ނައިޖީރިޔާގެ ތެޔޮނަގާ ޓީމަށް ބޮކޯ ހަރާމުން ދިން ހަމަލާއެއްގައި 50 އަށްވުރެ ގިނަ މީހުން މަރާލައިފި

ނައިޖީރިއާގެ ބޮކޯ ހަރާމް ޖަމާއަތުން އެގައުމުގެ އިރުއުތުރުގައި ތެޔޮނެގުމުގެ މަސައްކަތުގައި އުޅޭ ޓީމަށް އަމާޒުކޮށް މި ހަފްތާގެ ކުރީކޮޅު ދިން ހަމަލާގައި 50 އަށްވުރެ ގިނަ މީހުން މަރާލި ކަމަށް އެތައް މަސްދަރުތަކަކުން އޭއެފްޕީއަށް މައުލޫމާތު ދީފައިވާކަމަށް އެ އެޖެންސީން ބުނެފިއެވެ.

އަންގާރަ ދުވަހު ދިން މި ހަމަލާގައި މަރުވި މީހުންގެ އަދަދު އިތުރުވާނެކަމުގެ އިންޒާރުވެސް ވަނީ ދީފައެވެ.

ބޯނޯ ސްޓޭޓްގެ މަގުމެރި ސަރަހައްދުގައި ދިން މި ހަމަލާ އަމާޒުކޮށްފައިވަނީ ނައިޖީރިއަން ނޭޝަނަލް ޕެޓްރޯލިއަމް ކޯޕަރޭޝަންގެ ސްޕެޝަލިސްޓުންގެ ގްރޫޕަކަށެވެ. މިއީ މަހުގެ ތެރޭގައި ދިން އެ ޖަމާއަތުން ދިން އެންމެ ނުރައްކާތެރި ހަމަލާއެވެ.

އެންމެ ފުރަތަމަ ހީކުރެވިފައި އޮތީ މިއީ ކިޑްނޭޕް ކުރުމުގެ ހާދިސާއެއް ކަމަށެވެ.

އަސްކަރިއްޔާގެ ކޮންޓްރޯލްގެ ދަށުގައި އޮންނަ ބޯނޯއަށް ވަނުން އަސްކަރިއްޔާއިން ހަރުކަށިކޮށް މަނާކޮށްފައިވުމާއެކު މި ހަމަލާގެ ހަބަރު ލިބުން ލަސްވެ މަރުވި މީހުންގެ ސީދާ އަދަދު ލިިބުންވަނީ ދަތިވެފައެވެ.

ނައިޖީރިއާގައި 2009 ވަނަ އަހަރުން ފެށިގެން ހިނގަމުންދާ ހަމަނުޖެހުން ތަކުގައި އެ ގައުމުގެ މުއާސަލާތީ ވިއުގައާއި އިންްފްރާ ސްޓްރަކްޗަރ ހަލާކުވެފައިވާއިރު މިހާތަނަށް 20,000އަށްވުރެ ގިނަ މީހުން މަރުވެ 2.6 މިލިއަނަށްވުރެ ގިނަ މީހުންވަނީ ގެދޮރު ގެއްލިފައެވެ.