ކަރަންޓް ޔުނިޓްގެ އަގުން 38 ލާރި ހެޔޮކޮށްފި ކަމަށް ފެނަކަ ކޯޕަރޭޝަނުން ހާމަކޮށްފިއެވެ.
މިކަން އިއުލާންކޮށްފައިވަނީ ފެނަކަ ކޯޕަރޭޝަނުން އަންގާރަ ދުވަހު ބޭއްވި ނޫސްވެރިންގެ ބައްދަލުވުމުގައެވެ.
ކަރަންޓުގެ އަގު ހެޔޮކޮށްފައިވަނީ ތެލުން ނަގާ ޑިއުޓީ 10 އިންސައްތައިން ފަސް އިންސައްތައަށް ކުޑަ ކުރަން ނިންމުމާއި ގުޅިގެން ކަމަށް ފެނަކަ ކޯޕަރޭޝަންގެ މެނޭޖިން ޑިރެކްޓަރ މުހައްމަދު ޝަރީފް ވިދާޅުވިއެވެ.
ޝަރީފް ވިދާޅުވީ މިދިޔަ މަހުގެ 18 ވަނަ ދުވަހުން ފެށިގެން ޔުނިޓަކުން 38 ލާރި އަގު ހެޔޮކޮށްފައިވާ ކަމަށެވެ. އަދި އޮގަސްޓު މަހުގައި ބިލް ކުރާ މިމަހުގެ ބިލުގައި ހިމަނާނީ އަގަށް އައި ބަދަލާ އެކު ކަމަށްވެސް އޭނާ ވިދާޅުވިއެވެ.
އެގޮތުން 100 ޔުނިޓާ ހަމައަށް ކަރަންޓު ބޭނުން ކުރާ ފަރާތްތަކުގެ ބިލުން 17 ޕަސެންޓު ކުޑަ ވާނެ ކަމަށާއި 100 ޔުނިޓާއި 200 ޔުނިޓާ ދެމެދުގެ އަދަދަކަށް ކަރަންޓު ބޭނުން ކުރައްވާ ފަރާތްތަކަށް 15 ޕަސެންޓު ކުޑަވެގެންދާނެ ޝަރީފު ވިދާޅުވިއެވެ. އަދި 400 ޔުނިޓުން މަތީގެ މިންވަރަކަށް ކަރަންޓު ޔޫސޭޖް އަރާ ފަރާތްތަކުގެ ބިލުން ނުވަ ޕަސެންޓުގެ ސޭވިން އެއް އަންނާނެ ކަމަށް އޭނާ ވިދާޅުވި އެވެ.ޝަރީފު ވިދާޅުވި ގޮތުގައި އާންމު ރައްޔިތުން ކުރާ ވިޔަފާރިން ފަސް ޕަސެންޓާއިއަށް ޕަސެންޓާ ދެމެދުގެ ސޭވިން އެއް ލިބިގެން ދާނެއެވެ. އަދި ސަރުކާރުގެ އޮފީސްތަކާއި ޚާއްސަ ވިޔަފާރިތަކަށްވެސް އެ ވަރުގެ ސޭވިންއެއް ލިބިގެން ދާނެ ކަމަށް ޝަރީފު ވިދާޅުވިއެވެ.
އެ ކުންފުނީގެ ކަރަންޓު ލިބިގަންނަ 78 ޕަސެންޓު ގޭބިސީތަކުން އެންމެ ބޮޑަށް ކަރަންޓު ކޮންޒިއުމް ކުރަނީ 100 ޔުނިޓާއި 400 ޔުނިޓާ ދެމެދުގައި ކަމަށެވެ. އެގޮތުން އެ ފަރާތްތަކުގެ ބިލުން މަހެއްގެ މައްޗަށް 3.6 މިލިއަން ރުފިޔާގެ ސޭވިން އެއް އެ ކެޓަގަރީގެ ގޭބިސީތަކަށް ލިބިގެންދާ ކަމަށް އޭނާ ވިދާޅުވިއެވެ.
