އަހުމަދީނިޖާދަށް އިންތިޚާބުގައި ވާދައެއް ނުކުރެއްވުނު

އީރާނުގެ ރިޔާސީ އިންތިޚާބުގައި ވާދަކުރުމުގެ ފުރުސަތު އެގައުމުގެ ކުރީގެ ރައީސް މަހްމޫދު އަހުމަދީނިޖާދަށް ގެއްލިއްޖެއެވެ.

އަހުމަދީނިޖާދަށް އަންނަ މަހު އޮންނަ ރިޔާސީ އިންތިޚާބުގައި ވާދަކުރުމުގެ ފުރުސަތު ގެއްލުނީ، އީރާނުގެ އެންމެ މަތީ މަޖްލިސް ނުވަތަ ގާޑިއަން ކައުންސިލުން އެގޮތަށް ނިންމުމުންނެވެ.

ރިޔާސީ އިންތިޚާބަށް ނުކުންނެވުމަށް އަހުމަދީނިޖާދު ނިންމެވިއިރު، އެމަނިކުފާނަކީ މީގެ ކުރިން އީރާނުގެ ރައީސްކަމުގެ ދެ ދައުރު ފުރިހަމަ ކުރައްވާފައިވާ ބޭފުޅެކެވެ.

އަހުމަދީނިޖާދަށް މޭމަހުގެ 19 ވަނަ ދުވަހު އޮންނަ ރިޔާސީ އިންތިޚާބުގައި ވާދަނުކުރޭވެ ކަމަށް ނިންމިއަސް ގާޑިއަން ކައުންސިލުން ވަނީ މިހާރުގެ ރައީސް ހަސަން ރޫހާނީ އާއި ހަރުކަށި ޚިޔާލުގެ ކެންޑިޑޭޓެއް ކަމަށްވާ އިބްރާހިމް ރައިސީއަށް ވާދަކުރެވޭނެ ކަމަށް ނިންމާފައެވެ.

އިންތިޚާބުގައި ވާދަކުރާ 6 ކެންޑިޑޭޓުންގެ ނަން ފަހުގެ ތާރީޚެއްގައި ގާޑިއަން ކައުންސިލުން އިއުލާންކުރާނެއެވެ. މި އިންތިޚާބުގައި ވާދަކުރުމަށް ސޯޅަ ހާހަށްވުރެ ގިނަ ކެންޑިޑޭޓުން ނަން ހުށަހަޅާފައިވެއެވެ.

އީރާނުގެ ރިޔާސީ އިންތިންޚާބުގައި އަހުމަދީނިޖާދަށް ވާދަ ނުކުރެވޭނެ ސަބަބު ގާޑިއަން ކައުންސިލުން ހާމަ ނުކުރިނަމަވެސް އިންތިޚާބުގައި ވާދަނުކުރެއްވުމަށް އީރާނުގެ ރޫހީ ލީޑަރު އާޔަތުﷲ އަލީ ޚާމަނާއީ ވަނީ އަހުމަދީނިޖާދަށް އިންޒާރު ދެއްވައިފަ އެވެ.

ރޫހީ ލީޑަރުގެ ވަރުގަދަ އިންޒާރުގައި ވިދާޅުވެފައިވަނީ އަހުމަދީނިޖާދު އިންތިޚާބުގައި ވާދަ ނުކުރަން ޖެހެނީ "އޭނާ އަށާއި ގައުމުގެ ފައިދާ އަށް" ކަމަށެވެ.

ގައުމުގެ ރައްޔިތުން އަހުމަދީނިޖާދު އިންތިޚާބުގައި ވާދަކުރައްވަން ބޭނުންނުވާ ކަމަށާއި އެހެން ނޫން ނަމަ އަނެއްކާ ވެސް ގައުމުގައި ހަމަނުޖެހުން ބޮޑުވެ ބައިބައިވުން އުފެދޭނެ ކަމަށް ޚާމަނާއީ ވިދާޅުވެފައިވެ އެވެ.

ރޫހީ ލީޑަރުގެ އިންޒާރާއި އެކުވެސް އަހުމަދީނިޖާދު އިންތިޚާބުގައި ވާދަކުރައްވަން ނިންމެވީ އެ އިންޒާރަކީ ނަސޭހަތެއް ކަމަށް ވިދާޅުވަމުންނެވެ.