ޖޫހީ ޗާވްލާ އާއި އާއިލާ ރާއްޖޭގައި

ބޮލީވުޑްގެ ތަރި ޖޫހީ ޗާވްލާ އާއި އާއިލާ ރާއްޖޭގައި ޗުއްޓީ ހޭދަކުރަމުން އެބަދެއެވެ.

ރާއްޖެ އެމްވީއަށް އެނގިފައިވާ ގޮތުގައި ޖޫހީ އާއި އޭނާގެ އާއިލާ ޗުއްޓީ ހޭދަކުރަމުންދަނީ ރާއްޖޭގެ ރިސޯޓެއް ކަމަށްވާ ފޯ ސީޒަން ރިސޯޓުގައެވެ.

ރާއްޖެއެމްވީއަށް ވަނީ ޖޫހީ އާއި އޭނާގެ އާއިލާ ވެލާނާ އިންޓަނޭޝަނަލް އެއާޕޯޓުން ފުރައިގެން ޓީއެމްއޭގެ ޓިކެޓްގައި ފޯސީޒަނަށް ދިޔަކަން އެނގޭ ފްލައިޓް ރޯސްޓާގެ ފޮޓޯއެއް ލިބިފައެވެ.

އެ ޓިކެޓްގައި ވާގޮތުން ޖޫހީ އާއި އޭނާގެ ފިރިމީހާ ޖޭ މެހެތާ އާއި އަންހެން ދަރިފުޅު ޖަނާވީ މެހެތާ އަދި ފިރިހެން ދަރިފުޅު އަރުޖުން މެހެތާ ވަނީ ފޯސީޒަނަށް ގޮސްފައެވެ. އެމީހުން ފޯސީޒަނަށް ދިއުމަށް ފުރާފައި ވަނީ މިއަދު ހެނދުނު 9:50 ގައެވެ.

Caption

ޖޫހީ އާއި އޭނާގެ އާއިލާ ރާއްޖެ އައިސްފައިވާއިރު ދާދި ފަހުން ވަނީ ބޮލީވުޑްގެ ތަރި އަމީތާބު ބައްޗަން އާއި އޭނާގެ އާއިލާ ވެސް ރާއްޖެ އައިސްފައެވެ. އަމީތާބުގެ 75 ވަނަ އުފަންދުވަސް ފާހަގަ ކުރުމަށް ފަހު އެ އާއިލާ ރާއްޖެއިން ފުރާފައި ވަނީ އޮކްޓޯބަރު މަހުގެ 13 ވަނަ ދުވަހުގައެވެ.

ޖޫހީ ރާއްޖޭގައި ހޭދަކުރާނީ ކިހާ ދުވަހެއް ކަމެއް އަދި ނޭނގެއެވެ. ޖޫހީގެ ޓްވިޓާގައި ވެސް މިކަމާ ގުޅިގެން އެއްވެސް ޕޯސްޓެއް އަދި ކޮށްފައެއް ނުވެއެވެ. އާންމުކޮށް ބޮލީވުޑްގެ ތަރިންގެ "ޑެއިލީ ލިވިން" ޓްވިޓާގައި ހިއްސާކުރެއެވެ. އެހެން ނަމަވެސް އޭނާ މިއަދު ވަނީ ދިވާލީގެ ތަހުނިޔާ އިންޑިއާގެ ރައްޔިތުންނަށް ކިޔާފައެވެ.