ސްޕެއިންގެ ކެޓަލޯނިއާ ސަރުކާރުގެ ވެރިން މަގާމުން ދުރުކޮށް ކެޓަލޯނިއާ ސްޕެއިންގެ ސަރުކާރުގެ ފުރިހަމަ ބާރުގެ ދަށަށް ގެނައުމާ ބެހޭ ޕްލޭނަށް ތާއިދުކުރެއްވުމަށް ސްޕެއިންގެ ގާނޫނު ހަދާ މަޖިލީހުގެ މެމްބަރުންގެ ކިބައިން ސްޕެއިންގެ ބޮޑު ވަޒީރު މާރިއާނޯ ރަޚޮއި އެދިވަޑައިގެންފިއެވެ. 

ރަޚޮއި ވިދާޅުވީ ސްޕެއިންގެ ސަރުޚާރުގެ އަތްދަށަށް ކެޓަލޯނިއާ ގެންނަން ޖެހެނީ އިތުރު އެހެން ގޮތެއް ނެތިގެން ކަމަށާއި، ކެޓަލޯނިއާ އަށް "ޑިމޮކްރަސީ އާއި ހަމަޖެހުން" ގެންނަން ޖެހޭ ކަމަށެވެ. ސްޕެއިންގެ ގާނޫނު ހަދާ މަޖިލީހުގެ މަތިގޭގައި ތަގުރީރު ކުރައްވަމުން ރަޚޮއި ވިދާޅުވީ ކެޓަލޯނިއާގެ ސަރުކާރުން މަސައްކަތް ކުރަނީ ސްޕެއިންގެ އާއިލާތައް ބައިބައިކޮށް މުޖުތަމައު ފަސާދަ ކުރުމަށްޓަކައި ކަމަށެވެ. އަދި ކެޓަލޯނިއާ ސަރުކާރުގެ އަމަަލުތަކުގެ ސަބަބުން އެ ސަރަހައްދުން ވިޔަފާރިތައްވެސް ދުރަށް ދާން ފަށާފައިވާ ކަމަށް ރަޚޮއި ވިދާޅުވިއެވެ. ރަޚޮއި ގެ ތަގުރީރަށް ސްޕެއިންގެ ސެނެޓުގައި ވަރަށް ބޮޑަށް ތަރުހީބު ލިބިގެން ދިޔައެވެ. 

ސްޕެއިންގެ ބޮޑު ވަޒީރު ހުކުރު ދުވަހު އެގައުމުގެ ސެނެޓުގައި ތަގުރީރު ދެއްވިތާ މާގިނައިރުތަކެއް ނުވެ ކެޓަލޯނިއާގެ ގާނޫނު ހަދާ މަޖީލީހުން ވަނީ އެ ސަރައްދުގެ މިނިވަންކަން އިއުލާންކޮށްފައެވެ. 

135 މެމްބަރުންގެ މައްޗަށް އެކުލެވޭ ކެޓަލޯނިއާގެ ގާނޫނު ހަދާ މަޖިލީހުގައި ހުކުުރު ދުވަހު ނެގި ވޯޓުގައި، 70 މެމްބަރަކު ވަނީ ކެޓަލޯނިއާ އިން މިނިވަންކަން އިއުލާން ކުރަން ފެންނަ ކަމަށް ވޯޓު ދެއްވާފައެވެ.  އަދި ގާނޫނު ހަދާ މަޖިލީހުގެ 10 މެމްބަރަކު ވަނީ މިކަމާ ދެކޮޅަށް ވޯޓު ދެއްވާފައެވެ. އަދި ދެ މެމްބަރަކު ވޯޓަށް ހާޒިރުވެވަޑައިނުގަންނަވައެވެ.  

ކެޓަލޯނިއާ އިން މިނިވަންކަން އިއުލާން ކުރުމާ ގުޅިގެން ކުޑަވަގުތުކޮޅެއްގެ ތެރޭގައި، ސްޕެއިންގެ ބޮޑު ވަޒީރު ވަނީ އެކަމާ ދެކޮޅަށް ޓްވީޓް ކުރައްވާފައެވެ. ބޮޑު ވަޒީރު މާރިއާނޯ ރަޚޮއި ކުރެއްވި ޓްވީޓެއްގައި ވިދާޅުވީ "ގާނޫނުގެ ހުކުމް ކެޓަލޯނިއާގައި ގާއިމުކުރައްވާނެ" ކަމަށެވެ.

ކެޓަލޯނިއާ އަކީ ސްޕެއިންގެ ބާރުގެ ދަށުގައިވާ ސަރަހައްދެކެވެ.

ކެޓަލޯނިއާގެ މިނިވަންކަން އިއުލާން ކުރަން ފެނޭތޯ ބެލުމަށް އޮކްޓޯބަރު 1 ގައި ބޭއްވި ވޯޓުގައި، 90 ޕަސެންޓް މީހުން މިިނިވަންވާން ފެންނަ ކަމަށް އާނ ބަސް ބުނެފައި ވެއެވެ. ކެޓަލޯނިއާގައި ނެގި ވޯޓާ ގުޅިގެން ސްްޕެއިންގެ މައި ސަރުކާރުން ބުނެފައި ވަނީ އެ ވޯޓަކީ ގާނޫނު އަސާސީއާ ޚިލާފު ބާތިލް އެއްޗެއް ކަމަށެވެ. ވޯޓު ނިމުނުތާ ކުޑަވަގުތުކޮޅެއްގެ ތެރޭގައި ސްޕެއިންގެ ބޮޑުވަޒީރު މާރިއާނޯ ރަޚޮއި ވިދާޅުވީ ޣައިރު ގާނޫނީ ވޯޓެއްގައި ބައިވެރިކޮށް ކެޓަލޯނިއާގެ ރައްޔިތުން މޮޔަ ހައްދާފައިވާ ކަމަށެވެ. ބޮޑުވަޒީރު ވަނީ އެ ވޯޓަކީ ޑިމޮކްރަސީއަށް ކުރި ފުރައްސާރައެއް ކަމަށް ވިދާޅުވެފައެވެ.

ސްޕެއިންގެ ކެޓަލޯނިއާއަކީ ސްޕެއިންގެ އެންމެ ފުދުންތެރި އަދި މުއްސަނދި ސަރަހައްދުތަކުގެ ތެރޭގައި ހިމެނޭ، އަމިއްލަ ބަހުރުވަޔަކާއި، ސަގާފަތަކާއި އަދި އަމިއްލަ ތާރީޚެއް އޮތް ސަރަހައްދެކެެވެ.