްބޯޅަ އިދާރަތަކަށް އަންގާފައިވާނެ ކަމަށް އިންފަންޓީނޯ ވިދާލުވެފައި ވެއެވެ.

އިންފަންޓީނޯ މިބީދައިން ވާހަކަ ދައްކާފައިވާއިރު ރަޝިއާގެ އެންޓި ޑޯޕިން އެޖެންސީ އަދިވެސް އޮތީ ސަސްޕެންޑް ކުރެވިފައެވެ.

ވާރލްޑް ކަޕުގައި ވާދަކުރާނެ ހުރިހާ ޓީމެއް ވެސް ކަށަވަރު ވެފައިވާއިރު އަންނަ ޑިސެމްބަރު މަހުގެ އެއްވަނަ ދުވަހު ގުރު ނެގުމުގެ ރަސްމިއްޔާތު ރަޝިއާގެ މޮސްކޯގައި ބޭއްވުމަށް ވަނީ ހަމަޖެހިފައެވެ.

ދުނިޔެއަށް އަންނަ ފުޓްބޯޅައިގެ އެންމެ ބޮޑު އީދު ފެށުމަށް ހަމަޖެހިފައިވަނީ އަންނަ އަހަރުގެ ޖޫން މަހުގެ 14 ވަނަ ދުވަހުއެވެ.