ޓީޓީއެމް އަކީ ފަތުރުވެރިކަމުގެ ދައިރާގެ ވިޔަފާރިތަށް އިޝްތިހާރު ކުރުމަށް ލިބިގެންދާ ރަނުގެ ފުރުސަތެއް ކަމަށް ފަތުރުވެރިކަމުގެ ދައިރާގެ ވިޔަފާރިވެއިން ބުނެފިއެވެ.

މޯލްޑިވްސް ގެޓަވޭސްއިން އިންތިޒާމުކޮށްގެން ޓްރެވެލް ޓްރޭޑް ޝޯ އޮފް މޯލްޑިވްސް (ޓީޓީއެމް) ގެ ނަމުގައި ކުރިއަށްގެންދާ މި ޓްރޭޑް ޝޯ ކުރިއަށް ގެންދަނީ ޖުލައި 12 އިން 13 އަށެވެ. މި ޓްރޭޑް ޝޯގެ ތެރެއިން 100 އަށް ވުރެ ގިނަ ރިސޯޓްތަކާއި ހޮޓެލް ބައިވެރިވާއިރު 150 އަށް ވުރެ ގިނަ އިންޓަރނޭޝަނަލް އޭޖެންޓުން ވެސް މި ޝޯގައި ބައިވެރިވެއެވެ.

މި ޓްރޭޑް ޝޯގައި އަދާރަން ރިސޯޓްސް އާއި ޔުނިވަރސަލް ރިސޯޓްސްގެ އިތުރުން ކްރައުން އެންޑް ޗަމްޕާ ރިސޯޓްސް އަދި ބަންޑޮސް މޯލްޑިވްސް އާއި ވިލާ ހޮޓެލްސް އެންޑް ރިސޯޓްސް ފަދަ ރާއްޖޭގެ ފަތުރުވެރިކަމުގެ ދާއިރާގައި ފާހަގަކޮއްލެވޭ ކުންފުނިތަކުން ބައިވެރިވެއެވެ. މީގެ އިތުރުން މޯލްޑިވިއަން އާއި ޓްރާންސް މޯލްޑިވިއަން އެއަރވޭސް ފަދަ ކުންފުނިތަކުންވެސް މި ޓްރޭޑް ޝޯގައި ބައިވެރިވެއެވެ.

ޓްރެވެލް ޓްރޭޑް މޯލްޑިވްސްގެ ތެރެއިން ބުދަ ދުވަހުގެ ހެނދުނު ވަނީ ހޮޓެލިއަރ ސަމިޓް މޯލްޑިވްސް ކުރިއަށްގެންގޮސްފައެވެ. މި ސަމިޓްގައި ފަތުރުވެރިކަމުގެ ދައިރާގެ ގިނަ އަދަދެއްގެ ޖެނެރަލް މެނޭޖަރުން ވަނީ ބައިވެރިވެފައެވެ. އެގޮތުން ގާތްގަނޑަކަށް 110 ކުންފުނީގެ ފަރާތުން 90 ވަރަކަށް ޖެނެރަލް މެނޭޖަރުން ވަނީ ބައިވެރިވެފައެވެ.

ބުދަ ދުވަހުގެ ހަވީރު އާޓް ގެލެރީގައި ވަނީ ކުންފުނިތަކުން ކުރިން ހަމަޖައްސާފައިވާ ޕްރީ ބުކް މީޓީންތައް ކުރިއަށްގެންގޮސްފައެވެ. އެގޮތުން ޝޯގައި ބައިވެރިވާ 100 އަށް ވުރެ ގިނަ ކުންފުނިތަކަށް ތިރީހަށް ވުރެ ގިނަ މީޓިން ބޭއްވޭނެ ކަމަށް މޯލްޑިވްސް ގެޓަވޭސް އިން ބުނެއެވެ. މި ބައްދަލުވުންތަކާއި އެކު މި ޝޯގައި ގާތްގަނޑަކަށް ޖުމްލަ 3000 މީޓިން ކުރިއަށްދާނެ ކަމަށް ޓީޓީއެމް އިންތިޒާމްކުރާ މޯލްޑިވްސް ގެޓައޭސްއިން ބުނެއެވެ.

ޓީޓީއެމް އާއި ގުޅޭ ގޮތުން ކަރައުން އެންޑް ޗަމްޕާ ރިސޯޓްސްގެ ފަރާތުން އެ ކުންފުނީގެ ޗެއާމަން ހުސައިން އަފީފު ވިދާޅުވީ، މިފަދަ ޓްރޭޑް ޝޯއެއް ބޭއްވިގެން ދިއުމުން ރާއްޖޭގެ ފަތުރުވެރިކަން ވަރަށް ބޮޑަށް އިޝްތިހާރުވެ، އިތުރު މާކެޓްތަކަށް ރާއްޖެ ތަޢާރުފުވުމަށް ފުރުސަތު ލިބިގެންދާނެ ކަމަށެވެ.

މީގެ އިތުރުންވެސް މި ޓްރޭޑް ޝޯއިން ތަފާތު އޭޖެންޓުންނާއި ދިމާވެ، ވިޔަފާރި އިތުރަށް ފުޅާ ކުރުމަށް ފުރުސަތުތަކެއް ލިބިގެންދާނެ ކަމަށް ވިޔަފާރިވެރިން ބުނެއެވެ.

ޓީޓީއެމް އާއި ގުޅޭ ގޮތުން މޯލްޑިވްސް ގެޓަވޭސް މޯލްޑިވްސްގެ ޗީފް އޮޕަރޭޓިން އޮފިސަރ ޑރ ހުސައިން ސަނީ އުމަރު ވިދާޅުވީ، މި ޓްރެވެލް ފެއަރގައި ބައިވެރިވަނީ ދުނިޔޭގެ މަޝްހޫރު އެކި ޓްރެވްލް ޓްރޭޑް ޝޯ ތަކުގައި ބައިވެރިވާ މަޝްހޫރު ފަރާތްތަކުން ކަމަށާއި އެފަރާތްތައް ރައްޖޭގައި ހުރިހާ ހަރަދެއް ބަލަހައްޓަނީވެސް މޯލްޑިވްސް ގެޓަވޭސްގެ ފަރާތުން ކަމަށެެވެ.

"ޓޮޕް ޓެން މާކެޓުން ފަށައިގެން އިންޑިޔާ އާއި ސްވިސްލޭންޑްގެ އިތުރުން ޗައިނާ އާއި ޖާމަނީގެ އޭޖެންޓުން ބައިވެރިވާނެ. މާދަމާ ރޭ އޮންނާނެ އާދާރަންގައި ގާލާ ނައިިޓް. ބުރާސްފަތި ދުވަހުގައި ކެރިއަރ ފެއާ ވެސް އޮންނާނެ" ޑރ ސަނީ ވިދާޅުވިއެވެ.

ޓީޓީއެމްގެ ތެރެއިން ތަފާތު ހަރަކާތްތައް ބޭއްވުމަށް ވަނީ ހަމަޖެހިފައެވެ. އެގޮތުން މޯލްޑިވްސް ޓްރެވެލް އެވޯޑްސް ދިނުމުގެ ހަރަކާތްތައް ކުރިއަށްގެންދިއުމަށް ހަމަޖެހިފައިވާއިރު، ގާލާ ނައިޓެއްވެސް ބޭއްވުމަށް ވަނީ ހަމަޖެހިފައެވެ. މީގެ އިތުރަށް ކެރިއަރ ފެއާވެސް ޓީޓީއެމްގެ ތެރެއިން ބޭއްވުމަށް ވަނީ ހަމަޖެހިފައެވެ.