ކޮވިޑަށް ޕޮޒިޓިވްވި މީހަކާއި ކޮންޓެކްޓްވެ ސްޕެއިންގެ ރަސްގެފާނު ފެލިޕޭ ކަރަންޓީނުގައި!

ކޮވިޑް-19އަށް ޕޮޒިޓިވްވި މީހަކާއި ކޮންޓެކްޓްވެ ސްޕެއިންގެ ރަސްގެފާނު، ފެެލިޕޭ (ހަވަނަ) ކަރަންޓީން ކޮށްފިއެވެ.

ގަނޑުވަރުގެ އޮފިޝަލަކާއި ހަވާލާދީ މީޑިއާ ރިޕޯޓުތައް ބުނާ ގޮތުން، ރަސްގެފާނު ފެލިޕޭ ކަރަންޓީނުގައި ހުންނެވީ ކޮވިޑަށް ޕޮޒިޓިވް މީހަކާއި ބައްދަލުވެ، ކްލޯސް ކޮންޓެކްޓެއް ގޮތުގައި ފާހަގަކުރެވޭތީއެވެ. އަދި، ކަރަންޓީނުގައި ހުންނަވާނީ 10 ދުވަހު ކަމަށެވެ. އިތުރު ތަފްސީލެއް އޮފިޝަލް ހާމަކޮށްފައެއް ނުވެއެވެ.

މިޑީއާ ރިޕޯޓުތައް ބުނާ ގޮތުން، އެމަނިކުފާނު ކަރަންޓީނުގައި ހުންނެވިއަސް، އަނބިކަނބަލުންނާއި 2 އަންހެން ދަރިކަލުން ކަރަންޓީން ނުވެއެވެ.

ޔޫރަޕްގެ ބައްރުގައި ހަލުވިކަމާއި އެކު ކޮވިޑް-19 އަނެއްކާވެސް ފެތުރެމުން އަންނަ އިރު، މިހާތަނަށް ސްޕެއިން އިން ވަނީ 1.6 މިލިއަން މީހުން ޕޮޒިޓިވްވެފައިވާކަމަށް ރިޕޯޓުކޮށްފައެވެ. ދުވާލެއްގެ މައްޗަށް މިހާރުވެސް އެ ގައުމުން، 10،000 އާއި ގާތްކުރާ އަދަދަކަށް މީހުން އަލަށް ޕޮޒިޓިްވްވެއެވެ.

މިދިއަ ހަފްތާގައި، ދުނިޔޭގެ ސިއްހަތު ޖަމިއްޔާއިން ވަނީ ކުރިއަށް އޮތް 6 މަސް ޔޫރަޕް ބައްރުގެ ގައުމުތަކުގައި ހަލުވިކަމާއި އެކު ބަލި ފެތުރިދާނެކަމަށް ބެލޭވޭކަމަށް ބުނެފައެވެ. ނަމަވެސް، ވެކްސިނެއް އީޖާދުކުރުމަށް އެކި ގައުމުތަކުން ކުރާ މަސައްކަތުގައި އުންމީދީ ނަތީޖާތަކެއް ފެންނަމުން ދާތީ ސްޕެއިންގެ ސަރުކާރުން ވަނީ އެ ގައުމުގެ ރައްޔިތުންނަށް ވެކްސިން ޖެހުމަށް އިންތިޒާމްކުރާނެ ގޮތާއި މެދު މަޝްވަރާ ބައްދަލުވުމެއް ބޭއްވުމަށް ނިންމާފައެވެ.

އަދި، އެ ގައުމުގެ ބޮޑުވަޒީރު ޕެޑްރޯ ސަންޗޭޒް ވަނީ އަންނަ އަހަރުގެ ފުރަތަމަ 6 މަސްދުވަހުގެ ތެރޭގައި އާބާދީގެ ބޮޑު ބަޔަކަށް ވެކްސިން ޖެހޭނެކަމަށް އުންމީދުކުރައްވާކަމަށް ވިދާޅުވެފައެވެ.