ގައުމީ ޓީމުން ދެން މެސީ އަށް ފުރުސަތެއް ނުދޭނަން: ގައުމީ ކޯޗު

ގައުމީ ޓީމުން ދެން އިސްމާއިލް އީސާ (މެސީ) އަށް ފުރުސަތެއް ނުދޭނެ ކަމަށް ގައުމީ ޓީމުގެ ކޯޗު ޑަރެން ސްޓެވާޓް ބުނެފިއެވެ.

އޭޝިއަންކަޕް ކޮލިފައިންގައި ރާއްޖެ އަދި އޮމާން ބައްދަލުކުރާ މެޗުގެ ކުރިން ހޯމަ ދުވަހު ގަލޮޅު ދަނޑުގައި ބޭއްވި ނޫސްވެރިންގެ ބައްދަލުވުމުގައި ކޯޗު ބުނީ މެސީ އަށް ގައުމީ ޓީމުން ދެން ފުރުސަތު ނުދޭނެ ކަމަށާއި، އެއީ އޭނާގެ ނިންމުން ކަމަށެވެ.

ކޯޗު ބުނީ މެސީއާ ބެހޭ ގޮތުން އިތުރަށް ވާހަކަދައްކަން ބޭނުންނުވާ ކަމަށާއި، އޭނާ ޓީމުން ބާކީކުރި ސަބަބު އަމިއްލައަށް ގުޅާ އަހާލުން ރަނގަޅުވާނެ ކަމަށެވެ.

"އަހަރެން ކޯޗަކަށް ހުރެ ދެން މެސީ ޓީމަށް ނުނަގާނަން. ސަބަބުން މެސީއަށް ގުޅާފައި އަހާ. އަހަރެން އިތުރަށް މެސީއާ ބެހޭ ގޮތުން ވާހަކަދައްކަން ބޭނުމެއް ނޫން،" މެސީއާ ބެހޭ ގޮތުން ވާހަކަދައްކަމުން ކޯޗު ބުނިއެވެ.

މައުލޫމާތު ލިބިފައިވާ ގޮތުގައި މެސީ ޓީމުން ބާކީކުރީ ގައުމީ ޓީމުގެ ފަރިތަކުރުން ކުރިޔަށްދަނިކޮށް، އޭނާ ކޯޗާ މެދު ހިތްހަމަނުޖެހިގެން އަމިއްލައަށް ދަނޑުން ފައިބައިގެންދިޔުމާ ގުޅިގެންނެވެ.

މައުލޫމާތު ލިބިފައިވާ ގޮތުގައި ކޯޗާ މެދު މެސީ ހިތްހަމަނުޖެހުނީ އޮމާން މެޗުގައި ފުރަތަމަ އެގާރައިން ފުރުސަތު ދޭނެ ކަމަށް ކުރިން ބުނެފައި އެ ހިޔާލު ބަދަލުކުރުމުންނެވެ.

މި ސީޒަނުގައި މާލޭ ލީގުގައި ވިކްޓްރީ ސްޕޯޓްސް ކްލަބަށް ކުޅުނު މެސީ ވަނީ ދިވެހި ޕްރިމިއާ ލީގަށް މާޒިޔާ ސްޕޯޓްސް އެންޑް ރެކްރިއޭޝަނަށް ބަދަލުވެފައެވެ. އޭނާ އަންނަނީ އެޓީމުގައި މޮޅު ކުޅުމެއް ދައްކަމުންނެވެ. އޭނާ ވަނީ މާލޭ ލީގުގައި ވިކްޓްރީ އަށް މޮޅު ކުޅުމެއް ދައްކާ، މުހިންމު ލަނޑުތަކެއް ވެސް ކާމިޔާބުކޮށްދީފައެވެ.

މެސީ އަންނަނީ ފަހަކަށް އައިސް ގައުމީ ޓީމުން ބަރާބަރަށް ފުރުސަތު ހޯދަމުންނެވެ. އެގޮތުން ކޯޗު އޭނާ އަށް ގިނަ މެޗުގައި ފުރަތަމަ އެގާރައިން ވެސް ވަނީ ފުރުސަތު ދީފައެވެ.