ބީއެމްއެލްއިން ރާއްޖޭގައި ޑައިނަމިކް ކަރަންސީ ކޮންވަރޝަންގެ ޚިދުމަތް ފަށައިފި

ބޭރުގެ އެކި ޤައުމުތަކުގެ ފައިސާ ބޭނުންކޮށްގެން ރާއްޖޭގައި ވިޔަފާރިކޮށް، ޚިދުމަތް ހޯދޭނެ ފަސޭހަ ޚިދުމަތެއް ބޭންކް އޮފް މޯލްޑިވްސް އިން ތަޢާރުފުކޮށްފިއެވެ.

ހޯމަ ދުވަހު މީރު އައިލެންޑް ރިސޯޓް އެންޑް ސްޕާގައި ބޭއްވި ރަސްމިއްޔާތެއްގައި ޑައިނަމިކް ކަރަންސީ ކޮންވަރޝަންގެ ނަމުގައި ފެށި މި ޚިދުމަތަކީ، ބޭރު ފައިސާ އެކައުންޓްތައް ގެންގުޅޭ ފަތުރުވެރިންނާއި ބިދޭސީ މަސައްކަތްތެރިނާއި އެހެނިހެން ފަރާތްތަކަށް ވެސް ރާއްޖޭގައި އެފަރާތެއްގެ އެކައުންޓްގައި ހުރި ފައިސާގެ ބާވަތަކުން ވިޔަފާރި ކުރުމަށް މަގުފަހި ކުރާ ޚިދުމަތެކެވެ.

Advertisement

އެގޮތުން، މި ޚިދުމަތުގެ ތެރެއިން، މިސާލަކަށް ދިރުހަމް އެކައުންޓެއް ގެންގުޅޭ ފަތުރުވެރިއަކު ރިސޯޓަކުން ޚިދުމަތް ހޯދުމަށް ފަހު އެ ޚިދުމަތަށް ފައިސާ ދައްކައިރު، ޕީއޯއެސް ބޭނުންކޮށްގެން، ޚިދުމަތަށް ދިރުހަމް އިން ފައިސާ ދެއްކޭނެ އުސޫލް ހަމަޖެހިގެން ދާނެއެވެ. މިގޮތަށް ފައިސާ ދެއްކުމުން، ބީއެމްއެލްއިން ޚިދުމަތްދޭ ފަރާތުގެ އެކައުންޓަށް މި ފައިސާ ޖަމާކުރާނީ ޚިދުމަތްދޭ ފަރާތް ބޭނުންވާ ފައިސާގެ ބާވަތަކުންނެވެ.

މި ޚިދުމަތް ތަޢާރުފުކޮށްދެއްވުމަށް ފަހު، ޚިދުމަތާ ގުޅޭ ގޮތުން ވާހަކަ ދައްކަވަމުން، ބޭންކް އޮފް މޯލްޑިވްސްގެ ޑިރެކްޓަރ އޮފް ބިޒްނަސް، ކުލްދީޕް ޕާލިވާލް ވިދާޅުވީ، މިއީ ވިޔަފާރިވެރިންނާއި ކަސްޓަމަރުންނަށްވެސް ގިނަ ފަސޭހަތަކެއް ވެގެންދާނެ، ވަރަށް ބޮޑަށް ދެފުށް ފެންނަ ފަދަ ގޮތަކަށް ފަރުމާކުރެވިފައިވާ ޚިދުމަތެއް ކަމަށެވެ.

ރަސްމިއްޔާތުގައި ކަސްޓަމަރެއްގެ ޚައިސިއްޔަތުން ވާހަކަ ދައްކަވަމުން، ކްރައުން އެންޑް ޗަމްޕާ ރިޒޯޓްސްގެ ސީއީއޯ، ޑޭވިޑް ފެއިންބަރގް ވިދާޅުވީ، މިއީ ޚާއްސަކޮށް، ފަތުރުވެރިކަމުގެ ދާއިރާގައި ޚިދުމަތްދޭ ފަރާތްތަކަށް ވަރަށް މުހިއްމު އަދި ޚިދުމަތް ހޯދާ ފަރާތްތަކަށް ގިނަ ލުއި ފަސޭހަތަކެއް ލިބިގެންދާނެ ޚިދުމަތެއް ކަމަށެވެ.

ބޭންކް އޮފް މޯލްޑިވްސް އިން ބުނީ މި ޚިދުމަތް ރާއްޖޭގައި ތަޢާރުފު ކުރެވުމުން، ދުނިޔޭގެ ކުރިއަރާފައިވާ ޤައުމުތަކުގައި ދެމުންދާ މިފަދަ ޚިދުމަތްތަކާއި އަރައި ފައި ހަމަ ކުރެވުނީ ކަމަށެވެ. އެ ބޭންކުން މަޢުލޫމާތުދޭ ގޮތުގައި މި ޚިދުމަތް ތަޢާރުފު ކުރެވިގެންދާއިރު، ދުނިޔޭގައި އާންމުކޮށް ބޭނުންކުރާ 15 ބާވަތެއްގެ ފައިސާއިން ވިޔަފާރި ކުރުމަށް މި ޚިދުމަތް ބޭނުން ކުރެވޭނެއެވެ.

.