ފަތުރުވެރިކަމުގެ ރަން ޔޫބީލް ފާހަގަކުރަން ކައުންޓްޑައުން ފަށައިފި
އެ ދާއިރާގައި ހަރަކާތްތެރިވާ ގިނަ މީހުންގެ ވީޑިއޯ މެސެޖުތައް ފޮނުވާނެ
ރާއްޖެއިން ފަތުރުވެރިކަން އިތުރަށް ފުޅާކޮށް، ރަން ޔޫބީލަށް ތައްޔާރުވުމަށް ގިނަ ޙަރަކާތްތަކެއް ދަނީ ރާވަމުން
2022 ވަނަ އަހަރު ފާހަގަކުރާ ފަތުރުވެރިކަމުގެ ރަން ޔޫބީލް ފާހަގަކުރަން ޓޫރިޒަމް މިނިސްޓްރީން ކައުންޓްޑައުން އެއް ފަށައިފި އެވެ.
އެ މިނިސްޓްރީން ނެރުނު ބަޔާނުގައި ބުނީ 2022 ވަނަ އަހަރަކީ ރާއްޖޭގެ ފަތުރުވެރިކަމަށް 50 އަހަރު ފުރޭ އަހަރަށް ވާތީ އެ އަހަރު ފަތުރުވެރިކަމުގެ ރަން އަހަރުގެ ގޮތުގައި ފާހަގަކުރަން ނިންމާފައިވާ ކަމަށެވެ. ކައުންޓްޑައުން ފަށާފައި ވަނީ ޓޫރިޒަމް މިނިސްޓްރީގެ ސޯޝަލް މީޑިއާ އެކައުންޓުތައް މެދުވެރިކޮށެވެ.
އެ ކައުންޓްޑައުންގައި ފަތުރުވެރިކަމުގެ ސިނާއަތް ރާއްޖެއަށް ތައާރަފްކުރުމުގައި އިސްކޮށް އުޅުއްވި ބޭފުޅުންނާއި އެ ދާއިރާގައި ހަރަކާތްތެރިވާ ގިނަ މީހުންގެ ވީޑިއޯ މެސެޖުތައް މިއަދުން ފެށިގެން މި އަހަރު ނިމެންދެން ފޮނުވާނެ ކަމަށް ބުންޏެވެ.
ކައުންޓްޑައުން ފަށާފައި ވަނީ ފުރަތަމަ ރާއްޖެ އަށް ޒިޔާރާތްކުރި ފަތުރުވެރިންގެ ތެރޭގައި ހިމެނޭ އިޓަލީ ވިލާތުގެ ޖޯޖް ކޯބިންގެ ވީޑިއޯ މެސެޖަކުންނެވެ. އޭނާގެ މެސެޖުގައި ރާއްޖެ ސިފަކުރެއްވީ ދުނިޔެމަތީގެ ސުވަރުގޭގެ ގޮތުގަ އެވެ. އޭނާ ބުނީ އެއީ ރާއްޖެ ސިފަކުރެވޭނެ އެންމެ ފުރިހަމަ ހަމައެކަނި ބަސްކަމުގަ އެވެ.
ޖޯޖް ބުނިގޮތުގައި މީގެ 48 އަހަރު ކުރިން އޭނާ ސްރީލަންކާގެ ކާގޯ ބޯޓެއްގައި ރާއްޖެ ކުރި ދަތުރުގައި ރާއްޖޭގެ ވަރަށް ގިނަ ރަށްރަށަށް ޒިޔާރާތްކޮށްފައި ވެއެވެ. އަދި ރާއްޖެ އަކީ ފަތުރުވެރިންނަށް ހިތްގައިމު މަންޒިލެއްކަން ފާހަގަކޮށް ބުނީ މޫދު ކުޅިވަރާއި މިފަދަ ބޭނުން ކޮންމެ ކުޅިވަރެއްގެ ފުރުސަތު ވެސް ރާއްޖެ އިން ލިބޭނެ ކަމަށެވެ.
މިނިސްޓްރީން ބުނީ ފަތުރުވެރިކަމުގެ ރަން އަހަރު ވަރަށް ކުލަގަދަކޮށް ފާހަގަކުރަން ނިންމާފައިވާ ކަމަށާއި އެކަމަށް ވާން ޖެހޭ ތައްޔާރީތައް މިހާރު ވަމުން އަންނަ ކަމަށެވެ.
