އެފްރިކާ ސަރަހައްދުގައި ހަރަކާތްތެރިވާ ޓެރަރިސްޓް ޖަމާއަތެއް ކަމުގައިވާ ބޯކޯ ހަރާމުން ރަހީނުކުރި ދަރިވަރުންތައް ދޫކޮށްލަން ނިންމުމުން ނައިޖީރިއާގެ ރައީސް މުހައްމަދު ބުހާރީ މަރުހަބާ ވިދާޅުވެއްޖެއެވެ.
ނައިޖީރިއާގެ ސާނަވީ ސްކޫލުއްގައި ކިޔަވާ 100 ދަރިވަރުން ބޯކޯ ހަރާމުން ރަހީނު ކޮށްފައިވަނީ އަންގާރަ ދުވަހުއެވެ. ބޯކޯ ހަރާމް ޖަމާއަތަށް ނިސްބަތްވާ ހަނގުރާމަވެރިން ވަނީ ހަތިޔާރާއެކު ސްކޫލަށް ވަދެ، ކުޑަ ވަގުތުކޮޅެއްގެ ތެރޭގައި އެ މީހުންގެ ބާރުގެ ދަށަށް އެ ތަން ގެނެސްފައެވެ. އަދި ފަހުން އެ ޖަމާއަތުން ވަނީ ސްކޫލުން ރަހީނުކުރި ކުދިންގެ ފޮޓޮޔާއި ވީޑިއޯ އާއްމުކޮށްފައެވެ.
ކިޔަވާ ކުދިން ދޫކޮށްލަން ނިންމުމުން މަރުހަބާ ދަންނަވަމުން ނައިޖީރިއާގެ ރައީސް ބުހާރީ ވިދާޅުވީ، މިއީ ސަރުކާރުން ކުރި މަސައްކަތަށް ލިބުނު ބޮޑު ކުރިއެރުމެއްކަމަށެވެ. އެހެންކަމުން މި މަސައްކަތުގައި ހަރަކާތްތެރިވި އެ ގައުމުގެ ސިފައިންނާއި، އިންޓެލިޖެންސް އިދާރާތައް އަދި ފުލުހުންނަށް ޝުކުރު އަދާކުރެއްވިއެވެ. އަދި ކުރިޔަށް އޮތް ތަނުގައި މިފަދަ އަމަލެއް ތަކުރާރު ނުވާނެކަމުގެ ޔަގީންކަން ނައިޖީރިއާ ރައްޔިތުންނަށް އަރުވާކަމަށް އެ މަނިކުފާނު ވިދާޅުވިއެވެ.
އެފްރިކާގެ ބައެއް ގައުމުތަކުގައި ހަރަކާތްތެރިވާ ބޯކޯ ހަރާމް ޖަމާއަތަކީ، ދުނިޔޭގެ ގިނަ ގައުމުތަކަކުން ޓެރަރިސްޓް ޖަމާއަތެއްގެ ގޮތުގައި ކަނޑައަޅާފައިވާ ޖަމާއަތެކެވެ. އަލް-ގައިދާއަށް ބައިއަތު ހިފާފައިވާ މި ޖަމާއަތުން ވަނީ މީގެކުރިންވެސް އެކި ފަހަރުމަތިން ނައިޖީރިއާގެ ކިޔާވާ ކުދިން ރަހީނުކޮށް، ސްކޫލްތަކަށް ނުރައްކާތެރި އެތައް ހަމަލާއެއް ދީފައެވެ.
