ނައިޖީރިއާގައި ރަހީނުކުރި ސްކޫލް ކުދިން ސަލާމަތްކޮށްފި
މި ހާދިސާ ހިނގައިފައި ވަނީ ނައިޖީރިއާ ސަރުކާރުން ހިންގަމުން އަންނަ ހަމައެކަނި އަންހެން ކުދިންނަށް ކިޔަވައިދޭ ސްކޫލުގައި
ނައިޖީރިއާގެ ސްކޫލެއްގެ ކްލާސްރޫމް
ހަތިޔާރުއެޅި ބަޔަކު ނައިޖީރިއާގެ ސްކޫލަކަށް ގަދަކަމުން ވަދެގަނެ ރަހީނުކުރި 317 އަންހެން ދަރިވަރުން ސަލާމަތް ކޮށްފައިވާ ކަމަށް އެގައުމުން ބުނެފިއެވެ.
މި ހާދިސާ ހިނގައިފައި ވަނީ ނައިޖީރިއާ ސަރުކާރުން ހިންގަމުން އަންނަ ހަމައެކަނި އަންހެން ކުދިންނަށް ކިޔަވައިދޭ ސްކޫލުގައެވެ.
ނައިޖީރިއާގެ ރައީސް މުހައްމަދު ބުހާރީ ހޯމަ ދުވަހު ކުރެއްވި ޓްވީޓެއްގައި ވިދާޅުވީ އެއްވެސް އަނިޔާއެއް ނުވެ ރަހީނުކުރި ހުރިހާ ކުދިން ސަލާމަތް ކުރެވިފައިވާ ކަމަށާއި، އަދި އެކުދިންނާއި އެކުދިންގެ އާއިލާގެ އުފަލުގައި އެމަނިކުފާނު ބައިވެރިވެވަޑައިގަންނަވާ ކަމަށެވެ. މީގެ އިތުރުން ބުހާރީ ކުރެއްވި އިތުރު ޓްވީޓެއްގައި ވިދާޅުވީ ސްކޫލު ކުދިން ރަހީނު ކުރުމުގައި ހަރަކާތްތެރިވި ފަރާތްތަކުން ގާނޫނުގެ ކުރިމައްޗަށް ހާޒިރު ކުރެވޭނެ ކަމަށާއި، އެމީހުނަށް ހައްގު އަދަބު ދޭނެ ކަމަށެވެ.
މީގެ ކުރިންވެސް ނައިޖީރިއާގައި ވަނީ މިފަދަ ހާދިސާތަކެއް ހިނގައިފައެވެ. އެގޮތުން މިދިޔަ ޑިސެމްބަރު މަހުވެސް އެގައުމުގެ ޓެރަރިސްޓު ގްރޫޕެއް ކަމަށްވާ ބޯކޯ ހަރާމުން ވެސް ވަނީ ސްކޫލު ދަރިވަރުންތަކެއް ރަހީނުކޮށްފައެވެ. އެކަމަކު މިފަހަރުގެ ރަހީނުކުރުން އެއްވެސް ޖަމާއަތަކުން އަދި ޒިންމާ ނަގާފައިނުވެއެވެ.
