އިންސްޓިޓިއުޓް އޮފް ގްލޯބަލް ސަކްސެސް (އައިޖީއެސް) އިން ފުރަތަމަ ފަހަރަށް ރާއްޖޭގައި ސްޕޭސް ޕްރޮގްރާމެއް ފަށަން ނިންމާފައިވާ ކަމަށް ބުނެފިއެވެ.
އައިޖީއެސްއިން އާދީއްތަ ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން އައިޖީއެސްގެ ޗެއާމަން ރިފްއަތު މުހައްމަދު ވިދާޅުވީ އައިޖީއެސްގެ މަސައްކަތަކީ ތަފާތު ދައްކުވައިދޭނެ ޖީލެއް ބިނާ ކުރުން ކަމަށާއި، އެގޮތުން އާދީއްތަ ދުވަހު އިފްތިތާހު ކުރެވުނު ސްޕޭސް ޕްރޮގްރާމަކީ ޒުވާނުންގެ އުންމީދުތަކާއި ގުޅިފައިވާ ޕްރޮގްރާމެއް ކަމަށެވެ.
ރިފްއަތު އިތުރަށް ވިދާޅުވީ މި ޕްރޮގްރާމް ޑިޒައިން ކުރެވިފައި ވަނީ ބައިނަލްއަގްވާމީ ތަޖުރިބާކާރުންގެ މަޝްވަރާއާއި އެކުގައި ކަމަށާއި، މި ޕްރޮގްރާމް ކުރިޔަށް ގެންދާނީ ދުނިޔޭގެ ކުރިއަރާފައިވާ ގައުމުތަކުގައި ވެސް ސްޕޭސް ޕްރޮގްރާމް ކުރިޔަށް ގެންދާ ގޮތައް ކަމަށެވެ.
ރިފްއަތު ވިދާޅުވީ ދިވެހި ޒުވާނުންނަށް މަދުވަނީ އެކަށޭނެ ފުރުސަތުތަކެއް ކަމަށާއި، އޭނާގެ ހުވަފެނަކީ ދިވެހި ޒުވާނުން އެސްޓްރޮނޯޓުންގެ ގޮތުގައި ކުރިއަރައިދިޔުން ކަމަށެވެ. އަދި އެ ފުރުސަތުތައް ހޯދައިދިނުމުގައި ސަރުކާރުގެ އެއްބާރުލުން ލިބޭނެ ކަމަށް އުންމީދު ކުރައްވާ ކަމަށް ރިފްއަތު ވިދާޅުވިއެވެ.
މި ޕްރޮގްރާމް ކުރިޔަށްދާނީ އިނގިރޭސިވިލާތުގެ ކޭއެސްސީ ފައުންޑޭޝަނާއި ގުޅިގެންނެވެ. އަދި މި ތަމްރީނުގައި ކިޔަވައިދޭނީ އެމެރިކާގެ ބޭފުޅުންނެވެ.
