މާޒީގެ ވާހަކަ ދައްކަން ބޭނުން ނުވާ ކަމަށާއި، ފާއިތުވި ސީޒަނުގައި ޓީސީ އަތުން ބަލިވެފައި ވީނަމަވެސް މިފަހަރު ޓީސީއަތުން ބޭނުން ވަނީ މޮޅެށް ކަމަށް މާޒިޔާގެ ކޯޗް މާޔަން ސެކުލޮސްކީ ބުނެފިއެވެ.

އެސްޓީއޯ މާލެ ލީގުގައި ބުރާސްފަތި ދުވަހު ޓީސީ އާއި ދެކޮޅަށް ކުޅޭ މެޗުގެ ކުރިން އެފްއޭއެމް ހައުސްގައި ބޭއްވި ޕްރީ މެޗް ޕްރެސް ކޮންފަރެންސްގައި ވާހަކަ ދައްކަމުން މާޒިޔާގެ ކޯޗް ސެކުލޮސްކީ ބުނެފައި ވަނީ، ޓިސީއަކީ ރާއްޖޭގައި މިވަގުތު އޮތް އެންމެ ވަރުގަދަ އެއް ޓީމު ކަމަށާ، ފާއިތުވި ސީޒަނުގައިވެސް އަދި މިސީޒަނުގައި ވެސް އެޓީމުން އަންނަނީ މޮޅު ކުޅުމެއް ދައްކަމުން ކަމަށެވެ.

އެގޮތުން ފާއިތުވި ސީޒަނުގައި މާޒިޔާ އާއި ޓީސީ ގެ 2 ކުރިމަތިލުން ވެސް ޓީސީއިން ކާމިޔާބުކޮށްފައި ވީނަމަވެސް މާޒީގެ ވާހަކަ ދައްކަން ބޭނުން ނުވާ ކަމަށް ސެކުލޮސްކީ ބުންޏެވެ. އޭނާ ބުނެފައި ވަނީ އޭނާ އަބަދު ވެސް ވިސްނަނީ ކުރިއަށް ކަމަށާ، މުޅި ޓީމު އޮތީ ޓީސީގެ މެޗަށް ފުރިހަމައަށް ތައްޔާރުވެފައި ކަމަށެވެ.

އިތުރަށް ވާހަކަދައްކަމުން ސެކުލޮސްކީ ބުނެފައި ވަނީ، މާޒިޔާއަށް ދިމާވެފައިވާ ހަމައެކަނި މައްސަލައަކީ ފުލުފުލުގައި މެޗުތަށް ހުރުމުން، އެއް މެޗަށް ފަހު އަނެއް މެޗަށް ތައްޔާރުވުމަށް ބޭނުންވާ ވަގުތު ނުލިބުން ކަމަށެވެ.

އެގޮތުން އޭނާ ވަނީ، އެންމެ 45 ދުވަހުގެތެރޭގައި 11 މެޗު ކުޅެން ޖެހުމަކީ އުނދަގޫ ކަމެއްކަން ފާހަގަ ކޮށްފައެވެ. އޭއެފްސީ ކަޕުގެ ގްރޫޕް ސްޓޭޖހުގެ މެޗުތަކާއި މާލެ ލީގުގެ މެޗުތަކާއި ދޭތެރޭގައި އެޓިމަށް ބޭނުންވާ ވަރަށް ވަގުތު ނުލިބޭތީ، ކޯޗު ވަނީ މީގެ ކުރިންވެސް ޕްރެސް ކޮންފަރެންސް ތަކުގައި މި ވާހަކަ ފާހަގަ ކޮށްފައެވެ.

ސެކިލޮސްކީ ބުނެފައި ވަނީ، ޓިސީގައި ހުރީ ރާއްޖޭގެ އެންމެ މޮޅު ކޯޗު ކަމަށާއި،ސްކޮޑަށް ބަލައިފި ނަމަވެސް މޮޅެތި ޒުވާން ކުޅުންތެރިން ޓީމުގައި ހިމެނޭ ކަމަށެވެ. އެހެންކަމުން ޓީސީއަށް ފުރިހަމައަށް އިހުތިރާމް ކުރާ ކަމަށް ވެސް ކޯޗު ވަނީ ބުނެފައެވެ.

ޓިސީ އާއި މާޒިޔާގެ ކުރިމަތިލުމަކީ މާލެ ލީގުގެ ފުރަތަމަ ބުރުގައި މި ދެޓީމު ވެސް ކުޅޭ ފަހު މެޗެވެ.