ލޯކަލް މާރުކޭޓާއި ދަތުރުވެރިންގެ މާރުކޭޓު ގޮޅިތައް އަދި ގާޑިޔާތަށް ކުއްޔަށް ދޫކުރަން ނިންމައިފި

މާލޭ ލޯކަލް މާރުކޭޓާއި ދަތުރުވެރިންގެ މާރުކޭޓު ގޮޅިތައް އަދި ގާޑިޔާ ތައް ކުއްޔަށް ދޫކުރަން ހައުސިންގ މިނިސްޓްރީން ނިންމައިފިއެވެ.

އެމިނިސްޓްރީން އާންމުކޮށްފައިވާ އިއުލާނެއްގައި ބުނެފައިވަނީ ކުއްޔަށް ދޫކުރުމަށް ހަމަޖެހިފައިވާ ތަންތަނަކީ މާލޭ ލޯކަލް މާރުކޭޓުގެ ގޮޅިތަކާއި، ދަތުރުވެރިންގެ މާރުކޭޓުގެ ގޮޅިތަކުގެ އިތުރުން މާލޭ ބޮޑުތަކުރުފާނުމަގުން ގާޑިޔާ ހިންގުމަށް ކުއްޔަށް ދޫކުރެވޭ ތަންތަން ކަމަށެވެ.

އެގޮތުން ކުއްޔަށް ދޫކުރާ ތަނުގެ މަހު ކުއްޔަކީ މިއިން ކޮންމެ ތަނަކުންވެސް 2000 ރުފިޔާއަށް ކަމަށާއީ ކުއްޔަށް ދޫކުރެވޭނީ 1 އަހަރު ދުވަހަށް ކަމަށް ހައުސިން މިނިސްޓްރީން ބުންޏެވެ.

އެހެންކަމުން މިކަމަށް ޝައުޤުވެރިވާ ފަރާތްތަކުން 2017 ޖުލައި 20 ވާ ބުރާސްފަތި ދުވަހުގެ 13:00 ގެ ކުރިން އެ މިނިސްޓްރީއަށް ފޯމް ހުށަހެޅުމަށް ވަނީ އެދިފައެވެ.

މި ކަމަށް އެދޭ ފޯމް އެ މިނިސްޓްރީގެ ވެބްސައިޓުންނާއި ކައުންޓަރުން ލިބެންހުންނާނެ ކަމަށާއި ކޮންމެ މީހަކަށްވެސް ހުށަހެޅޭނީ، އެ ހުށަހަޅާތަނަކަށް އެއްފޯމު ކަމަށް ވަނީ ބުނެފައެވެ.

އަދި މިތަންތަން ދޫކުރެވޭނީވެސް ވަކި އުސޫލެއްގެ ދަށުން އެންމެ މަތިން މާކުސް ލިބޭ ފަރާތްތަކަށް ކަމަށްވާއިރު ހުށަހަޅާ ފޯމްތަކަށް މާކްސް ދެވޭނެ ގޮތް މިހާރު ވެބްސައިޓުން ފެންނަން ހުންނާނެ ކަމަށް ހައުސިންގ މިނިސްޓްރީން ބުންޏެވެ.