ރާއްޖޭގައި ވައްކަމާއި ޚިޔާނާތުގެ މައްސަލަތައް އިތުރުވަމުންދާތީ، އެކަންކަމަކީ މީހުން ބިރުގަންނަ ވަރުގެ ކަންކަމަށް ހަދާނެ ކަމަށް ޕްރޮސެކިއުޓަރ ޖެނަރަލް (ޕީޖީ) ހުސައިން ޝަމީމު ވިދާޅުވެއްޖެއެވެ.

ދިވެހިރާއްޖޭގެ އަޑުން ގެނެސްދޭ "އަހާށޭ ބުނާނަން" ޕްރޮގްރާމުގައި ބައިވެރިވެވަޑައިގެން ޕީޖީ ޝަމީމް ވިދާޅުވީ، ވައްކަމާއި ޚިޔާނާތުގެ މައްސަލަތައް އިތުރުވަމުންދާ ކަމަށާއި، އެކަންކަމަކީ އެކަންކުރާ މީހުން ބިރު ގަންނަ ވަރުގެ ކަމަކަށް ހެދުމަށް ގިނަ މަސައްކަތްތަކެއް ކުރެވެމުންދާކަމަށެވެ.

ވައްކަމުގެ މައްސަލަތަކަކީ ވެސް ޖިންސީ ގޯނާ އާއި، ފުރައްސާރައިގެ މައްސަލަތަކުގައި އަދަބު ލިބޭ ފަދައިން، އަދަބު ދެވޭނެ ކުށަކަށް ހަދާ، ވައްކަންކޮށްފި ނަމަ ހައްގު އަދަބު ލިބޭނެކަން އެކަން ކުރާ މީހުންނަށާއި މުޅި މުޖުތަމައަށް ވިސްނައިދެއްވުމަށްޓަކައި މަސައްކަތްތަކެއް ކުރައްވަމުން ގެންދަވާ ކަމަށް ޕީޖީ ވިިދާޅުވިއެވެ. އަދި ކުރިއަށް އޮތް އަހަރުގެ ތެރޭގައި ފާއިތުވެދިޔަ 10 އަހަރުގެ ތެރޭގައި ނުކުރާވަރަށް ވައްކަމުގެ މައްސަލަތަކުގައި ދައުވާކޮށް އެ މައްސަލަތައް ސާބިތު ކުރެވިގެން ދާނެ ކަމަށް ޕީޖީ ވިދާޅުވިއެވެ.

ކުޑަކުދިންނަށް ކުރާ ޖިންސީ އަނިޔާގެ މައްސަލަތަކާއި ގުޅިގެން ޕީޖީ ޝަމީމު ވިދާޅުވީ، ކުޑަކުދިންނަށް ޖިންސީ ހާނިއްކައެއް ދީފައި ސަލާމަތް ވެގެން ރީތިކޮށް ނޫޅެވޭނެ ކަމާއި، އެފަދަ ކަންކަން ކުރާ ފަރާތްތަކަށް ދައުވާކޮށް، އަދަބު ވެސް ދެވޭނެކަން އަދި ޖަލަށް ވެސް ލާނެކަން މިހާރު ރައްޔިތުންނަށް އެނގޭނެ ކަމަށެވެ.

އެގޮތުން އެފަދަ ވަރުގަދަ މެސެޖެއް ކޮރަޕްޝަންގެ އަމަލުތައް ހިންގާ ފަރާތްތަކަށް ވެސް ދޭންޖެހޭ ކަމަށް ޕީޖީ ޝަމީމް ވިދާޅުވިއެވެ. އަދި ކޮރަޕްޝަންގެ ވަބާ ރާއްޖެއިން އެއްކޮށް ނައްތާލުމަށް ޕީޖީ އޮފީހުން ކުރަންޖެހޭ މަސައްކަތްތައް ކުރަމުންދާ ކަމަށާއި، މި ވަގުތަށް ބޭނުންވާ ބައެއް ގާނޫނުތައް ހެދުމާއި ގާނޫނުތަކަށް ބަދަލު ގެނައުމުގެ މަސައްކަތް ރައްޔިތުންގެ މަޖިލީހުގައި ހިނގަމުންދާ ކަމަށް ވިދާޅުވިއެވެ.

ޕީޖީ ޝަމީމު ވިދާޅުވީ، މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ) ގެ ބޮޑު ހިޔާނާތުގެ މައްސަލާގައި ޝާމިލްވާ ފަރާތްތަކުގެ މައްސަލަތައް ތަހުގީގު އިދާރާތަކުން ލިބޭހާ އަވަހަކަށް ދައުވާ ކުރަން ފޮނުވާނެ ކަމަށާއި، މިހާރު ވެސް ޝަރުއީ ކޯޓުތަކުގައި އެމްއެމްޕީއާރުސީގެ ހިޔާނާތާއި ވައްކަމާއި ކޮރަޕްޝަނުގެ ގިނަ މައްސަލަތަކެއް ކުރިއަށްދާ ކަމަށެވެ. އަދި އެމްއެމްޕީއާރުސީ ބޮޑު ހިޔާނާތުގެ މައްސަލައަކީ ވަރަށް ބޮޑު އިސްކަމެއް ދެއްވައިގެން ބަލަމުންދާ މައްސަލައެއް ކަން ފާހަގަކުރެއްވިއެވެ.

އޮޑިޓް ރިޕޯޓްގައި އެމްއެމްޕީއާރުސީގެ ހިޔާނާތް 1.23 ބިލިއަން ރުފިޔާ ކަމަށް ބުނެފައިވީ ނަމަވެސް، އެއީ ނުއަގުގައި ފަޅުރަށްތަކާއި ފަޅުތަކާއި ފަރުތައް ވިއްކައިގެން ހިޔާނާތް ހިންގާފައިވާ އަދަދެވެ. އެހެން ނަމަވެސް އެމްއެމްޕީއާރުސީީގެ ހިޔާނާތް ޖުމްލަ އަގު 3 ނުވަތަ 4 ބިލިއަން ރުފިޔާއަށް އަރާނެ ކަމަށް އެސެޓް ރިކަވަރީ ކޮމިޝަނުން ވަނީ ހާމަކޮށްފައެވެ.