ބޯކޯ ހަރާމް: ވަގަށްނެގި 112 ކުދިންގެ ތެރެއިން ދުނިޔޭގައިތިބީ 15 ކުދިން ކަމަށް ނޫސްވެރިޔަކު ބުނެފި
112 ކުދިން ދޫކޮށްދިނުމަށް މިހާރުވެސް މަޝްވަރާކުރަން: ސަރުކާރު
ޗިބޮކް ދަރިކޮޅުގެ އަންހެން ކުދިންގެ ތެރެއިން 276 ދަރިވަރުން ވަގަށް ނަގާފައި ވަނީ މީގެ ހަތަރު އަހަރު ކުރިން
ނައިޖީރިއާގެ ހަނގުރާމަވެރި ޖަމާއަތް، ބޯކޯ ހަރާމްއިން ވަގަށް ނަގާފައިވާކަމަށް ބެލެވޭ 112 އަންހެން ކުދިންގެ ތެރެއިން މިހާރު ދުނިޔޭގައި ތިބީ އެންމެ 15 ކުދިންކަމަށް ބޯކޯ ހަރާމް ޖަމާއަތާއި ގުޅުން އޮންނަ ނައިޖީރިއާގެ ނޫސްވެރިއަކު ބުނެފިއެވެ.
ޗިބޮކް ދަރިކޮޅުގެ އަންހެން ކުދިންގެ ތެރެއިން 276 ދަރިވަރުން ވަގަށް ނަގާފައި ވަނީ މީގެ ހަތަރު އަހަރު ކުރިންނެވެ. އެތައް ކުދިންނެއް މިހާރުވަނީ ދޫކޮށްލާފައެވެ.
އަހުމަދު ސަލްކިޑާ ބުނީ ސަރުކާރުގެ ފަރާތުން އޭނާ ހަނގުރާމަވެރިންނާ މަޝްވަރާކޮށް އެތައް ހުށަހެޅުމެއް ހުށަހަޅާފައިވާ ނަމަވެސް އެތައް ފުރުސަތުތަކެއް ގެއްލިފައިވާކަމަށެވެ.
ނައިޖީރިޔާގެ ސަރުކާރުން ބުނީ ބައެއް ކުދިން މަރުވެފައިވާކަމަށް ވިސްނަންވީ ސަބަބެއް ނެތްކަމަށެވެ.
ސަރުކާރުގެ ތަރުޖަމާނު ބީބީސީގައި ބުނެފައިވަނީ ގެއްލިފައިވާ 112 ކުދިން ދޫކޮށްދިނުމަށް ސަރުކާރުން މިހާރުވެސް ގެންދަނީ ބޯކޯ ހަރާމް ޖަމާއަތާއެކު މަޝްވަރާ ކުރަމުން ކަމަށެވެ.
ނޫސްވެރިޔާ ސަލްކިޑާ ބުނީ ކުދިން ވަގަށްނެގިތާ ދެ ހަފްތާފަހުން އެ ގައުމުގެ އޭރުގެ ރައީސް ގުޑްލަކް ޖޮނަތަން އޭނާގެ ގާތުގައި ހަނގުރާމަވެރިންނާއި މަޝްވަރާކޮށްދިނުމަށް އެދިވަޑައިގެންނެވި ކަމަށެވެ.
އޭނާ ބުނީ ގައިދީންނާއި ކުދިން ބަދަލުކުރުމުގެ މަސައްކަތްތައް ފަސް ފަހަރެއްގެ މަތިން އޭނާ އިންތިޒާމު ކޮށްދިން ކަމަށާއި ނަމަވެސް ސަރުކާރުން މާބޮޑަށް ލަސްކުރުމުގެ ސަބަބުން މަޝްވަރާތައް ރޫޅިގެން ދިޔައީ ކަމަށެވެ.
