މިސްރުން އޯޑަރުކުރި ޗައިނާގެ ސިނޮފާމް ކޮވިޑް ވެކްސިންގެ ފުރަތަމަ ބެޗް އެ ގައުމަށް ލިބިއްޖެކަމަށް، އެ ގައުމުގެ ސިއްހަތާ ބެހޭ ވުޒާރާއިން ބުނެފިއެވެ.

މި ވެކްސިން ޑޯޒްތައް ލިބުނުކަން އިއުލާންކުރަން ގާހިރާގެ އިންޓަނޭޝަނަލް އެއަރޕޯޓްގައި ބޭއްވި ނޫސްވެރިންގެ ބައްދަލުވުމުގައި މިސްރުގެ ސިއްހަތާ ބެހޭ ވަޒީރު ހާލާ ޒައެދު ވިދާޅުވީ މިއީ ވަރަށް ތާރީޚީ ދުވަހެއްކަމަށެވެ. އަދި އެ ގައުމުގެ ސަރުކާރުން ނިންމާފައިވާ ފަދައިން އާންމުންނަށް ހިލޭ ވެކްސިން ލިބޭނެ މަގުފަހިވެގެންދާނެކަމަށް ވިދާޅުވިއެވެ.

މިސްރު ސަރުކާރުން ހިއްސާކޮށްފައިވާ މައުލޫމާތަށް ބަލާއިރު، ވެކްސިން ދިނުމުގައި އިސްކަންދޭނީ އައިސޮލޭޝަން ހޮސްޕިޓަލްގައި މަސައްކަތް ކުރަމުންދާ މެޑިކަލް ސްޓާފުންނާއި، ހައިރިސްކް މީހުންގެ އިތުރުން އުމުރުން ދުވަސްވީ މީހުންނަށެވެ. އަދި އާބާދީގެ ބާކީއަށް ވެކްސިން ޖެހުމުގެ ކަންކަން ކުރިއަަށް ގެންދާނީ އެއަށްފަހުއެވެ.

މި ވެކްސިންތައް މިސްރަށް ގެންގޮސްފައިވަނީ އެކުވަރި އަރަބި އިމާރާތް (ޔޫއޭއީ) ންނެވެ. އެ ގައުމުގައި އިމަރޖެންސީ ބޭނުންކުރަން މި ވެކްސިނަށް ހުއްދަދީ، ވެކްސިން ރަޖިސްޓްރީކުރިކަން އިއުލާނުކުރީ މި ހިނގާ ޑިސެމްބަރު މަހުގެ 9 ވަނަ ދުވަހުއެވެ. މި ވެކްސިން ބޭނުންކުރަން ހުއްދަދިނީ ވެކްސިންގެ ކްލިނިކަލް ޓްރަޔަލްތަކުގެ ނަތީޖާއަށް ބެލުމަށްފަހުއެވެ.

އެގޮތުން ޔޫއޭއީގެ މިނިސްޓްރީ އޮފް ހެލްތް އެންޑް ޕްރިވެންޝަންއިން ބުނާ ގޮތުގައި، ކޮވިޑުން ދިފާއުކޮށްދިނުމުގައި ސިނޮފާމްގެ ވެކްސިން 86 ޕަސެންޓް ކާމިޔާބެވެ. މިއީ މާކެޓުގައި ލިބެންހުރި ބައެއް ވެކްސިންތަކާ އަޅާކިޔާއިރު ރަނގަޅު އަދަދެކެވެ.