ސްޕެއިންގެ މައިސަރުކާރުން ކެޓަލޯނިއާ ހިންގުމާ، ޑިމޮކްރެޓި އުސޫލުން ދެކޮޅު ހެދުމަށް ކުރީގެ ލީޑަރު ގޮވާލައްވައިފި

ސްޕެއިންގެ މައިސާރުކާރުން ކެޓަލޯނިއާ ހިންގުމާ، ޑިމޮކްރެޓިކް އުސޫލުން ދެކޮޅު ހެދުމަށް މަގާމުން ދުރުކުރި ކަމަށް ސްޕެއިންގެ މައި ސަރުކާރުން ނިންމާފައިވާ ކެޓަލޯނިއާގެ ކުރީގެ ލީޑަރު ކާލްސް ޕުޖްޑިމޮންޓް ގޮވާލައްވައިފިއެވެ.

އޭނާވަނީ ކެޓަލޯނިއާގެ މިނިވަންކަން ހުއްޓުވިހުއްޓުވުން ކުށްވެރިކުރައްވައި މިނިވަން ގައުމެއް ބިނާ ކުރައްވަން ހުއްޓުމެއް ނެތި މަސައްކަތް ކުރައްވާނެ ކަމަށް ވައުދުވެ ވަޑައިގެންފައެވެ.

އޭނާގެ ގޮވާލެއްވުން އިއްވާފައި ވަނީ ހުންނެވި ތަނެއް ހާމަ ނުކުރައްވައި ޓީވީ މެދުވެރިކޮށް ދެއްވި ބަޔާނެއްގައެވެ.

ސްޕެއިންގެ ސަރުކާރުންވަނީ ކެޓަލޯނިއާގެ މިނިވަންކަން އިއުލާނުކުރުން ހުއްޓުވައި ކެޓަލޯނިއާގެ ސަރުކާރު ހިންގުމާ ހަވާލުވެފައެވެ.

ސްޕެއިންގެ ސަރުކާރުން މި ފިޔަވަޅު އަޅާފައި ވަނީ ހުކުރު ދުވަހު ކެޓަލޯނިއާގެ ގާނޫނުހަދާ މަޖިލީހުގައި ވޯޓެއް ނެގުމަށްފަހު މިނިވަންކަން އިއުލާނު ކުރުމުން ހޮނިހިރު ދުވަހުގެ ހެނދުނުއެވެ.

ސްޕެއިންގެ އިންޓީރިއާ މިނިސްޓްރީން އޭގެ ކުރިން ވަނީ ކެޓަލޯނިއާގެ ފުލުހުންގެ އިސްވެރިޔާ ވަކިކޮށް ފުލުހުންގެ ކަންކަމާ ހަވާލުވެފައެވެ.

މިނިވަންކަން އިއުލާނުކުރުމަށް ފެންނަ ކަމަށް ކެޓަލޯނިއާގެ ގާނޫނު ހަދާ މަޖިލީހުން ފާސް ކުރުމާއެކު އެ މަޖިލީސް އުވާލައްވައި އަވަސް އިންތިޚާބެއް ބޭއްވުމަށް ސްޕެއިންގެ ބޮޑުވަޒީރު މަރިއާނޯ ރަޚޮއިވަނީ ނިންމަވާ ހުކުރު ދުވަހު އެކަން އިއުލާނު ކުރައްވާފައެވެ.

ކެޓަލޯނިއާގެ މިނިވަންކަމާމެދު އޮކްޓޯބަރު މަހުގެ އެއްވަނަ ދުވަހު ނެގި ފެންނަ ނުފެންނަ ވޯޓުގައި ބައިވެރިވި މީހުންގެ 90 އިންސައްތަ މިނިވަންކަމަށް ތާއީދުކޮށްފައިވާ ކަމަށް ކެޓަލޯނިއާގެ ސަރަހައްދީ ސަރުކާރުން ބުނެ އެވެ.

ސްޕެއިންގެ މައި ސަރުކާރުން ކެޓަލޯނިއާ ވަކިވުމަށް ތާއީދު ނުކުރާ ކެޓަލޯނިއާގެ ރައްޔިތުން ބޯއިކޮޓް ކުރި މި ވޯޓުގައި ބައިވެރިވެފައިވަނީ ވޯޓު ލުމުގެ ހައްގު ލިބިފައިވާ މީހުންގެ 43 ސައްތަ އެވެ. ޣައިރު ގާނޫނީ ވޯޓެއް ކަމަށް ކޯޓުން ކަނޑައެޅުމުން އެއްބަޔަކުވަނީ ވޯޓް ބޮއިކޮޓް ކޮށްފައެވެ.