ރާއްޖޭގައި ހަނީމޫން ހޭދަކުރާ އިނގިރޭސިވިލާތު ރައްޔިތުން ވަރިވުމުގެ ފުރުސަތު ބޮޑު ކަމަށް ޕޯލްއަކުން ދައްކައިފިއެވެ.

އިނގިރޭސިވިލާތުގެ ޑެއިލީ މެއިލް އިން ކުރިޔަށް ގެންދިޔަ ޕޯލްއެއްގައި ކައިވެނި ރުޅޫނު 3،100 މީހުންނާ ސުވާލު ކުރެވުނުއިރު އެ މީހުންގެ ތެރެއިން 20 އިންސައްތަ މީހުން ހަނީމޫން ހޭދަކުރީ ރާއްޖޭގެ ރިސޯޓުތަކުގައި ހޭދަކޮށްފައިވާ މީހުންނެވެ.

ދެވަނައަށް އެންމެ ގިނަ މީހުން ހަނީމޫން ހޭދަކުރީ މޮރޮކޯގެ މަރަކޭޝްގައެވެ. އިނގިރޭސިންގެ މެދުގައި ހަނީމޫނަށް ދެން އެންމެ މަގުބޫލު ހަނީމޫން މަންޒިލުތަކުގެ ބާލީ، ސަންޓޯރިނީ، ވެނިސް، ބުއޭނޮސް އެއިރިސްގެ އިތުރުން ކަންކުން ހިމެނެއެވެ.

ރާއްޖެއަކީ އިނގިރޭސިވިލާތުގެ ފަތުރުވެރިންގެ މެދުގައި ވަރަށް މަގުބޫލު މަންޒިލެކެވެ. އަދި ރާއްޖެއަށް އެންމެ ގިނައިން ފަތުރުވެރިން ޒިޔާރަތްކުރާ ގައުމުތަކުގެ ތެރޭގައި އިނގިރޭސިވިލާތް އަބަދުވެސް ހިމެނެއެވެ.

ރާއްޖޭގޭ ބޯޑަރުތައް އަލުން ހުޅުވާލި ފަހުން ދެވަނައަށް އެންމެ ގިނަ ފަތުރުވެރިން ޒިޔާރަތްކޮށްފައި ވަނީ ވެސް އިނގިރޭސިވިލާތުންނެވެ. އެގޮތުން ނޮވެމްބަރު މަހުގެ 11 ވަނަ ދުވަހުގެ ނިޔަލަށް، އިނގިރޭސވިލާތުން 4،468 ފަތުރުވެރިން ރާއްޖޭ އައިސްފައިވާ ކަމަށް ޓޫރިޒަމް މިނިސްޓްރީން ވަނީ ހާމަކޮށްފައެވެ.