ރާއްޖޭގައި ޖުމްލަ 41،982 ޓޫރިސްޓު އެނދު އޮޕަރޭޓްކުރަން ފަށައިފި
މިހާރު އޮޕަރޭޓްކުރަނީ ޖުމްލަ 565 ޓޫރިސްޓު ފެސިލިޓީ
ޓޫރިސްޓު ފެސިލިޓީ
ކޮވިޑް-19އާ ގުޅިގެން ބޯޑަރުތައް ބަންދުކޮށް ހުޅުވާލި ފަހުން މިހާރު ރާއްޖޭގައި ޖުމްލަ 41،982 ޓޫރިސްޓު އެނދު އޮޕަރޭޓްކުރާ ކަމަށް ޓޫރިޒަމް މިނިސްޓްރީގެ ތަފާސްހިސާބުތަކުން ދައްކައިފި އެވެ.
ޓޫރިޒަމް މިނިސްޓްރީން ކޮންމެ ދުވަހަކު ނެރޭ ތަފާސްހިސާބުތައް ދައްކާގޮތުން 7 ޖެނުއަރީގެ ނިޔަލަށް އޮޕަރޭޓްކުރަން ފަށާފައި ވަނީ ޖުމްލަ 565 ޓޫރިސްޓު ފެސިލިޓީއެވެ. އެއީ 141 ރިސޯޓާއި، 11 ހޮޓެލް، 131 ސަފާރީ، އަދި 282 ގެސްޓް ހައުސްއެވެ. އެގޮތުން ރިސޯޓުތަކުން 32،636 އެނދު، ހޮޓެލް ތަކުން 1،458 އެނދު، ސަފާރީތަކުން 2،530 އެނދު އަދި ގެސްޓް ހައުސްތަކުން 5،358 އެނދު މިހާރު ވަނީ އޮޕަރޭޓްކުރަން ފަށާފައެވެ.
ކޮވިޑް-19 ރާއްޖޭގައި ފެތުރެން ފެށުމާ އެކު ރާއްޖޭގެ ބޯޑަރު ބަންދު ކުރީ މިދިޔާ މާޗް މަހުގަ އެވެ. އޭގެ ފަހުން ޖުލައި މަހު ބޯޑަރުތައް ހުޅުވާލާފައިވާއިރު ލޯކަލް ޓޫރިޒަމް އަށް ހުޅުވާލީ އޯކްޓޯބަރުގައެވެ. ބޯޑަރުތައް ހުޅުވާލާފައިވީ ނަމަވެސް އަދިވެސް ބައެއް ރިސޯޓުތައް ނުހުޅުވައެވެ. އޭގެ ތެރޭގައި ކޮވިޑް-19 ފެސިލިޓީތަކުގެ ގޮތުގައި ބޭނުންކުރާ ރިސޯޓުތައް ވެސް ހިމެނެއެވެ.
މީގެ އިތުރަށް މީހުން ދިރިއުޅޭ ރަށްރަށުގައި ހުރި ގެސްޓް ހައުސްތަކުގެ ތެރެއިން ވެސް ބައެއް ރަށްރަށުން ގެސްޓް ހައުސް އޮޕަރޭޓްކުރާކަށް ނުފަށައެވެ.
