ކޮވިޑް-19 ވެކްސިންގެ ފުރަތަމަ ބެޗް ހޯމަ ދުވަހު އެގައުމަށް ލިބޭނެކަމަށް ގަތަރުގެ ބޮޑުވަޒީރު ޝެއިޚް ޚާލިދު ބިން ޚަލީފާ ބިން އަބްދުލްއަޒީޒު އަލް ޘާނީ ވިދާޅުވެއްޖެއެވެ.

އެކަން ހާމަކުރައްވަމުން ބޮޑުވަޒީރު ކުރެއްވި ޓްވީޓެއްގައި ވިދާޅުވީ ގަތަރުގެ އަމީރުގެ ސީދާ އިރުޝާދުގެ ދަށުން ކޮވިޑް-19 ވެކްސިންގެ ފުރަތަމަ ޝިޕްމަންޓް ހޯމަ ދުވަހު ގަތަރަށް އަންނާނެއެވެ. އަދި އެކުލަވާލާފައިވާ ސްޓޭންޑަރޑާއި އެއްގޮތްވާ ގޮތުގެމަތިން ވެކްސިން ދޭންޖެހޭ މީހުންނަށް ވެކްސިން ދިނުމުގެ ކަންކަން ކުރުމަށް ސިއްހީ މަސައްކަތްތެރިންނަށް އަންގާފައިވާކަމަށް ބޮޑުވަޒީރު ވަނީ ވިދާޅުވެފައެވެ.

"މިއީ ޕެންޑަމިކް ނިމުމަކަށް ގެނެސް އާންމު ދިރިއުޅުމަށް ރުޖޫޢުވުމަށް އެޅުނު މުހިންމު ފިޔަވަޅެއް." ބޮޑުވަޒީރުގެ ޓްވީޓްގައި ވިދާޅުވެފައިވެއެވެ.

އެހެންނަމަވެސް ވެކްސިން ދިނުމުގެ ކެމްޕެއިން ފަށާނެ ތާރީޚެއް އަދި ސާފެއްނުވެއެވެ.

މިނިސްޓަރ އޮފް ޕަބްލިކް ހެލްތުގެ އެޑްވައިޒަރ ކޮންސަލްޓަންޓް އަބްދުލް ވައްހާބު އަލް މޫސަލް މިދިޔަ ހަފްތާގައި މީޑިޔާތަކަށް މައުލޫމާތު ދެއްވަމުން ވިދާޅުވެފައިވަނީ އެންމެ ފުރަތަމަ ވެކްސިން ލިބޭނީ ބޮޑެތި ބަލިތައް ހުންނަ މީހުންނަށާއި އުމުރުން ދުވަސްވީ މީހުންނަށްކަމަށެވެ. ގަތަރަށް ގެންނަނީ ފައިޒަރ އާއި ބައޯއެންޓެކްގެ ވެކްސިނެވެ.

ހޮނިހިރު ދުވަހު ގަތަރުން 142 މީހުންނަށް ވައިރަސް ޖެހިފައިވާއިރު ވައިރަސް ޖެހުނު މީހުންގެ އަދަދު ވަނީ 141،858ށް އަރާފައެވެ. އަދި 243 މީހުން ވަނީ މަރުވެފައެވެ. މިހާތަނަށް އައިއިރު ބަލިޖެހިފައިވާ މީހުންގެ ތެރެއިން 139،521 މީހުން ވަނީ އެބަލިން ރަނގަޅުވެފައެވެ.