ސައުދީ އަރަބިއްޔާގެ ހިމާޔަތުގައި އެމެރިކާއިން ކުރާ ޚަރަދާއި ކޮށްދޭ މަސައްކަތުގެ ބަދަލު ހަމަހަމަ ގޮތެއްގައި އެމެރިކާއަށް އެ ގައުމުން ލިބެމުން ނުދާކަމަށް ވިދާޅުވެ، އެމެރިކާގެ ރައީސް ސައުދީ އަރަބިއްޔާއަށް ވަރަށް ބޮޑަށް ފާޑު ވިދާޅުވެ ވާހަކަފުޅު ދައްކަވައިފިއެވެ.
ބުދަ ދުވަހު ރޮއިޓާސް ނިއުސް އޭޖެންސީއަށް ޓަރަމްޕް ދެއްވި ބަސްދީގަތުމެއްގައި ވިދާޅުވީ، ސައުދީ އަރަބިއްޔާގެ ދިފާއުގައި އެމެރިކާއިން ބޮޑު ޚަރަދެއް ކުރާ ކަމަށާއި، ނަމަވެސް އެއާ ހަމަހަމަ ގޮތެއްގައި ސައުދީ އިން އެމެރިކާއަށް ކަންތައްތައް ކޮށް ދެމުން ނުދާ ކަމަށެވެ.
ރައީސް ޓްރަމްޕްވަނީ އޭނާގެ ރިޔާސީ ކެމްޕޭންގައިވެސް ސައުދީ އަރަބިއްޔާގެ ދިފާއުގައި އެމެރިކާއިން ކުރާ ބޮޑު ހޭދައަށް ހިތްޕުޅު ހަމަނުޖެހުން ފާޅު ކުރައްވާ ވާހަކަފުޅު ދައްކަވާފައެވެ.
"ސައުދީ އަރަބިއްޔާއަކީ އަހަރެމެން ހިމާޔަތްދީ ބަލަހައްޓާ ގައުމެއް. އެއްވެސް މީހަކަށް ސައުދީ އަރަބިއްޔާއަކާ ސަކަރާތެއް ނުޖެހޭނެ، އަހަރެމެން މިތިބީ ސައުދީ އަރަބިއްޔާއަށް ވާނުވާ ބަލަން" މީގެ އަހަރެއްހާ ދުވަސް ކުރިން ވިސްކޯސިންގައި އޮތް ކެމްޕޭން ރެލީއެއްގައި ވާހަކަ ފުޅު ދައްކަވަމުން ޓްރަމްޕް ވިދާޅުވިއެވެ.
އޭރު ޓްރަމްޕްގެ ވާހަކަފުޅު ހުރި ގޮތައް ބަލާއިރު، ސައުދީ އަރަބިއްޔާއަށް ހިމާޔަތް ދިނުމަށް އެމެރިކާއިން ކުރާ މަސައްކަތް ހުއްޓާލުމަށް ބޭނުން ފުޅުވާކަން ދޭހަވެއެވެ. ސައުދީ އަށް އެމެރިކާގެ ޝައުގުވެރިކަން ކުޑަވަނީ، ބޭރުން އެތެރެ ކުރާ ތެލަށް އެމެރިކާ ބަރޯސާވުން ކުޑަވަމުން ދިޔުންކަން ފާހަގަ ކުރެވެއެވެ.
ރައީސް ކަމުގެ މަގާމަށް ހަވާލުވެ ވަޑައިގަތް ފަހުން ކެމްޕޭންގައި ޓްރަމްޕް ސައުދީ އާ މެދު ގެންގުޅުއްވި ހަރުކަށި ރާގު ބަދަލުވަމުން ދިޔަކަން ފާހަގަ ކުރެވެއެވެ.
ހުސްވި މަހުގެ ތެރޭގައި ސައުދީ އަރަބިއްޔާގެ ޑެޕިއުޓީ ކްރައުން ޕްރިންސް މުހައްމަދު ބިން ސަލްމާންވަނީ ރައީސް ޓްރަމްޕްއާ ވައިޓް ހައުސްގައި ބައްދަލު ކުރައްވާފައެވެ. އެ ބައްދަލު ކުރެއްވުމަކީ، އޮބާމާގެ ވެރިކަމުގައި ސައުދީ އެމެރިކާގެ ގުޅުން ހީނަރުވެފައި އޮތް އޮތުން ވަރުގަދަ ކުރެއްވުމުގެ ބައްދަލުވުމެއް ކަމަށްވެސް މީޑިއާ ރިޕޯޓުތަކުގައިވެއެވެ. މެދުއިރުމަތީގެ އިސް މަސްއޫލު ވެރިޔަކާ ވެރިކަމަށް ވަޑައިގަތުމަށްފަހު ރައީސް ޓްރަމްޕް ބޭއްވެވި ފުރަތަމަ ބައްދަލުވުމަކީ ސައުދީ ޑެޕިއުޓީ ކްރައުން ޕްރިންސް މުހައްމަދު އާ އެކު ބޭއްވެވި މި ބައްދަލުވުންކަން ފާހަގަ ކުރެވެއެވެ. މިބައްދަލުވުމުގައި މެދު އިރުމައްޗަށް އީރާނުގެ ފަރާތުން އޮތް ނުރައްކަލުގެ މައްޗަށްވެސް ދެބޭފުޅުން ވާހަކަފުޅު ދެއްކެވިއެވެ.
ޓްރަމްގެ ސަރުކާރުންވަނީ، ސައުދީ އަރަބިއްޔާއަށާއި އިޒްރޭލަށް މޭމަހުގެ ތެރޭގައި ރައީސް ޓްރަމްޕް ދަތުރުފުޅެއް ކުރެއްވުމަށް ރާއްވަވަމުން ގެންދަވާ ކަން ހާމަ ކޮށްފައެވެ.
އެމެރިކާގެ ދިފާއީ ވަޒީރު ޖޭމްސް މެޓިސް ވަނީ މިމަހުގެ ތެރޭގައި ސައުދީ އަރަބިއްޔާއަށް ދަތުރުފުޅެއް ކުރައްވާ ސައުދީ އޮފިޝަލުންނާ ބައްދަލު ކުރައްވާފައެވެ.
ސައުދީ އަރަބިއްޔާއަށް ހަތިޔާރު ވިއްކަން އަލުން ފެށުމަށް ވިސްނަމުންދާ ކަމަށްވެސް ވޮޝިންގޓަނުން ވަނީ ހާމަކޮށްފައެވެ.
