ވާދަވެރި ކްލަބަކަށް ސަންޗޭޒް ވިއްކާލަންވީ ސަބަބެއް ނެތް: ވެންގާ

އަސެނަލްއަށް ކުޅެމުން އަންނަ އެލެކްސަސް ސަންޗޭޒް ވާދަވެރި ކްލަބަކަށް ވިއްކަން ޖެހޭ ސަބަބެއް ނެތް ކަމަށް އެޓީމުގެ ކޯޗު އާސެން ވެންގާ ބުނެފިއެވެ.

ނޫސްވެރިންނަށް މައުލޫމާތު ދެމުން ވެންގާ ބުނީ ސަންޗޭޒް ފަދަ ކުޅުންތެރިޔަކު ޕްރިމިއާ ލީގުގެ ވާދަވެރި ކްލަބަކަށް ވިއްކަން ނުވާ ކަމަށެވެ. އޭގެ ބަދަލުގައި ދިގު މުއްދަތަކަށް އަދި ސަންޗޭޒް ބަހައްޓަން ބޭނުންވާ ކަމަށްވެސް އޭނާ ވަނީ ބުނެފައެވެ.

ވެންގާ ބުނީ ރޮބިން ވެންޕާސީ އާސެނަލްގައި ހުރި އިރުވެސް އޭނާ ވިއްކާލަން ނިންމީ އުމުރުން 29 އަހަރުވީމަ ކަމަށާއި، އެގޮތުން އެ ހާލަތާއި ސަންޗޭޒްގެ ހާލަތު ވަރަށް ތަފާތުކަމަށެވެ.

މީގެއިތުރުން ވެންގާ ބުނީ ސަންޗޭޒް އާސެނަލްގެ އެއްބަސްވުން އާކޮށް ދިގުމުއްދަތެއް ވަންދެން ކްލަބުގައި މަޑުކޮށް ކާމިޔާބީތައް ހޯދާނެ ކަމަށް އޭނާއަށް ގަބޫލުކުރެވޭ ކަމަށެވެ.

ރިޕޯޓްތައް ބުނާގޮތުން މި ސީޒަނަށްފަހު އާސެނަލް ދޫކޮށްލާނެ ކަމަށް ބެލެވޭ ސަންޗޭޒް އޭނާ އާއި އާސެނަލްއާ ދެމެދު ހެދިފައި އޮތް އެއްބަސްވުމާ މެދު ހިތްހަމައެއްނުޖެހެއެވެ. އެގޮތުން މި ސީޒަނަށްފަހު އެއްބަސްވުން ހަމަވާއިރު، ސަންޗޭޒް ބޭނުންވަނީ އެއްބަސްވުމަށް އިސްލާހު ގެނެސް އަލުން ސޮއިކުރަންކަމަށް ރިޕޯޓްތައްބުނެއެވެ.

އެހެންނަމަވެސް ޗައިނާ ގިނަ ކްލަބްތަކުން ހޯދުމަށް މަސައްކަތްކުރަމުން އަންނަ، އަދި ދުނިޔޭގެ ނަން މަޝްހޫރު އެތައް ކްލަބަކުން ހުށަހެޅުންތައް ހުށަހަޅާފައިވާ ސަންޗޭޒް އޭނާ އާސެނަލްއާ އެކު އާ ކޮންޓްރެކްޓެއް ހެދުމަށް ދެކޮޅު ހަދާފައިވާކަމަށްވެސް ރިޕޯޓްތައް ބުނެއެވެ.

ބާސާގައި ހޭދަކުރި ތިން ސީޒަނުގައި އެ ކްލަބަށް ކުޅުނު 141 މެޗުގައި 47 ލަނޑު ކާމިޔާބުކޮށްފައިވާ ސަންޗޭޒް ވަނީ މިވީތަނަށް އާސެނަލް އަށް ކުޅުނު 137 މެޗުގައި 66 ލަނޑު ކާމިޔާބުކޮށްފައެވެ.

ކޮޕާ އެމެރިކާ ފުޓުބޯޅަ މުބާރާތް ޖެހިޖެހިގެން ދެ ފަހަރު ޗިލީއާ އެކު ކާމިޔާބުކޮށްފައިވާ ސަންޗޭޒް ހޯދި ކާމިޔާބީތަކަށް ބަލާއިރު، އޭނާ ވަނީ ބާސާއާ އެކު ލަލީގާ، ކޮޕާ ޑެލްރޭ، ދެ ސްޕެނިޝް ސުޕާކަޕް، ޔުއެފާ ސުޕާ ކަޕް އަދި ފީފާ ކްލަބް ވޯލްޑްކަޕް ކާމިޔާބުކޮށްފައެވެ. މީގެ އިތުރުން އޭނާ ވަނީ އާސެނަލްއާ އެކު އެފްއޭކަޕްގެ އިތުރުން އެފްއޭ ކޮމިއުނިޓީ ޝީލްޑް ދެ ފަހަރު ކާމިޔާބުކޮށްފައެވެ.