ޔުއެފާ ޗެމްޕިއަންސް ލީގުގައި އަންގާރަ ދުވަހުގެރޭ ޝަޚްތަރު ޑޮނެސްކް އަތުން ބަލިވެ ފުރަތަމަ ފަހަރަށް ޔޫރޮޕާ ލީގަށް ވެއްޓުމުގެ ބިރާ ރެއާލް މެޑްރިޑް ކުރިމަތިލާން ޖެހުނުއިރު، ބޮރޫޝިއާ މޮންޗެންގްލަޑްބަކް ބަލިކޮށް ދެވަނަ ބުރަށް ދިއުމުގެ އުންމީދު އިންޓަ މިލާނުން އާކޮށްފިއެވެ.

ގްރޫޕް ބީގައި ހިމެނޭ ކޮންމެ ޓީމެއްވެސް މިހާތަނަށް ފަސް މެޗު ކުޅެފައިވާއިރު، ކޮންމެ ޓީމަކަށްވެސް ބާކީ އޮތީ އެއް މެޗެވެ. މި ގްރޫޕުގެ އެއްވަނައިގައި މި ވަގުތު މޮންޗެންގްލަޑްބަކް އޮތީ އަށް ޕޮއިންޓާއެކުއެވެ. ދެވަނައިގައި އޮތް ޝަޚްތަރާއި ތިންވަނައިގައި އޮތް ރެއާލަށް ލިބިފައިވަނީ ހަތް ޕޮއިންޓެވެ. އިންޓަ ހަތަރުވަނައިގައި އޮތީ ފަސް ޕޮއިންޓާއެކުއެވެ.

ޝަޚްތަރު އަތުން ޗެމްޕިއަންސް ލީގުގެ އެންމެ ކާމިޔާބު ޓީމު ކަމަށްވާ ރެއާލް ބަލިވީ 2-0 ންނެވެ. މި މެޗުން ރެއާލް ބަލިވިއިރު، މި ފަހަރުގެ ޗެމްޕިއަންސް ލީގުގެ ފުރަތަމަ މެޗުގައިވެސް ރެއާލް ވަނީ އަމިއްލަ ދަނޑުގައި 3-2 ން ޝަޚްތަރު އަތުން ބަލިވެފައެވެ.

ޝަޚްތަރުގެ ދަނޑުގައި އަންގާރަ ދުވަހުގެރޭ ކުޅުނު މެޗުގެ ފުރަތަމަ ހާފުގައި ލަނޑެއް ފެނިފައި ނުވި ނަމަވެސް، ދެވަނަ ހާފު ފަށައިގެން 12 ވަނަ މިނެޓުގައި އެ ޓީމުން ވަނީ ލީޑު ނަގާފައެވެ. މި ލަނޑު އެ ޓީމަށް ކާމިޔާބުކޮށްދިނީ ޑެންޓީނިއޯއެވެ. އަދި މެޗު ނިމެން އަށް މިނެޓަށް ވެފައި ވަނިކޮށް ޝަޚްތަރަށް ލީޑު ފުޅާކޮށްދިނީ މަނޯ ސަލޮމަނެވެ.

މީގެ އިތުރުން މޮންޗެންގްލަޑްބަކް 3-2 ން ބަލިކޮށް އިންޓަ ވަނީ ދެވަނަ ބުރަށް ދިއުމުގެ އުންމީދު އާކޮށްފައެވެ.

މޮންޗެންގްލަޑްބަކުގެ ދަނޑުގައި އަންގާރަ ދުވަހުގެރޭ ކުޅުނު މެޗުގެ 17 ވަނަ މިނެޓުގައި މަޓެއޯ ޑާމިއަންގެ ލަނޑުން އިންޓައިން ލީޑު ނެގި ނަމަވެސް، ފުރަތަމަ ހާފުގެ އިތުރު ވަގުތުގައި އަލެކްސަންޑަ ޕްލެއާ ވަނީ މޮންޗެންގްލަޑްބަކަށް ނަތީޖާ އެއްވަރުކޮށްދީފައެވެ.

އެކަމަކު މެޗުގެ 64 ވަނަ މިނެޓުގައި ރޮމެލޫ ލުކާކޫ އިންޓައަށް ދެވަނަ ފަހަރަށް ލީޑު ނަގައިދިންއިރު، މެޗުގެ 73 ވަނަ މިނެޓުގައި ލުކާކޫ ވަނީ އިތުރު ލަނޑެއް ޖަހާ އިންޓައަށް ލީޑު ފުޅާކޮށްދީފައެވެ. އެކަމަކު އޭގެ ތިން މިނެޓު ފަހުން ޕްލެއާ ވަނީ ލަނޑެއް ޖަހާ މޮންޗެންގްލަޑްބަކަށް ފަރަގު ކުޑަކޮށްދީފައެވެ. އަދި 83 ވަނަ މިނެޓުގައި ޕްލެއާ އިތުރު ލަނޑެއް ޖެހި ނަމަވެސް، މޮންޗެންގްލަޑްބަކުގެ ކުޅުންތެރިއަކު އޮފްސައިޑުގައު ހުރި ކަމަށް ނިންމާ ވީޑިއޯ އެސިސްޓަންޓް ރެފުރީ (ވީއޭއާރް) ން އެ ލަނޑު ބަލައިގެންފައެއް ނުވެއެވެ.

ގްރޫޕް ބީން އަދި މިހާތަނަށް ޓީމެއް ދެވަނަ ބުރަށް ކޮލިފައިވެފައި ނުވާއިރު، އަންނަ ހަފުތާގައި ރެއާލް ނުކުންނާނީ އަމިއްލަ ދަނޑުގައި މޮންޗެންގްލަޑްބަކާ ދެކޮޅަށެވެ. އަދި އިންޓަ ނުކުންނާނީ ޝަޚްތަރާ ދެކޮޅަށެވެ.