ބަލި ގަބޫލުކުރައްވާ ޓްރަމްޕް ވިދާޅުވީ މިއީ އެމެރިކާގެ ތާރީޚުގައި ދެކުނު އެންމެ ފުރިހަމަ ހަތަރު އަހަރު ކަމަށް

އިލެކްޓޯރަލް ކޮލެޖްގެ ރަސްމީ ނަތީޖާއިން ޖޯ ބައިޑަން އަށް އިންތިޚާބު ކާމިޔާބުވެ ވަޑައިގެންނެވިކަން ގަބޫލުކުރައްވާ ވައިޓް ހައުސްގައި ހޭދަކުރެއްވި ހަތަރު އަހަރުގެ މުއްދަތު ހަމަވަމުން އަންނަކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެއެވެ.

މިއާއެކު ޓްރަމްޕް ވަނީ ބާރުތައް ބަދަލުކުރުމުގެ މަރުހަލާގެ ކަންކަން އޮންނަ ގޮތަށް ކުރިޔަށް ގެންދަވާނެކަމަށް ވައުދުވެ ވަޑައިގަންނަވާފައެވެ. އެކަން ހާމަކުރައްވާ ޓްރަމްޕް ނެރުއްވި ބަޔާނެއްގައި ވިދާޅުވީ އިންތިޚާބުގެ ނަތީޖާ ގަބޫލުނުކުރެއްވިނަމަވެސް ޖެނުއަރީ މަހުގެ 20 ވަނަ ދުވަހު ޖޯ ބައިޑަން އައު ރައީސްކަމަށް ހުވާކުރުމުގެ ކަންކަން ކުރިޔަށްދާނެ ކަމަށެވެ. ޓްރަމްޕް ވަނީ އެމެރިކާގެ ރިޔާސީ އިންތިޚާބުގެ ނަތީޖާ ގަބޫލުނުކުރައްވާ ކަމަށް އެތައް ފަހަރަކު ވިދާޅުވެފައެވެ. އިންތިޚާބުގެ ނަތީޖާގައި އޮޅުވާލުންތަކެއް އުޅޭކަމަށް ތަކުރާރުކޮށް ވިދާޅުވަމުން ގެންދެވިނަމަވެސް އެކަން ސާބިތުކުރެއްވޭނެ ހެއްކެއް ޓްރަމްޕަށް ދެއްކިފައެއްނުވެއެވެ.

މީގެއިތުރުން ޓްރަމްޕްގެ ޤާނޫނީ ޓީމުން އެކަން ސާބިތުކުރުމަށް ކޯޓުތަކަށް ހުށަހަޅައިގެން ކުރި މަސައްކަތްތައްވެސް ވަނީ ނާކާމިޔާބުވެފައެވެ.

ބައިޑަން އަށް ރައީސްކަމުގެ ބާރުތައް ބަދަލުކުރުމުގެ ކަންކަން ކުރިޔަށް ގެންދަވާނެކަމަށް ޓްރަމްޕް ވިދާޅުވީ އިލެކްޓޯރަލް ކޮލެޖްގެ ނަތީޖާ ކޮންގްރެސް އިން ރަސްމީކޮށް ހާމަކުރުމުންނެވެ. އިލެކްޓޯރަލް ކޮލެޖްގެ ނަތީޖާ ދައްކާގޮތުން ބައިޑަން އަށް ވަނީ 306 ވޯޓު ލިބިވަޑައިގަންނަވާފައެވެ. ޓްރަމްޕަށް ލިބިވަޑައިގެންނެވީ 232 ވޯޓެވެ.