އަފްޣާނިސްތާނުގެ ނޫސްވެރިއެއް އަނެއްކާވެސް ހަމަލާދީ މަރާލައިފިއެވެ.

ބައިނަލް އަގްވާމީ މީޑިއާތަކުން ރިޕޯޓްކޮށްފައިވާ ގޮތުގައި، މިއީ ފާއިތުވެދިޔަ ދެމަސް ދުވަހުގެ ތެރޭގައި ހަމަލާދީ މަރާލި ފަސްވަނަ ނޫސްވެރިޔާއެވެ. ހުކުރު ދުވަހު ބަޑިން ހަމަލާދީ މަރާލާފައިވަނީ، އަފްޣާނިސްތާނުގެ ރޭޑިއޯ ސްޓޭޝަނެއް ކަމަށްވާ ވޮއިސް އޮފް ގޯރގެ އިސް އެޑިޓަރެއް ކަމަށްވާ އުމުރުން 28 އަހަރުގެ ބިސްމިﷲ އާދިލް އައިމަޤް އެވެ. އޭނާއަކީ ނޫސްވެރިއެއްގެ އިތުރުން އަފްޣާނިސްތާނުގައި ހަރަކާތްތެރިވާ ހިއުމަން ރައިޓްސް އެކްޓިވިސްޓެކެވެ.

އޭނާއަށް ހަމަލާދީ މަރާލާފައިވަނީ، ވިލެޖެއްގައި ދިރިއުޅޭ އާއިލާ ބަޔަކާ ބައްދަލުކުރުމަށްފަހު، ދިރިއުޅޭ ގެއަށް ދަތުރުކުރަމުން ދަނިކޮށް އޭނާ ދިރިއުޅޭ ސިޓީންނެވެ. ކާރުގައި ދަތުރު ކުރުމުން ދަނިކޮށް، ބަޑިން ދިން މި ހަމަލާ ދީފައިވަނީ ކޮންބައެއްކަމެއް މިހާތަނަށް ސާފުނުވާ ކަމަށް، ގޯރ ޕްރޮވިންސުގެ ގަވަރުނަރުގެ ނައިބު އާރިފް އަބިރާ ހަވާލާދީ ބައެއް މީޑިއާތަކުން ރިޕޯޓްކޮށްފައިވެއެވެ. އަދި ހަތިޔާރު އެޅި އެއްވެސް ޖަމާޢަތަކުން މިހާތަނަށް މި ޙަމަލާގެ ޒިންމާ އުފުލައިފައެއް ވެސް ނުވެއެވެ.

ނޫސްވެރިޔާ އައިމަޤް މަރާލުމުން އެކަން ކުށްވެރިކުރައްވައި، އަފްޣާނިސްތާނުގެ ރައީސް އަޝްރަފް ވިދާޅުވީ ޚިޔާލު ފާޅުކުރުމުގެ މިނިވަންކަމަށް އަފްޣާނިސްތާނުގެ ސަރުކާރުން ބާރު އަޅާ ހިތްވަރުދިނުމުގައި ދެމިތިބޭނެކަމަށެވެ. އަދި ޠާލިބާނުންނާއި އެހެނިހެން ނިރުބަވެރި ޖަމާއަތްތަކުން ނޫސްވެރިންނަށް އަމާޒުކޮށް ދޭ ޙަމަލާތަކުން ނޫސްވެރިންގެ އަޑު ކަނޑުވާ ނުލެވޭނެކަމަށް ރައީސް އަޝްރަފް ޣަނީ ވިދާޅުވިއެވެ.

ފާއިތުވެދިޔަ ދެމަސް ދުވަހުގެ ތެރޭގައި އަފްޣާނިސްތާނުގައި ހަމަލާދީ މަރާލާފައިވާ ނޫސްވެރިންގެ ތެރޭގައި، މިދިއަ ހަފްތާގައި މަރާލި، "ޔޫނިއަން" އިސް އެޑިޓަރު ރަހްމަތުﷲ ނެކްޒަޑް އާއި އޭގެކުރިން މަރާލި، "އެނިކަސް ޓީވީ" އަދި ރޭޑިއޯގެ ނޫސްވެރިޔާ މަލަލާ މައިވަންޑް ހިމެނެއެވެ. އަދި ނޮވެމްބަރު މަހުގެ ތެރޭގައި ހަމަލާދީ މަރާލާފައިވަނީ، ކުރީގެ މަޝްހޫރު ޓީވީ ޕްރެސެންޓަރ ޔަމާ ސިއަވަޝް އާއި ރޭޑިއޯ ލިބަޓީގެ ރިޕޯޓަރ އިލިޔާސް ދާއީ އެވެ.