މެންޗެސްޓާ ޔުނައިޓެޑުގައި ހުރެގެން މިޑްފީލްޑަރު ޕައުލް ޕޮގްބާއަށް އުފަލެއް ނެތް ކަމަށް ފްރާންސްގެ ކޯޗު ޑިޑިއޭ ޑެޝޯމްޕްސް ބުނެފިއެވެ.

ޕޮގްބާ މި ވަގުތު ޔުނައިޓެޑުގެ އެއްބަސްވުމުގައި ހުރީ އަންނަ އަހަރުގެ ހޫނު މޫސުމުގެ ނިޔަލަށެވެ. އެކަމަކު ޔުނައިޓެޑުން ބޭނުންނަމަ އިތުރު އެއް އަހަރަށް ޕޮގްބާގެ އެއްބަސްވުން އައު ކުރުމުގެ ފުރުސަތު އެބައޮތެވެ. އެހެންކަމުން އެ ފުރުސަތުގެ ބޭނުން ހިފައި، 2022 ވަނަ އަހަރުގެ ހޫނު މޫސުމުގެ ނިޔަލަށް ޕޮގްބާ ޔުނައިޓެޑުގައި ބެހެއްޓުމަށް އެ ޓީމުން މިހާރު އަންނަނީ މަސައްކަތް ކުރަމުންނެވެ.

ޔުވެންޓަސް ދޫކޮށް ދެވަނަ ފަހަރަށް ޔުނައިޓެޑާ ގުޅުނު ޕޮގްބާއަށް މި ފަހަކަށް އައިސް އެންމެ އެދެވޭ ކުޅުމެއް ދެއްކިފައެއް ނުވެއެވެ. އެގޮތުން ޔުނައިޓެޑުގެ ގިނަ މެޗުތަކުގައި ޕޮގްބާ ކުޅެން އަރުވަނީ ބަދަލު ކުޅުންތެރިއެއްގެ ގޮތުގައެވެ. އެކަމަކު ޕޮގްބާ އަންނަނީ ޑެޝޯމްޕްސްގެ އިރުޝާދުގެ ދަށުން ކުޅޭ ފްރާންސް ޓީމުގެ ފުރަތަމަ އެގާރައިގައި ހިމެނި މޮޅު ކުޅުމެއް ދައްކަމުންނެވެ.

މި މަހު ފްރާންސުން ކުޅޭ ތިން މެޗަށް ނެގި ސްކޮޑުގައި ޕޮގްބާ ހިމަނާފައިވާއިރު، ޑެޝޯމްޕްސް ބުނީ ޔުނައިޓެޑުގައި ހުރެގެން ޕޮގްބާއަށް އުފަލެއް ނެތް ކަމަށެވެ. އެގޮތުން މި ފަހަކަށް އައިސް ލިބުނު އަނިޔާތަކުގެ އިތުރުން ކޮވިޑް-19 ގެ އަސަރު ޕޮގްބާއަށް ވަރަށް ބޮޑަށް ކޮށްފައިވާ ކަމަށާއި، އެހެންކަމުން މި ފަހަކަށް އައިސް ޔުނައިޓެޑުގައި ޕޮގްބާއަށް އެންމެ ރަނގަޅު ކުޅުން ނުދެއްކޭ ކަމަށެވެ.

އަދި ކުލަބު ފެންވަރުގައި ކުޅުންތެރިންނަށް އުނދަގޫ ހާލަތެއް ކުރިމަތިވި ނަމަވެސް، އެ ކުޅުންތެރިއަކު ގައުމީ ޓީމަށް އަންނައިރު އޭގެ އަސަރު ކުރަނީ ވަރަށް ކުޑަ މިންވަރަކަށް ކަމަށާއި، އެހެންކަމުން ޕޮގްބާއަށް އެހީވާން ތައްޔާރަށް ހުރި ކަމަށްވެސް ޑެޝޯމްޕްސް ބުންޏެވެ.

މީގެ ކުރިން އެތައް ފަހަރަކު ޔުނައިޓެޑް ދޫކޮށްލަން ޕޮގްބާ މަސައްކަތް ކޮށްފައިވާއިރު، ކޮންމެވެސް ދުވަހަކުން ރެއާލް މެޑްރިޑަށް ކުޅުމަކީ ދެކެމުން އަންނަ ހުވަފެނެއް ކަމަށް ޕޮގްބާ ދާދި ފަހުން ވަނީ ބުނެފައެވެ. އަދި މީގެ ކުރިން އެތައް ފަހަރަކު މީޑިއާތަކުން ވަނީ ޕޮގްބާ ހޯދުމަށް ރެއާލުން މަސައްކަތް ކުރަމުން އަންނަ ކަމަށް ރިޕޯޓުކޮށްފައެވެ. އެގޮތުން މި ނިމުނު ހޫނު މޫސުމުގެ ޓްރާންސްފާ ބާޒާރުގައިވެސް ޕޮގްބާ އާއި ރެއާލާ ގުޅުވައިގެން ވަނީ އެކި ވާހަކަތައް ރިޕޯޓުކޮށްފައެވެ.

ޔުނައިޓެޑުން 2010 ވަނަ އަހަރު ކެރިއަރު ފެށި ޕޮގްބާ މީގެ ކުރިން ވަނީ ހިލޭ ޓްރާންސްފާއެއްގެ ދަށުން ޔުވެންޓަސްއަށް ބަދަލުވެ އެ ޓީމުގައި ހަތަރު ސީޒަން ހޭދަކޮށްފައެވެ. އޭގެ ފަހުން އަނެއްކާވެސް ޕޮގްބާ އަނބުރާ ޔުނައިޓެޑަށް ބަދަލުވީ 2016 ވަނަ އަހަރު 105 މިލިޔަން ޔޫރޯއަށެވެ. ޕޮގްބާ ވަނީ މިހާތަނަށް ޔުނައިޓެޑާއެކު އިނގިރޭސި ލީގު ކަޕުގެ އިތުރަށް ޔުއެފާ ޔޫރޮޕާ ލީގު ކާމިޔާބުކޮށްފައެވެ.