ޕްރޮސިކިއުޓަރ އަވަހާރަކޮށްލި މައްސަލައިގައި މިސްރުން ނުވަ މީހަކު މަރަން ހުކުމް އިއްވައިފި

މިސްރުގެ އެންމެ އިސް ޕަބްލިކް ޕްރޮސިކިއުޓަރ ހިޝާމް ބަރަކާތު 2015 ވަނަ އަހަރު އވަހާރަކޮށްލި މައްސަލައިގައި ނުވަ ފިރެހެނަކު މަރަން ކޯޓުން ހުކުމް ކޮށްފިއެވެ.

މަރުގެ ހުކުމް އިއްވި ނުވަ މީހުންނަކީ ވެރިރަށް ގާހިރާގައި ބަރަކާތު ދަތުރުކުރައްވަމުން ގެންދެވި ގާފިލާއަށް އަމާޒުކޮށް ކާރުބޮމުގެ ހަމަލާދިނުމުގައި ބައިވެރިވިކަމަށް ތުހުމަތުކުރެވުނު 28 މީހުންގެ ތެރޭގައި ހިމެނޭ ބައެކެވެ.

އެމްނެސްޓީ އިންޓަރނޭޝަނަލް އިން ވަނީ އެ މީހުންގެެ މައްޗަށް ކުުށް ސާބިތުކުރީ އެ މީހުންނަށް އަނިޔާކޮށްގެން ކަމަށް ތުހުމަތު ކުރެވޭ އަދި އިންސާފެއް ނެތް ޝަރީއަތެެއްގައި ކަމަށް ބުނެފައެވެ.

އެމްނެސްޓީން ވަނީ މި ޝަރީއަތަކީ އެ ގައުމުގައި އިންސާފު ނެތިފައިވާ ވަރު ދައްކުވައިދޭ ޝަރީއަތެއް ކަމަށް ބުނެފައެވެ.

މިސްރުގެ ކޯޓުތަކުން ވަނީ އެ ގައުމުގެ ފުރަތަމަ ޑިމޮކްރެޓިކް ރައީސް މުހައްމަދު މުރުސީ އަސްކަރީ ބަޣާވާތަކުން 2013 ވަނަ އަހަރު ވެރިކަމުން ވައްޓާލި ފަހުން ސިޔާސީ ހަމަނުޖެހުންތަކާ ގުޅުން ހުރި އެތައް ސަތޭކަ ބައެއްގެ މައްޗަށް މަރުގެ ހުކުމް އިއްވާފައެވެ.

މިފަދަ މަރުގެ ހުކުމްތައް މަތީ ކޯޓުތަކުން ބަދަލުކޮށްފައިވާއިރު މި އަހަރުގެ މިހާތަނަށް 15 މީހެއްގެ މައްޗަށް މަރުގެ އަދަބު ތަންފީޒުކޮށްފައި ވެއެވެ.