ސްރީލަންކާގެ 69 ވަނަ މިނިވަން ދުވަހުގެ މުނާސަބަތުގައި، ރާއްޖޭގެ ރައީސުލްޖުމްހޫރިއްޔާ އަބްދުﷲ ޔާމީން އަބްދުލްގައްޔޫމް ތަހުނިޔާ ފޮނުއްވައިފި އެވެ.

ސްރީލަންކާގެ ރައީސް މައިތިރިޕަލާ ސިރިސޭނައަށާއި ބޮޑުވަޒީރު ރަނިލް ވިކްރަމަސިންގައަށް، ދެ ބޭފުޅުންނަށް ވަކިވަކިން ރައީސް ޔާމީން ފޮނުއްވާފައިވާ މެސެޖްގައި ވަނީ ދިވެހި ސަރުކާރާއި ރައްޔިތުންގެ ނަމުގައި އަދި ރައީސް ޔާމީންގެ އަމިއްލަ ނަންފުޅުގައި، ސްރީލަންކާގެ ސަރުކާރަށާއި ރައްޔިތުންނަށް ސްރީލަންކާގެ 69 ވަނަ މިނިވަން ދުވަހުގެ ހެޔޮއެދުމާއި ތަހުނިޔާ އާއި ހޫނު މަރުހަބާއެއް ދަންނަވާ ކަމަށެވެ.

މީގެ އިތުރުން، އެމެސެޖްގައި ވަނީ ރާއްޖެ އާއި ސްރީލަންކާއާ ދެގައުމުގެ ދެމެދުގައި އުފެދިފައިވާ ޒަމާންވީ ގާތްގުޅުން، ކުރިއަށް އޮތް އަހަރުތަކުގައި އިތުރަށް ބަދަހިވެގެންދާނެ ކަމަށް ޔާގީން ކުރައްވާ ކަމަށާއި، އެއްގައުމު އަނެއް ގައުމަކީ ސަރަހައްދީ އަމާންކަން ދެމެހެއްޓުމަށްޓަކައި މަސައްކަތްކުރާ، ތަރައްގީގެ ބައިވެރިންކަމުގައި ވާނޭ ކަމަށް އުއްމީދު ކުރައްވާ ކަމަށް ވެސް ރައީސް ޔާމީންގެ އެ މެސެޖްގައި ވެއެވެ.

ރައީސް ޔާމީންގެ އެ މެސެޖް ނިންމަވާ ލައްވަމުން ވިދާޅުވެފައި ވަނީ ސްރީލަންކާގެ ރައްޔިތުންނަށް ފާގަތި، އުފާވެރި މުސްތަގްބަލަކަށް އެދިވަޑއިގަންނަވާ ކަމަށެވެ.