އާދީއްތަ ދުވަހުގެ މަޖިލިސް ޖަލްސާއަށް މުހިއްމު 8 ކޮމިޓީ ރިޕޯޓެއްގެ މަސައްކަތް އެޖެންޑާކޮށްފި
ތިން ވަނަ ދައުރު ވަނީ އިތުރުކޮށްފަ
ރައްޔިތުންގެ މަޖިލިސް
އާދީއްތަ ދުވަހުގެ ރައްޔިތުންގެ މަޖިލީހުގެ ޖަލްސާއަށް މުހިއްމު 8 ކޮމިޓީ ރިޕޯޓެއްގެ މަސައްކަތް އެޖެންޑާކޮށްފި އެވެ.
އެ ދުވަހުގެ ޖަލްސާއަށް އެޖެންޑާކޮށްފައިވަނީ ކޮމިޓީތަކުން ހުށައަޅާ ކަންކަމުގެ ދަށުން 8 ރިޕޯޓެއްގެ މަސައްކަތް އެކަންޏެވެ.
އެގޮތުން ދިވެހިރާއްޖޭގެ މާލީ ސެކިއުރިޓީޒް އާ ބެހޭ ގާނޫނަށް އިސްލާހު ގެނައުމުގެ ބިލް، މާލިއްޔަތު ކޮމިޓީން ދިރާސާކޮށް ނިންމި ގޮތުގެ ރިޕޯޓާއި އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނަށް އިސްލާހު ގެނައުމުގެ ބިލު ލާމަރުކަޒީ ކޮމިޓީން ދިރާސާ ކޮށް ނިންމު ގޮތުގެ ރިޕޯޓު ހުށައެޅުމަށް ވަނީ އެޖެންޑާކޮށްފައެވެ.
މީގެއިތުރުން، މަޖިލީހުގެ ސަލާމަތީ ހިދުމަތްތަކާ ބެހޭ ކޮމިޓީއިން ދިރާސާ ކުރި ގިނަ ރިޕޯޓުތަކެއްގެ މަސައްކަތްވެސް ވަނީ އެޖެންޑާކޮށްފައެވެ. އެގޮތުން މ. އުޖާލާގެ ބަލައި ފާސްކުރުމަށް ފުލުހުން ހިންގި އޮޕަރޭޝަނާ ގުޅިގެން ފުލުހުންގެ ތެރެއިން ބަޔަކު އިހުތިޖާޖް ކުރަމުންދިޔަ މައްސަލައާއި އާއި 18 ވަނަ ރައްޔިތުންގެ މަޖިލީހުގެ ސަލާމަތީ ޚިދުމަތްތަކާ ބެހޭ ކޮމިޓީއަށް ހުށައެޅުމު މައްސަލަަތަކުގެ ތެރެއިން ކޮމިޓީން ބަލައިގަތް މައްސަލަތަކުގެ އިތުރުން ރ. މީދޫ ހުސްނުހީނާގެ އަހުމަދު އަނީސްއަށް ފުލުހުން އަނިޔާކުރި ކަމަށް ތުހުމަތު ކުރެވޭ މައްސަލަ ދިރާސާކޮށް ނިންމު ގޮތުގެ ރިޕޯޓު ހިމެނެ އެވެ.
އަދި އަނިޔާއިން ކުޑަކުދިން ރައްކާތެރިކުރުމަށް އެދި ހުށައަޅާފައިވާ ޕެޓިޝަން ދިރާސާ ކޮށް ނިންމި ގޮތުގެ ރިޕޯޓުވެސް ވަނީ އެޖެންޑާކޮށްފަ އެވެ.
އާދީއްތަ ދުވަހު މަޖިލީހުގެ ޖަލްސާއެއް ބޭއްވުމަށް އެޖެންޑާކޮށްފައިވާއިރު، މުހިއްމު މަސައްކަތްތައް ނިންމުމަށްޓަކައި މިއަހަރުގެ ތިން ވަނަ ދައުރުވެސް ވަނީ ޑިސެމްބަރު 7 ވަނަ ދުވަހަށް އިތުރުކޮށްފަ އެވެ.
